Jesus se lewe en bediening

Die verstandige en die dwase maagde

JESUS het sy apostels ’n antwoord gegee op hulle vraag oor ’n teken van sy teenwoordigheid in Koninkryksmag. Nou meld hy verdere aspekte van die teken in drie gelykenisse, of illustrasies.

Diegene wat gedurende sy teenwoordigheid lewe, sal die vervulling van elke gelykenis sien. Hy lei die eerste in met die woorde: “Dan sal die koninkryk van die hemele wees soos tien maagde wat hulle lampe geneem en uitgegaan het om die bruidegom te ontmoet. En vyf van hulle was verstandig en vyf dwaas.”

Met die uitdrukking ‘die koninkryk van die hemele sal soos tien maagde wees’, bedoel Jesus nie dat die helfte van diegene wat die hemelse Koninkryk beërwe dwaas is en dat die helfte verstandig is nie! Nee, maar hy bedoel dat daar ’n aspek in verband met die Koninkryk van die hemele is wat soos die een of die ander sal wees, of dat aangeleenthede in verband met die Koninkryk soos hierdie of daardie ding sal wees.

Die tien maagde simboliseer alle Christene wat vir die hemelse Koninkryk in aanmerking kom, of wat verklaar dat hulle daarvoor in aanmerking kom. Met Pinkster 33 G.J. is die Christengemeente as bruid vir die verrese, verheerlikte Bruidegom, Jesus Christus, belowe. Maar die huwelik sou op die een of ander onbepaalde tyd in die toekoms in die hemel plaasvind.

In die gelykenis gaan die tien maagde uit met die doel om die bruidegom te verwelkom en om hulle by die bruilofsprosessie aan te sluit. Wanneer hy kom, sal hulle die prosessieroete met hulle lampe verlig en hom sodoende vereer wanneer hy sy bruid na die huis bring wat vir haar voorberei is. Maar Jesus verduidelik: “Toe die wat dwaas was, hul lampe neem, het hulle geen olie met hulle saamgeneem nie. Maar die verstandiges het olie in hulle kanne saam met hul lampe geneem. En terwyl die bruidegom talm om te kom, het hulle almal vaak geword en aan die slaap geraak.”

Die lang oponthoud van die bruidegom dui aan dat Christus se teenwoordigheid as heersende Koning in die verre toekoms sou wees. Hy bestyg uiteindelik in 1914 die troon. Gedurende die lang nag waardeur dit voorafgegaan word, raak al die maagde aan die slaap. Maar hulle word nie hieroor veroordeel nie. Die dwase maagde word veroordeel omdat hulle nie olie vir hulle kanne het nie. Jesus verduidelik hoe die maagde wakker word voor die bruidegom opdaag:

“Middernag was daar ’n geroep: Daar kom die bruidegom; gaan uit hom tegemoet! Toe staan al daardie maagde op en maak hulle lampe gereed. En die wat dwaas was, sê aan die verstandiges: Gee vir ons van julle olie, want ons lampe gaan uit. Maar die verstandiges antwoord en sê: Miskien sal daar nie genoeg wees vir ons en vir julle nie. Maar gaan liewer na die verkopers en koop vir julleself.”

Die olie simboliseer dit wat ware Christene soos ligte laat skyn, naamlik die geïnspireerde Woord van God waaraan hulle stewig vashou, asook die heilige gees wat hulle help om daardie Woord te verstaan. Die geestelike olie stel die verstandige maagde in staat om hulle lig te laat skyn om die bruidegom gedurende die prosessie na die bruilofsfees te verwelkom. Maar die ‘dwase maagde’-klas het nie die nodige geestelike olie in hulleself, in hulle kanne, nie. Jesus beskryf dus wat gebeur:

“Onderwyl [die dwase maagde] gaan om [olie] te koop, het die bruidegom gekom. En die wat gereed was, het saam met hom ingegaan na die bruilof, en die deur is gesluit. Later kom toe die ander maagde ook en sê: Meneer, meneer, maak vir ons oop! Maar hy antwoord en sê: Voorwaar ek sê vir julle, ek ken julle nie.”

Nadat Christus in Sy hemelse Koninkryk aange kom het, het die ‘verstandige maagde’-klas van ware gesalfde Christene wakker geword ten opsigte van hulle voorreg om lig in hierdie donker wêreld te laat skyn tot lof van die teruggekeerde Bruidegom. Maar diegene wat deur die dwase maagde afgebeeld word, was nie voorberei om hierdie lof ter verwelkoming te voorsien nie. Wanneer die tyd dus aanbreek, maak Christus nie die deur tot die bruilofsfees in die hemel vir hulle oop nie. Hy laat hulle buite in die duisternis van die wêreld se donkerste nag om saam met alle ander werkers van wetteloosheid om te kom. “Waak dan”, sê Jesus ten slotte, “omdat julle die dag en die uur nie weet . . . nie.” Mattheüs 25:1-13.

◆ Wie word deur die tien maagde afgebeeld?

◆ Wanneer word die bruid aan die bruidegom belowe, maar wanneer kom hy om sy bruid na die bruilofsfees te neem?

◆ Wat stel die olie voor, en wat maak die besit hiervan vir die verstandige maagde moontlik?

◆ Waar vind die bruilofsfees plaas?

◆ Watter wonderlike beloning word die dwase maagde ontsê, en wat is hulle uiteinde?