Hoofstuk 18
Is jy lojaal aan die aarde se nuwe Koning?
1. Hoe het die skare gereageer toe Jesus hom in 33 G.J. as Koning bekend gestel het?
OP 9 NISAN van die jaar 33 G.J. het Jesus Christus hom aan die Jode bekend gestel as hulle Koning, die voorspelde Messias. Terwyl hy van die Olyfberg afgekom het onderweg na Jerusalem, het die skare dissipels hulle verheug en God geloof oor die kragtige dade wat Jesus verrig het (Lukas 19:37, 38; Sagaria 9:9). Maar sou hulle lojaal wees aan daardie Een wat hulle as Koning begroet het? Hulle lojaliteit is eerlank op die proef gestel.
2. (a) Hoe reageer baie mense vandag op die aankondiging dat Christus die aarde se nuwe Koning is? (b) Watter vrae verdien egter ons ernstige aandag?
2 Sedert 1914 word die verheerlikte Jesus Christus, wat daadwerklik uit die hemel regeer, aan die hele mensdom bekend gestel as die aarde se nuwe Koning. Die vooruitsig van lewe onder ’n regering in die hande van Christus, met ware oplossings vir die probleme van die mensdom, het mense uit al die nasies laat jubel. Maar sal hulle lojaal wees? Wat van elkeen van ons?
DIE KONING SE REPUTASIE VIR LOJALITEIT
3. (a) Waarom word daar van Jesus gepraat as die een wat aan Jehovah „lojaal” is? (b) Wat is lojaliteit?
3 Jesus Christus het onteenseglik bewys dat sy eie lojaliteit teenoor Jehovah, die Universele Soewerein, onwrikbaar is. Die Skrif praat tereg van hom as die een wat aan Jehovah „lojaal” is (Psalm 16:10, NW; Handelinge 2:24-27, NW). Die Hebreeuse woord vir „lojaliteit” wat hier gebruik word, bevat die gedagte van liefdevolle vriendelikheid. Dit is nie iets kouds wat bloot op die reg of geregtigheid gegrond is nie, maar spruit ook uit liefde en waardering.—Vergelyk Psalm 40:9; Johannes 14:31.
4, 5. (a) Hoe het Jesus ná Satan se opstand in die hemel getoon dat hy lojaal is? (b) Hoe het hy dieselfde lojaliteit op aarde getoon?
4 Toe Satan in die hemel begin het om vir homself eer te soek wat net God toegekom het en toe ander engele hulle behoorlike plekke in Jehovah se hemelse organisasie verlaat het, het God se eersgebore Seun nie hulle gees nagevolg nie. Dit was vir hom ondenkbaar! Die selfopofferende toewyding van hierdie lojale Seun was sodanig dat hy sy hemelse heerlikheid verlaat het, ’n mens geword het en selfs bereid was om aan ’n folterpaal te sterf om sy Vader se wil te doen. Hy het liefdevol gesorg dat, sover dit van hom afgehang het, geen besonderheid wat aangaande hom in die Skrif opgeteken is onvervuld sou bly nie.—Filippense 2:5-8, vergelyk NW; Lukas 24:44-48.
5 Terwyl Jesus op aarde was, het Satan groot druk op hom uitgeoefen om hom te laat afwyk van die werk wat God hom gegee het—om hom, indien moontlik, te verlok tot optrede wat daartoe sou lei dat God self sy Seun verwerp. Hy het Jesus aangespoor om dinge te doen wat hom aansien en mag sou gee—maar as deel van die wêreld waarvan Satan die owerste was. Jesus het geweier en uit die Heilige Skrif as sy rigsnoer aangehaal (Mattheüs 4:1-10). Jesus het sonderlinge vermoëns besit en hulle goed gebruik, maar altyd in ooreenstemming met sy Vader se wil. Hy het hom ten volle besig gehou met die werk wat God hom gestuur het om te doen (Johannes 7:16-18; 8:28, 29; 14:10). Wat ’n voortreflike voorbeeld van lojaliteit!
6. In watter opsig verg die beloning wat Jesus ontvang het lojaliteit van ons?
6 Weens Jesus se beproefde lojaliteit het Jehovah hom uit die dood opgewek, „Hom ook uitermate verhoog en Hom ’n naam gegee wat bo elke naam is, sodat in die Naam van Jesus sou buig elke knie . . . en elke tong sou bely dat Jesus Christus die Here is tot heerlikheid van God die Vader” (Filippense 2:9-11). Hierdie ‚naam wat bo elke naam is’, verteenwoordig die mag en gesag wat aan Jesus gegee is sodat hy Jehovah se wil kan volbring. Om ‚die knie voor hom te buig’, beteken dat ’n mens sy posisie erken en jou aan sy gesag onderwerp. Dit sluit in dat jy ’n lojale onderdaan van hom as Koning is.
