Die Bybel​—Is dit regtig “deur God geïnspireer”?

GLO jy dat die Bybel van God af kom? Of dink jy dat dit net ’n boek is met mense se gedagtes?

Nie almal wat sê dat hulle Christene is, voel dieselfde hieroor nie. In 2014 het ’n Gallup-opname in die Verenigde State byvoorbeeld gewys dat die meeste mense wat hulleself Christene noem, saamstem dat “die Bybel op die een of ander manier iets met God te doen het”. Maar 1 uit 5 van hulle glo dat die Bybel ’n boek vol “ou sprokies, legendes, geskiedenis en reëls van mense” is. Al stem mense nie hieroor saam nie, sê die Bybel self dat dit “deur God geïnspireer” is. Hoe so?—2 Timoteus 3:16.

“GEÏNSPIREER”—WAT BETEKEN DIT?

Die Bybel bestaan uit 66 kleiner boeke. Dit is deur sowat 40 manne oor ’n tydperk van omtrent 1 600 jaar geskryf. Maar as die Bybel deur mense geskryf is, hoe kan dit “deur God geïnspireer” wees? Die uitdrukking “deur God geïnspireer” beteken eenvoudig dat God die Bron van die inligting daarin is. Die Bybel sê: “Mense het uit God gespreek namate hulle deur heilige gees meegevoer [of, gelei] is” (2 Petrus 1:21). Dit wil sê, God het sy onsigbare heilige gees, sy werkende krag, gebruik om sy boodskap aan die skrywers van die Bybelboeke oor te dra. Dit kan vergelyk word met ’n sakeman wat vir sy sekretaris sê wat hy in ’n brief moet skryf. Die brief kom nie van die sekretaris af wat dit skryf nie, maar dit kom eerder van die sakeman af.

Partykeer het Bybelskrywers God se boodskap direk by ’n engel gehoor. Ander skrywers het visioene van God af gekry. En in sommige gevalle het God sy boodskap deur drome aan hulle oorgedra. God het soms die skrywers toegelaat om sy boodskap in hulle eie woorde neer te skryf. Op ander kere het hy vir hulle presies gesê wat om te skryf. Maar in alle gevalle het skrywers God se gedagtes oorgedra en nie hulle eie nie.

Hoe kan ons seker wees dat dit God is wat die Bybelskrywers geïnspireer het? Kom ons kyk na drie bewyse wat ons vertroue sal opbou dat die Bybel van God af kom.