Hoofstuk 5
Verligting vir “die voleinding van die wêreld”
1. Watter merkwaardige huwelik het die “Vredevors” vir hierdie “voleinding van die wêreld” voorspel, en in watter gelykenis?
WAAR hy oor “die voleinding van die wêreld” gepraat het, het die “Vredevors” in Mattheüs 24:38 gesê dat mense ‘sou trou en in die huwelik sou uitgee’. Maar gedurende dieselfde tydperk begin die allergrootste huwelik in die hemel. Dit is die huwelik waarvan daar gepraat word in Jesus se gelykenis van tien lampdraers, tien maagde.—Mattheüs 24:3; 25:1-12.
2. (a) Hoe laat vind hierdie huwelik van die gelykenis plaas? (b) Wat volg op die huwelik, en hoe word verligting verskaf?
2 Hierdie huwelik speel hom in die Midde-Ooste af. Dit vind laat in die nag plaas en strek na middernag se kant toe. Die huwelik van die bruid en haar bruidegom vind eers plaas en word dan gevolg deur ’n optog na die feeshuis. Die weg word nie deur straatlampe verlig nie. Verligting word verskaf deur diegene wat aan die feestelike optog deelneem, en omstanders kan die optog dophou en die pasgetroudes geluk toewens.
3, 4. (a) Wie stel belang in die optog wat volg, en watter voorbereidings tref hulle? (b) Waarvan is die vervulling van hierdie gelykenis bykomende bewys? (c) Ons kan bly wees indien ons wat doen?
3 Getrou aan hulle vroulike neigings stel maagde in die huwelik belang. Tien maagde wag dus langs die roete van die optog totdat die huweliksprosessie hulle bereik. Hulle wil graag die geleentheid verhelder, en daarom bring hulle almal brandende handlampe saam, maar net vyf van hulle het ’n noodvoorraad olie. Hierdie vyf is verstandige maagde. Die vervulling van hierdie gelykenis behoort vandag vir ons van belang te wees, want volgens Jesus Christus bevestig dit net verder dat ons in die voleinding van hierdie ou stelsel lewe.—Mattheüs 25:13.
4 Ons kan bly wees as ons verstandig is en die verwesenliking van hierdie huwelik der huwelike en die aspekte wat daarmee gepaard gaan, onderskei! Wie word vandag tot die fees toegelaat? Enige van ons? Kom ons kyk!
5. Wat het ’n onderskeid getref tussen diegene wat die tien maagde uitmaak, en wat het gebeur terwyl die bruidegom getalm het?
5 Jesus se gelykenis van die tien maagde staan in verband met “die koninkryk van die hemele”, die wêreldregering wat die hele mensdom tot seën sal strek. Daarom het Jesus Christus voorts gesê: “Dan sal die koninkryk van die hemele wees soos tien maagde wat hulle lampe geneem en uitgegaan het om die bruidegom te ontmoet. En vyf van hulle was verstandig en vyf dwaas. En toe die wat dwaas was, hul lampe neem, het hulle geen olie met hulle saamgeneem nie. Maar die verstandiges het olie in hulle kanne saam met hul lampe geneem. En terwyl die bruidegom talm om te kom, het hulle almal vaak geword en aan die slaap geraak.”—Mattheüs 25:1-5.
6. (a) Wie het die tien maagde afgebeeld? (b) Waarom word ’n bruid nie in die gelykenis gemeld nie?
6 Wie het daardie tien maagde afgebeeld? Hulle het die aanstaande lede van die bruid van die geestelike Bruidegom, Jesus Christus, afgebeeld. Dit is ongetwyfeld waarom daar geen melding van ’n bruid in Jesus se gelykenis is nie; slegs die bruidegom maak sy verskyning. Daar bestaan gevolglik geen verwarring oor die verklaring, asof die maagde ’n bykomende klas afbeeld nie.
7. Gedurende watter tydperk het dit gelyk of die Bruidegom talm om die bruid te kom haal, en waarom?
7 Die aanstaande lede van die bruidsklas is nie aan die einde van “die tye van die nasies” in 1914 met hulle hemelse Bruidegom in die eg verbind soos daar verwag is nie (Lukas 21:24). Dit is logies dat dit vir hulle gelyk het asof die Bruidegom getalm het om te kom, hoewel sy teenwoordigheid in sy hemelse Koninkryk wel in 1914 begin het. Daardie droewige jare van die Eerste Wêreldoorlog was soos ’n pikdonker nag in die ondervinding van die maagdeklas.
8. (a) Hoe het die maagde, figuurlik gesproke, vaak geword en aan die slaap geraak? (b) Met watter doel het die Bruidegom na die tempel gekom, en waarom was dit vir die bruidsklas van belang?