LOJALE LIEFDE VIR JEHOVAH SE GESALFDES
7. In verband met watter sake word die lojaliteit van Jesus se volgelinge op die proef gestel?
7 Die feit dat Jesus ná sy hemelvaart nie meer vir mense-oë sigbaar was nie, sou tot deurdringende toetse van die lojaliteit van sy volgelinge lei. Sou hulle volgens die beginsels lewe wat hy hulle geleer het? Sou hulle afgeskeie van die wêreld bly? Sou hulle eerbied hê vir diegene wat deur heilige gees as opsieners aangestel is? Sou hulle heelhartig die werk doen wat hy aan hulle opgedra het?
8. Wat is afgeskadu deur die lojale liefde tussen Jonatan en Dawid?
8 Op die bestemde tyd sou die „ander skape” versamel en by die „klein kuddetjie” erfgename van die hemelse Koninkryk gevoeg word. Sou hulle waarlik hulle toegewese posisies voor Christus as koning en teenoor mekaar waardeer? Die feite toon dat daar opregte liefde ontstaan het onder almal wat deel uitmaak van die „een kudde” onder Jesus Christus. Dit is afgeskadu deur die onverbreeklike, ewige liefde van Jonatan, die seun van koning Saul, vir Dawid. Toe hy Dawid se heelhartige toewyding aan Jehovah en sy vertroue op God in die stryd teen die reus Goliat sien, was Jonatan diep geroer en het sy siel „verkleef geraak aan die siel van Dawid, en Jonatan het hom liefgekry soos sy eie siel”. Sy liefde het nie afgeneem toe dit duidelik geword het dat Jehovah die koningskap aan Dawid sou gee en nie aan Jonatan nie. Jonatan het selfs meermale sy lewe vir Dawid gewaag.—1 Samuel 17:45-47; 18:1; 23:16, 17.
9. Hoe het nie-Israeliete wat in Dawid se leër gedien het soortgelyke lojaliteit getoon?
9 Buiten Jonatan was daar ook nie-Israeliete wat hulle by Dawid gevoeg het. Hulle was nie huursoldate nie, maar dapper manne wat deur hulle toewyding aan Dawid as Jehovah se gesalfde beweeg is. Onder hulle was die Kreti (Keretiete) en die Pleti (Peletiete) asook voormalige inwoners van die Filistynse stad Gat. Hulle het lojaal by Dawid gebly toe sy seun Absalom op bedrieglike wyse probeer het om die hart van die manne van Israel te steel. Ondanks Absalom se aansien en geslepenheid het hulle hulle nie deur sy mooipraatjies op ’n weg van verraad laat lei nie.—2 Samuel 15:6, 10, 18-22.
10. (a) Hoe word die hegte verhouding tussen Christus, die gesalfde oorblyfsel en die „ander skape” in Psalm 45 beskryf? (b) In watter sin ‚gaan die vriendinne in die Koning se paleis in’?
10 Nog ’n roerende beskrywing van die verhouding tussen Christus, die gesalfde oorblyfsel en die „ander skape” word in Psalm 45 aangetref. Dit is nie net ’n pragtige gedig nie, maar ’n profesie oor die Messiaanse Koninkryk waarvan God self die „troon” is, dit wil sê, die fondament en steunpilaar van Jesus se koningskap (Psalm 45:2-8, NW; Hebreërs 1:8, 9, NW). Die psalmis beskryf die bruid van Christus, „die Koning se dogter”, wat op die huweliksdag na die Koning gebring word. Saam met haar is „jonkvroue . . . haar vriendinne”. Wie is hulle? Hulle is die persone wat daarna uitsien om aardse onderdane van God se Koninkryk te wees. „Met vreugde en gejuig” vergesel hulle die „bruid”-klas totdat die heel laaste lid van daardie klas met Christus in die hemel verenig is. Saam met daardie „bruid”-klas „gaan [hulle] in die Koning se paleis in”, nie deur hemel toe te gaan nie, maar deur hulleself vir die Koning se diens beskikbaar te stel. Het jy jou by daardie blye optog gevoeg?—Psalm 45:13-15.
WAT VEREIS LOJALITEIT VAN ONS?
11. Watter situasies toon of ons „van die wêreld” is of nie?
11 Talle situasies in die lewe toon watter soort persone ons is. Glo ons werklik aan Jehovah se Messiaanse Koninkryk? Is dit vir ons ’n werklikheid? Jesus het gesê dat sy ware volgelinge „nie van die wêreld” sou wees nie. Kan dit van jou gesê word?—Johannes 17:15, 16.
12. Op watter ander maniere kan ons bewys lewer van ons lojaliteit, al is ons onvolmaak?
12 In die geval van onvolmaakte mense vereis lojaliteit nie volmaaktheid nie. Maar dit vereis wel dat ons nie moedswillig Bybelgebooie verbreek nie, hetsy ander mense ons sien of nie. Dit sal ons beweeg om Bybelbeginsels ten volle te probeer toepas, in plaas daarvan om te kyk hoe naby ons aan die wêreld se weë kan kom. Dit sal ons opreg laat haat wat sleg is.—Psalm 97:10.
