Internasionale byeenkomste van Jehovah se Getuies

Die Bestuursliggaam van Jehovah se Getuies beplan internasionale byeenkomste gedurende 1998. Hierdie aankondiging is met groot geesdrif ontvang by die jaarvergadering van die Watch Tower Bible and Tract Society of Pennsylvania, wat Saterdag, 5 Oktober 1996 in die Jersey City-Byeenkomssaal gehou is.

Buiten die gewone streekbyeenkomste gaan ’n aantal internasionale byeenkomste teen die middel van 1998 in Noord-Amerika gehou word. Daar word verwag dat hierdie byeenkomste honderdduisende Getuies uit baie wêrelddele bymekaar sal bring. Sodat soveel lande moontlik verteenwoordig kan word, sal elk van die meer as 100 takkantore van die Wagtoringgenootskap ’n kwota afgevaardigdes na ’n spesifieke stad in Noord-Amerika kan stuur waar ’n internasionale byeenkoms gehou gaan word.

Natuurlik sal nie almal wat graag na Noord-Amerika wil gaan dit kan doen nie. Maar dit sal dalk vir duisende moontlik wees om ’n internasionale byeenkoms wat nader aan hulle gehou word by te woon. Reëlings word getref om internasionale byeenkomste in twee of drie lande in Europa sowel as in Afrika, Asië, Latyns-Amerika, die Stille Suidsee en die Karibiese streek te hou.

Op ’n gepaste tyd sal die Genootskap se takkantore gemeentes in hulle onderskeie gebiede in kennis stel van die byeenkomsstad of -stede waarheen hulle genooi is. Inligting sal verstrek word oor datums van die byeenkomste en reëlings om afgevaardigdes te kies. Diegene wat aansoeke wil invul om as afgevaardigdes gekies te word, wil dalk nou reeds van hulle geld begin spaar ter voorbereiding vir hierdie spesiale gebeurtenisse.

Al Jehovah se Getuies regoor die wêreld kan uitsien na wat hierdie internasionale byeenkomste in 1998 gaan inhou. Streekbyeenkomste in alle lande sal ’n soortgelyke program aanbied.