8 Die maagde het, figuurlik gesproke, vaak geword en aan die slaap geraak. Die openbare verkondiging van die goeie nuus oor Christus se komende duisendjarige heerskappy tot die seën van die hele mensdom het feitlik doodgeloop. Vanaf die laaste jaar van die Eerste Wêreldoorlog het ’n kritieke oordeelstydperk vir daardie figuurlike maagde begin. Dit was omdat die heersende Koning Jesus Christus na die geestelike tempel gekom het. Met sy aankoms het hy met ’n oordeelswerk begin om diegene te reinig wat aangestel is om tempeldiens vir Jehovah God te verrig (Maleagi 3:1-3). Dit was die tyd vir sy verskyning wanneer hy, as die hemelse Bruidegom, die goedgekeurde lede van die bruidsklas wat reeds dood was by hom in die hemel sou ontvang.
9. Wanneer het die tyd aangebreek dat die maagdeklas uit onbedrywigheid gewek moes word, en waarom?
9 In 1919, na die vrylating van agt vooraanstaande lede van die Wagtoring- Bybel- en Traktaatgenootskap uit onregverdige gevangesetting, was dit die bestemde tyd vir die maagdeklas wat nog lewend op aarde was om uit hulle slaap van onbedrywigheid gewek te word. Die werk van wêreldwye verligting het voorgelê. Die tyd het vir hulle aangebreek om die Bruidegom, wat na die geestelike tempel gekom het, met aangesteekte lampe te ontmoet. Dit was sodat mense uit alle nasies kon stroom na “die huis van die HERE” wat as ’t ware bo die toppe van die berge verhef is.—Jesaja 2:1-4.
Hulle maak hulle lampe gereed
10. Wat het die olie wat uit die verstandige maagde se kanne gekom het, afgebeeld?
10 Die verstandige lede van die maagdeklas het ’n noodvoorraad brandstof in hulle kanne saamgebring. Dit het nie lank geduur om hulle lampe weer vol te maak nie. Die vloeibare brandstof vir verligting het Jehovah se insiggewende Woord en sy heilige gees voorgestel. Wat het die olie wat uit die verstandige maagde se kanne gekom het dan afgebeeld? Die reserwevoorraad van Jehovah se gees wat lig werp op sy geskrewe Woord en wat die gesalfde oorblyfsel geesverwekte dissipels van die Bruidegom in hulle gehad het toe die na-oorlogse werk van wêreldwye verligting in verband met “die koninkryk van die hemele” moes begin.
11. Wat was die simboliese kanne waarin die olie gehou is?
11 Die kanne het die figuurlike verstandige maagde self voorgestel as besitters van die simboliese olie van verligting. Dit wil nie sê dat die maagdeklas toe eers met Jehovah se gees gesalf is nie. Nee, die maagde salf nie hulself met sy gees nie. Hy doen dit!—Jesaja 61:1, 2; Lukas 4:16-21.
12. (a) Watter profesie van Joël sou ten opsigte van die verstandige maagde vervul word? (b) Wanneer het die tyd aangebreek vir hulle om deur middel van hulle lampe lig uit te straal?
12 Om die verstandige maagde te steun in die kolossale werk van wêreldverligting in verband met “die koninkryk van die hemele” wat aan hulle opgedra is, is hulle begunstig met die vervulling van Joël 2:28, 29 ten opsigte van hulle. Die apostel Petrus het daardie verse soos volg aangehaal: “En in die laaste dae, spreek God, sal Ek van my Gees uitstort op alle vlees, en julle seuns en julle dogters sal profeteer, en julle jongelinge sal gesigte sien, en julle ou mense sal drome droom” (Handelinge 2:17). Van 1919 af moes die verstandige lede van die figuurlike maagdeklas hulle verligtingsmiddele, hulle simboliese lampe—hulself—opneem. Hulle het dit gedoen om verligting te bring aan almal wat nog in geestelike duisternis verkeer het. As gevolg van die soort lewens wat hulle onder die invloed van God se Woord en gees lei, word hulle “ligte in die wêreld” (Filippense 2:15). So het hulle gevolglik begin om die voetstappe van die Bruidegom na te volg terwyl hy voorbereidings getref het om al die lede van die bruidsklas ná hulle dood op aarde na hom in die hemelse Koninkryk te neem.—Mattheüs 5:14-16.
Die gevolge van geestelike dwaasheid
13. Hoe het die verstandige maagde op die versoek van die dwase maagde gereageer?
13 Maar wat van die dwase lede van die maagdeklas? Jesus sê voorts: “Die wat dwaas was, sê aan die verstandiges: Gee vir ons van julle olie, want ons lampe gaan uit. Maar die verstandiges antwoord en sê: Miskien sal daar nie genoeg wees vir ons en vir julle nie. Maar gaan liewer na die verkopers en koop vir julleself.”—Mattheüs 25:8, 9.