13. Hoe sal lojaliteit ons teen die mooipraatjies van afvalliges beskerm?
13 As ons waarlik haat wat sleg is, sal ons nie toelaat dat nuuskierigheid ons nader lok daaraan nie. Nuuskierigheid oor die lewe van seksueel onsedelike persone kan tot ons ondergang lei (Spreuke 7:6-23). Dit kan ook tot geestelike ondergang lei as ons lektuur sou koop en lees wat deur afvalliges uitgegee word, persone wat Jehovah en sy organisasie die rug toegekeer het en dan hulle voormalige metgeselle met woorde „slaan” (Mattheüs 24:48-51). Spreuke 11:9 (NW) waarsku: „Deur sy mond stort die een wat ’n afvallige is sy naaste in die verderf.” Maar lojaliteit sal ons beskerm sodat ons nie deur hulle mooipraatjies mislei word nie.—2 Johannes 8-11.
14. (a) Wat is een van die belangrikste maniere waarop ons ons lojaliteit teenoor Christus as Koning kan toon? (b) Waarom is hierdie werk so belangrik?
14 Een van die belangrikste maniere waarop ons lojaliteit kan toon, is deur heelhartig te wees in die werk wat Jesus sy dissipels geleer het om te doen. Hy het self die voorbeeld gestel deur van stad tot stad en van dorp tot dorp te gaan om die goeie nuus van die Koninkryk van God te verkondig (Lukas 8:1). Jesus het voorspel wat ware Christene vandag sou doen toe hy gesê het: „Hierdie evangelie van die koninkryk sal verkondig word in die hele wêreld tot ’n getuienis vir al die nasies; en dan sal die einde kom” (Mattheüs 24:14). Dit is deur middel van hierdie verkondiging van die goeie nuus dat mense in alle dele van die wêreld van die Koninkryksgeskil bewus gemaak word sodat hulle ’n persoonlike besluit kan neem. Vir ’n groot menigte sal daardie besluit tot behoud deur die groot verdrukking lei (Openbaring 7:9, 10). Neem jy lojaal aan hierdie dringende werk deel?
15. (a) Waaroor sal Jehovah se lojale dienaars, volgens Psalm 145:10-13, praat? (b) Hoe is dit op ons van toepassing?
15 Die psalmis Dawid het lank gelede geskryf: „Almal wat deur U geskep is, loof U, Here, en u troue dienaars [lojales, NW] prys U! Hulle vertel van u koninklike mag en getuig van u groot krag. Die mense moet weet van sy krag, van sy koninklike mag en majesteit. U koningskap is ’n koningskap vir alle tye, u heerskappy strek oor die geslagte heen” (Psalm 145:10-13, NAV). Daardie koningskap word nou uitgeoefen deur die Messiaanse Koninkryk in die lojale hande van Jesus Christus, en ons toon ons lojaliteit teenoor sowel God as Christus deur vrylik en geesdriftig daaroor te praat.
16. Watter invloed behoort lojaliteit te hê op die hoeveelheid Koninkryksprediking wat ons doen en die beweegrede waarmee ons dit doen?
16 Watter plek beklee hierdie werk om van die Koninkryk te getuig in jou lewe? Stel jy dit regtig bo ander strewes? Wat jy persoonlik doen, kan meer of minder wees as wat ander doen. Omstandighede verskil van individu tot individu. Maar ons kan ons almal met vrug vrae soos die volgende afvra: ‚Weerspieël my deelname ’n blote pligsgevoel, ’n offergawe ter wille van die vorm? Beskou ek dit eenvoudig as ’n vereiste vir oorlewing? Of beweeg liefde vir Jehovah, toewyding aan sy Messiaanse Koning en opregte besorgdheid oor my medemens my om dit eerste te stel sodat ander dinge in my lewe daaraan ondergeskik is?’ Lojaliteit sal ons na maniere laat soek om te toon dat hierdie werk vir ons net so belangrik is as wat dit vir ons Koning is.
17. Aan wie sal Jesus „vrede verkondig” wanneer hy die goddeloses vernietig?
17 Die Een wat deur sy jubelende dissipels as Koning begroet is toe hy Jerusalem in 33 G.J. binnegery het, sal binnekort almal vernietig wat Jehovah se soewereiniteit, soos uitgeoefen deur Sy Messiaanse Koning, verwerp. Maar hy sal „vrede verkondig” aan daardie „groot menigte” uit al die nasies wat sy eie voorbeeld van lojaliteit nagevolg het. Sal jy onder hulle wees?—Sagaria 9:10; Efesiërs 4:20-24.