1. Is dit God se skuld dat ons swaarkry?

Hoekom dit saak maak

Baie mense verwerp God omdat hulle dink dat dit sy skuld is dat ons swaarkry.

Iets om oor te dink

Baie godsdiensleiers het direk of indirek mense geleer dat dit God se skuld is dat ons swaarkry. Byvoorbeeld, party sê die volgende:

• Natuurrampe is ’n straf van God.

• Kinders sterf omdat God meer engele in die hemel nodig het.

• God kies kant in oorloë – iets wat baie mense laat swaarkry.

Maar is dit moontlik dat godsdiensleiers verkeerde dinge oor God leer? Wat as God hulle verwerp het?

Wat die Bybel sê

God is nie die oorsaak van ons swaarkry nie.

As hy die oorsaak is, stem dit nie ooreen met wat die Bybel oor sy eienskappe sê nie. Byvoorbeeld:

“Al [God se] weë is geregtigheid. . . . Regverdig en reg is hy.” – DEUTERONOMIUM 32:4.

“Die ware God sal nooit goddeloos optree nie! Die Almagtige sal nooit verkeerd doen nie!” – JOB 34:10.

“Die Almagtige is nooit onregverdig nie.” – JOB 34:12.

God verwerp godsdienste wat verkeerde dinge oor hom leer.

Dit sluit godsdienste in wat ander leer dat God verantwoordelik is vir ons swaarkry. Dit sluit ook dié in wat by oorlog en geweld betrokke is.

“Die profete profeteer leuens in my [God se] naam. Ek het hulle nie gestuur of hulle beveel of met hulle gepraat nie. Hulle profeteer ’n valse visioen en . . . die bedrog van hulle eie hart aan julle.” – JEREMIA 14:14.

Jesus veroordeel godsdienste wat skynheilig is.

“Nie elkeen wat vir my sê: ‘Here, Here,’ sal in die Koninkryk van die hemel ingaan nie, maar net die een wat die wil doen van my Vader wat in die hemel is. Baie sal in daardie dag vir my sê: ‘Here, Here, het ons nie in u naam geprofeteer en in u naam demone uitgedryf en in u naam allerhande kragtige werke gedoen nie?’ En dan sal ek vir hulle sê: ‘Ek het julle nooit geken nie! Gaan weg van my af, julle wettelose mense!’” – MATTEUS 7:21-23.