Byeenkomste—’n tyd om bly te wees en God te loof
Van die vroeë 1880’s af het die Bybelstudente besef dat dit nuttig sou wees om, benewens plaaslike vergaderinge, ook hulle medegelowiges uit ander gebiede te leer ken. Daarom het hulle begin om jaarlikse byeenkomste van Bybelstudente van oor die hele Verenigde State en later ook van Kanada te reël. Dit was geleenthede van geestelike verkwikking; etlike dae lank is intensiewe Bybelonderrig verskaf, en almal het die wedersydse bemoediging geniet. Die doop van nuwe gelowiges het ’n gereelde kenmerk van byeenkomste geword. Byeenkomste is ook gebruik om ’n groter getuienis aan die publiek te gee.—Romeine 1:11, 12
Vandag hou Jehovah se Getuies gereeld byeenkomste. Gewoonlik word sowat 18 tot 25 gemeentes saamgegroepeer en vorm hulle ’n “kring”, en die kringe word deur reisende opsieners besoek, of bedien. Twee keer per jaar word byeenkomste gereël, en dan kom die gemeentes in ’n kring, of ’n deel van daardie kring, op ’n Saterdag en/of Sondag byeen.
Een keer per jaar word groter drie- of vierdaagse byeenkomste, bekend as streekbyeenkomste, in elke land gehou, en dan kan duisende by een plek saamtrek. Hierdie byeenkomste dien tot geestelike opbouing van Jehovah se Getuies en ander wat in hulle werksaamhede belangstel, en hulle lewer ook ’n getuienis aan die publiek.
Die program vir hierdie byeenkomste word deur die Bestuursliggaam van Jehovah se Getuies voorberei en word gegrond op die behoeftes van die Getuies wêreldwyd. Dit bestaan uit toesprake, besprekings en lewensware aanbiedings, ofte wel demonstrasies, wat deur reisende opsieners en bekwame Getuies uit gemeentes aangebied word. Verskillende verkondigers vertel ook ondervindinge oor hoe hulle dit regkry om as Christene in ’n goddelose wêreld te lewe of oor die resultate wat hulle in die bediening behaal. By streekbyeenkomste is daar ook iets anders—lewende opvoerings in die vorm van Bybeldramas of dramas met ’n hedendaagse agtergrond wat toon hoe Christene vandag probleme te bowe kom.
Maaltye en verversings word ook teen ’n klein bydrae verskaf. Dit bied die geleentheid vir aangename omgang wanneer die program nie aan die gang is nie. Al die werk wat aan hierdie byeenkomste verbonde is, word deur vrywilligers uit die geledere van Jehovah se Getuies gedoen. Die koste van die geriewe en ander uitgawes word deur vrywillige bydraes verhaal. Toegang is gratis, en geen kollektes word gehou nie.
Jy kan by die plaaslike gemeente van Jehovah se Getuies verneem wanneer en waar sulke byeenkomste in jou omgewing gehou gaan word. Hulle sal jou ook kan inlig oor enige vervoerreëlings en oor hoe om huisvesting te kry.
Hierdie byeenkomste help Jehovah se Getuies en almal wat met hulle omgaan om verder te sien as hulle eie gemeente en om die hele broederskap in die wêreld te waardeer.—1 Petrus 2:17.
• Watter voordele het die vroeë Bybelstudente uit hulle byeenkomste geput?
• Beskryf die reëling en program van kring- en streekbyeenkomste.
[Prente op bladsy 18]
Bybeldrama by streekbyeenkoms, Verenigde State
Internasionale byeenkoms, Pole
Internasionale byeenkoms, Argentinië
Kringbyeenkoms, Japan
Byeenkomsgangers kry Bybellektuur, Switserland
Dopery by internasionale byeenkoms, Suid-Afrika
Uitreiking van nuwe Bybelpublikasie, Kanada
Byeenkomsgangers sing saam, Spanje