14. Waarom was die maagde wat geweier het om hulle olie met die ander te deel verstandig eerder as selfsugtig?
14 Die wat geweier het om hulle olie met die dwase te deel, was nie selfsugtig nie, net verstandig. Hulle het getrou voortgegaan met die uitvoering van hulle oorspronklike, welmenende voorneme om die donker omgewing vir die Bruidegom te verlig. Hulle was geensins verplig om ’n kompromis aan te gaan, om hulle eie voorraad van Jehovah se heilige gees te verminder om diegene wat geestelik dwaas was tegemoet te kom nie. Sulke dwase het hulle nie voorberei om dadelik die diensvoorreg wat hulle in 1919 gebied is aan te gryp nie.
15. (a) Watter lede van die maagdeklas het neigings tot geestelike dwaasheid begin toon toe die vredestyd ingetree het? (b) Waarom kon die verstandige maagde nie die geestelik dwase maagde help nie?
15 Toe die vredestyd ingetree het, het sommige van die wat bely het dat hulle toegewyde, gedoopte metgeselle is, begin om geestelike dwaasheid te openbaar. Na die dood van die Wagtoringgenootskap se eerste president, Charles Taze Russell, het hulle nie saam met die sigbare instrument van Jehovah God onder die nuwe president, J. F. Rutherford, ten volle opgegaan in die gees van ontwikkelinge nie. Hulle harte het nie werklik saamgestem met die manier waarop dinge gedoen is nie. Hulle het ’n gebrek aan waardering getoon vir die wyse waarop Jehovah met sy volk gehandel het. Diegene wat soos verstandige maagde was, kon gevolglik nie hierdie dwase wat al hoe meer vervreemd geraak het, besiel met die ware gees van hartgrondige samewerking nie.
16. Hoe is geestelike dwaasheid aan die kant van die dwase maagde na die oppervlak gebring?
16 Geestelike dwaasheid is aldus na die oppervlak gebring. Hoe? Deur ’n versuim om die simboliese olie te hê op die betekenisvolle tyd toe daar ’n geweldige behoefte aan geestelike verligting bestaan het terwyl nuwe ontwikkelinge getoon het dat die Bruidegom teenwoordig was. Dit was dus die tyd om hom tegemoet te gaan met ’n helder verligte lamp, figuurlik gesproke. Maar in plaas daarvan het die wat ooreengekom het met die dwase maagde, wie se lampe besig was om dood te gaan, hulle van die verstandiges afgeskei.
17. Watter onherstelbare verlies ly diegene wat deur die dwase maagde afgebeeld word, soos getoon in Mattheüs 25:10?
17 Watter onherstelbare skade word tog gely wanneer iemand wat bely dat hy ’n deel van die maagdeklas is die eenmalige voorreg en kans verspeel om die geestelike Bruidegom, Jesus Christus, te verwelkom! Dit is so ’n verlies wat die dwase onder die hedendaagse maagde ly, soos getoon in die verdere woorde van Jesus se gelykenis: “Onderwyl hulle gaan om te koop, het die bruidegom gekom. En die wat gereed was, het saam met hom ingegaan na die bruilof, en die deur is gesluit.”—Mattheüs 25:10.
18. (a) Watter voorreg het die dwase maagde van hierdie eeu nie aangegryp nie? (b) Waarom is die dwase maagde te laat om deel te neem aan die huweliksoptog en om die feeshuis binne te gaan?
18 Watter tragiese ondervinding tog vir die hedendaagse dwase maagde! In hierdie allerdonkerste tydperk in die ganse mensegeskiedenis laat hulle na om deel te neem aan die werk om verligting te bring aan diegene wat in geestelike duisternis en in die skadu van die dood tydens “die oorlog van daardie groot dag van die almagtige God” sit! (Openbaring 16:14). Hulle is weg sonder olie in hulle figuurlike lampe om hulle weg te verlig, en moes hulle pad deur middernagtelike duisternis vind. Daarom is hulle nie betyds om die voetstappe van die Bruidegom in die vreugdevolle optog deur die deur en tot in die helder verligte huweliksfees na te volg nie. Hulle het hulle identifikasie verloor as sy volgelinge wat die geleentheid het om in die hemelse Koninkryk met hom te trou. Hulle was nie op die bestemde tyd “gereed” nie. Watter waarskuwende voorbeeld stel hulle tog!
19. Watter ervaring wag op ons as ons hierdie saak end-uit naspeur?
19 Hierdie pynlike feit word duidelik uitgebeeld in die laaste deel van die gelykenis wat deur Jesus Christus, die Bruidegom, vertel is, veral vir ons wat in “die voleinding van die wêreld” lewe. Kom ons gaan dus nou dieper op die saak in! Vreugdevolle verligting wag op ons as ons dit doen, soos ons in die volgende hoofstuk sal sien.
[Prent op bladsy 45]
Diegene wat met die dwase maagde ooreenkom, sal nie tot die huweliksfees toegelaat word nie