Die Bybel se beskouing
Wie is die Outeur van die Bybel?
DIE Bybel sê duidelik wie die inhoud daarvan neergeskryf het. Verskillende dele van hierdie boek begin met uitdrukkings soos “die woorde van Nehemia”, “die visioen van Jesaja” en “die woord van Jehovah wat tot Joël . . . gekom het” (Nehemia 1:1; Jesaja 1:1; Joël 1:1). Sekere geskiedkundige verslae word geïdentifiseer as die werk van Gad, Natan of Samuel (1 Kronieke 29:29). Die opskrifte van etlike psalms identifiseer die skrywer daarvan.—Psalm 79, 88, 89, 90, 103 en 127.
Aangesien mense gebruik is om die Bybel te skryf, sê skeptici dat dit, soos enige ander boek, eenvoudig die produk van menslike wysheid is. Maar is daardie mening gegrond?
Veertig skrywers, een Outeur
Die meeste Bybelskrywers het erken dat hulle in die naam van Jehovah, die enigste ware God, geskryf het en dat hulle deur hom of deur ’n engeleverteenwoordiger gelei is (Sagaria 1:7, 9). Profete wat die Hebreeuse Geskrifte geskryf het, het meer as 300 keer verklaar: “Só het Jehovah gesê” (Amos 1:3; Miga 2:3; Nahum 1:12). Baie van hulle geskrifte begin met uitdrukkings soos: “Die woord van Jehovah wat tot Hosea . . . gekom het” (Hosea 1:1; Jona 1:1). Die apostel Petrus het aangaande God se profete gesê: “Mense het uit God gespreek namate hulle deur heilige gees meegevoer is.”—2 Petrus 1:21.
Die Bybel is dus ’n saamgestelde maar samehangende boek wat geskryf is deur baie manne wat erken het dat God hulle geskrifte geïnspireer het. Met ander woorde, God het menslike sekretarisse gebruik om sy gedagtes neer te skryf. Hoe het hy dit gedoen?
“Deur God geïnspireer”
“Die hele Skrif is deur God geïnspireer”, het die apostel Paulus verduidelik (2 Timoteus 3:16). Die Griekse woord wat as “deur God geïnspireer” vertaal word, beteken letterlik “deur God ingeblaas”. Dit wil sê, God het ’n onsigbare krag gebruik om die gedagtes van menslike skrywers te rig en sodoende sy boodskap aan hulle oor te dra. In die geval van die Tien Gebooie het Jehovah egter self die woorde op kliptafels geskryf (Eksodus 31:18). Soms het God sy boodskap direk aan menseknegte gedikteer. Eksodus 34:27 sê: “Jehovah het verder vir Moses gesê: ‘Skryf hierdie woorde vir jou op . . . ’”
By ander geleenthede het God mense visioene laat sien van die dinge wat hy wou hê hulle moes neerskryf. Esegiël het dus gesê: “Ek [het] visioene van God begin sien” (Esegiël 1:1). Net so “het Daniël ’n droom gesien en visioene wat in sy kop gekom het terwyl hy op sy bed was. Toe het hy die droom opgeskryf” (Daniël 7:1). Die laaste boek van die Bybel, Openbaring, is op soortgelyke wyse aan die apostel Johannes oorgedra. Johannes het geskryf: “Deur inspirasie het ek my in die dag van die Here bevind, en ek het ’n sterk stem agter my gehoor, soos dié van ’n trompet, wat gesê het: ‘Skryf wat jy sien in ’n boekrol.’”—Openbaring 1:10, 11.
Die menslike element
Goddelike inspirasie het nie die skrywer sy individualiteit ontneem nie. Trouens, dit het persoonlike inspanning geverg om God se boodskap neer te skryf. Die skrywer van die Bybelboek Prediker het byvoorbeeld gesê dat hy “gesoek [het] om die welgevallige woorde te vind en korrekte woorde van waarheid neer te skryf” (Prediker 12:10). Esra het ten minste 14 bronne geraadpleeg om sy geskiedkundige verslag saam te stel, soos “die kroniek van koning Dawid” en “die Boek van die konings van Juda en van Israel” (1 Kronieke 27:24; 2 Kronieke 16:11). Die Evangelieskrywer Lukas het “alles van die begin af noukeurig nagespeur . . . om dit in logiese volgorde . . . te skryf”.—Lukas 1:3.
Sommige Bybelboeke openbaar aspekte van die skrywer se persoonlikheid. Byvoorbeeld, Matteus Levi, wat ’n belastinggaarder was voordat hy een van Jesus se dissipels geword het, het veral aan syfers aandag geskenk. Hy is die enigste evangelieskrywer wat opgeteken het dat die prys om Jesus te verraai, “dertig silwerstukke” was (Matteus 27:3; Markus 2:14). Lukas, ’n dokter, het mediese besonderhede akkuraat opgeteken. Wanneer hy byvoorbeeld die toestand beskryf het van sommige van dié wat deur Jesus genees is, het hy uitdrukkings soos “hoë koors” en “vol melaatsheid” gebruik (Lukas 4:38; 5:12; Kolossense 4:14). Jehovah het skrywers dus dikwels toegelaat om hulle in hulle eie woorde en styl uit te druk; maar terselfdertyd het hy hulle gedagtes gerig sodat die teks akkuraat was en sy boodskap oorgedra het.—Spreuke 16:9.
Die eindproduk
Is dit nie verbasend dat ongeveer 40 manne, wat oor ’n tydperk van 1 600 jaar in ’n aantal lande geskryf het, ’n boek voortgebring het wat in elke opsig heeltemal harmonies is en een pragtige tema het nie? (Sien “Waaroor handel die Bybel?” bladsy 19.) Dit sou onmoontlik gewees het as hulle nie almal deur een Outeur gerig is nie.
Was Jehovah verplig om mense te gebruik om sy Woord op skrif te stel? Nee. Maar die feit dat hy dit gedoen het, is ’n blyk van sy goddelike wysheid. Trouens, een van die redes waarom die Bybel wêreldwyd by mense byval vind, is dat die skrywers daarvan die volle spektrum van menslike emosies oortuigend uitdruk—selfs die skuldgevoelens van ’n berouvolle sondaar wat God om genade gesmeek het, soos in die geval van koning Dawid.—Psalm 51:2-4, 13, 17, opskrif.
Hoewel Jehovah menseskrywers gebruik het, kan ons dieselfde vertroue hê in hulle werk as wat die vroeë Christene gehad het, wat die Heilige Skrif aangeneem het, “nie as die woord van mense . . . nie maar, soos dit waarlik is, as die woord van God”.—1 Tessalonisense 2:13.
HET JY AL GEWONDER?
◼ Wie is die Outeur van “die hele Skrif”?—2 Timoteus 3:16.
◼ Watter metodes het Jehovah God gebruik om sy gedagtes oor te dra?—Eksodus 31:18; 34:27; Esegiël 1:1; Daniël 7:1.
◼ Hoe word die persoonlikheid en belangstellings van geïnspireerde skrywers in hulle geskrifte weerspieël?—Matteus 27:3; Lukas 4:38.