HOE OM STYGENDE PRYSE TE HANTEER

Spandeer jou geld wyslik

Stygende pryse veroorsaak probleme vir ons almal. Maar jy hoef nie hulpeloos te voel nie. Daar is dalk dinge wat jy kan doen om jou situasie te verbeter.

HOEKOM DIT SAAK MAAK

As jy nie ten minste probeer om jou geld wyslik te spandeer nie, kan jou finansies maklik buite beheer raak en sal jy selfs meer bekommernisse en angstighede hê. Selfs al het jy nie baie geld nie, is daar ’n paar dinge wat jy kan doen om jou situasie te verbeter.

WAT JY KAN DOEN

Lewe binne jou inkomste. Wanneer jy dit doen, sal jy heel moontlik meer in beheer voel oor jou finansiële situasie en sal jy voorbereid wees om vir iets onverwags te betaal.

Stel ’n begroting op – ’n plan wat rekord hou van jou inkomste en uitgawes – om jou te help om binne jou inkomste te lewe. Terwyl jy jou begroting oorweeg, moet jy mooi dink oor wat jy regtig nodig het. Doen dan jou bes om by jou begroting te bly, en pas dit aan soos jou inkomste of pryse verander. As jy getroud is, moet jy natuurlik jou huweliksmaat by enige besluite insluit.

Probeer die volgende: Betaal eerder met kontant as jy kan in plaas daarvan om dinge op krediet te koop. Party vind dat hulle hulle begroting beter kan beheer en selfs uit die skuld kan bly as hulle hulle geld op hierdie manier spandeer. Neem ook die tyd om jou bankstate te hersien. Jy sal minder gestres voel wanneer jy weet hoeveel geld jy eintlik het.

Om binne jou inkomste te lewe kan moeilik wees. Maar ’n goeie begroting kan baie help. Jy sal dalk ook meer in beheer voel.

“Bereken . . . die koste.”– Lukas 14:28.

Werk hard om jou werk te behou. Watter praktiese dinge kan jy doen om jou werk te behou? Hier is net ’n paar dinge: Wees betyds by die werk. Wees positief oor jou werk. Neem die inisiatief, en werk hard. Wees respekvol. Volg die reëls, en probeer om jou vaardighede te verbeter.

Vermy dit om jou geld te mors. Vra jouself af: ‘Spandeer ek dikwels te veel geld op dinge wat nie nodig is nie of wat selfs sleg is vir my?’ Byvoorbeeld, baie mense mors hulle geld deur dwelms te gebruik, te dobbel, te rook of te veel alkohol te drink. Hierdie gewoontes kan sleg wees vir hulle gesondheid en hulle hulle werk kos.

“Gelukkig is die mens wat wysheid vind. [Dit] is beter as om silwer te verkry.”– Spreuke 3:13, 14.

Spaar vir noodgevalle. Wanneer jy kan, kan jy ’n klein bedrag geld opsysit vir onverwagse uitgawes of noodgevalle. Hierdie geld sal jou help om nie bekommerd te wees as jy of ’n gesinslid siek word, een van julle julle werk verloor of iets onverwags gebeur nie.

“Tyd en onverwagse gebeure tref [ons] almal.”– Prediker 9:11.

Wenke om geld te spaar

Maak meer etes by die huis.

Om dikwels uit te eet of om gereeld etes wat klaar voorberei is sowel as drankies te koop, kan duur wees. Selfs al vat dit tyd en moeite om kos by die huis te maak, kan dit jou baie geld spaar. Jy sal ook meer beheer hê oor die gehalte van jou etes.

Dink mooi oor wat jy moet koop.

Maak ’n lys van dinge om te koop en bly daarby. Probeer om nie dinge te koop wat jy nie beplan het om te koop nie.
As jou begroting dit toelaat, kan jy sekere dinge in grootmaat koop as dit goedkoper is om dit te doen. Maar maak seker dat jy bederfbare dinge veilig kan stoor sodat jy nie kos mors nie.
Oorweeg dit om goedkoper dinge te koop as die gehalte redelik is.
Koop aanlyn om beter pryse te vind, om te verhoed dat jy iets koop wat jy nie beplan het om in die winkel te koop nie en om aandag te skenk aan hoe jy jou geld spandeer. Kan jy probeer om aanlyn te koop as dit beskikbaar is waar jy bly?
Soek vir spesiale aanbiedinge waar dit beskikbaar is. Vergelyk pryse, insluitende die pryse van elektrisiteit, verhitting en water.

Dink mooi voordat jy die dinge vervang wat jy alreeds het.

Maatskappye wat selfone en ander produkte maak, maak heeltyd nuwe modelle om meer wins te maak. So stop en vra jouself af: ‘Sal dit my regtig bevoordeel om die nuutste model te koop? Is dit regtig nodig dat ek dit nou vervang? En as ek dit moet vervang, het ek regtig die nuutste model nodig?’

Herstel en hergebruik dinge.

Pas dinge soos jou yskas en stoof mooi op en herstel dit as dit moontlik is. Jy kan dit ook oorweeg om tweedehandse dinge te koop.

Kweek jou eie kos.

Probeer om jou eie kos te kweek. Buiten dat jy minder geld op inkopies sal spandeer, kan jy iets kweek wat jy kan ruil, verkoop of met ander kan deel.

“Die planne van hardwerkende mense lei tot sukses.”– Spreuke 21:5.

“Ons hou ’n ogie op die pryse van alledaagse dinge, en ons is versigtig oor hoe gereeld ons ons kredietkaarte gebruik.” – Miles, Engeland.

“Ek en my gesin maak altyd ’n lys van dinge wat ons nodig het voordat ons inkopies doen.” – Jeremy, VSA.

“Ons hou aan om seker te maak dat ons regtig kan bekostig wat ons beplan om te koop, en ons sit geld opsy vir onvoorsiene uitgawes.” – Yael, Israel.

“Ons het ons kinders geleer om dinge wat breek, reg te maak eerder as om nuwe dinge te koop. Dit sluit ons kar en dinge in ons huis in. Ek en my vrou probeer ook om nie die nuutste modelle te koop nie.” – Jeffrey, VSA.

“Ek het my uitgawes verminder deur my eie groente te kweek en met ’n paar hoenders te boer. Ek kan selfs van my groente met ander mense deel.” – Hono, Mianmar.

’n Man oes ’n verskeidenheid groente in ’n tuin.