Hoofstuk 10

Wat God gesweer het om vir die mensdom te doen is nou ophande!

1, 2. (a) In watter sin sweer God, en waarom? (b) Wat sê God in Jesaja 45:23? (c) Met watter verklarings van die profeet Jesaja moet ons kan saamstem?

SWEER God? Ja, God sweer, maar dit beteken nie dat hy vloek, in woede uitbars of sy selfbeheersing verloor nie. Wanneer hy sweer, is dit altyd om ’n deklarasie van sy voorneme te bekragtig. Dit gee verdere versekering aan diegene wat daardeur geraak word. Die hele mensdom kan dus gerus ag slaan op sy woorde in Jesaja 45:23: “Ek sweer by Myself; geregtigheid gaan uit my mond, ’n woord wat nie herroep word nie: dat voor My elke knie sal neerbuig, by My elke tong sal sweer.”

² Is ons vandag, meer as 2 700 jaar na daardie profesie, daarvan oortuig dat die profeet se verklaring in Jesaja 45:24 waar is: “Alleen in die HERE is volle geregtigheid en sterkte; na Hom sal hulle kom; maar hulle almal sal beskaamd staan wat op Hom toornig is”? Dan kan ons ook saamstem met Jesaja se volgende woorde in vers 25: “In die HERE sal geregverdig word en hulle beroem die hele geslag [“saad”, NW] van Israel.”

3, 4. (a) Waarom moet Jesaja 45:25 ons nie aan die Republiek van Israel laat dink nie? (b) Het Jesaja 45:23-25 enigsins onvervuld gebly, en waarom sê jy so?

³ Moet ons aan die Republiek van Israel dink wanneer ons Jesaja 45:25 lees? Nee! Daardie Israeli’s skryf nie hulle oorwinning aan die God van hulle heilige Hebreeuse Skrifte toe nie. As gevolg van misplaaste eerbied weier hulle selfs om sy naam uit te spreek.

⁴ Wil ons aldus voorgee dat Jesaja 45:23-25 tot vanjaar toe nog nie vervul is nie? Nee! Die profesie is op Jehovah se vasgestelde tyd vervul. Dit is onmoontlik dat sy profesie nie vervul sou word nie! Nie alleen is Jehovah se woord op sigself betroubaar nie, maar dit is nog te meer die geval wanneer Hy sweer, sy eed byvoeg, om sake te bevestig.

God waarborg dit met ’n eed

5. Hoe verklaar Hebreërs 6:13-18 waarom God die belofte aan Abraham met ’n eed gewaarborg het?

⁵ Ons lees hieromtrent in Hebreërs 6:13-18: “Want toe God aan Abraham die belofte gegee het, het Hy, omdat Hy by geen meerdere kon sweer nie, by Homself gesweer en gesê: Voorwaar, Ek sal jou ryklik seën en jou grootliks vermeerder. En so het hy die belofte verkry nadat hy geduldig gewag het. Want mense sweer by een wat meer is, en die eed van bevestiging is vir hulle die einde van alle teëspraak. Daarom het God, omdat Hy nog kragtiger aan die erfgename van die belofte die onveranderlikheid van sy raad wou toon, dit met ’n eed gewaarborg; sodat ons deur twee onveranderlike dinge, waarin dit onmoontlik is dat God sou lieg, kragtige bemoediging kan hê, ons wat ontvlug het, om vas te hou aan die hoop wat voorlê.”

6. (a) Watter beweegrede het God gehad om by homself te sweer in verband met sy belofte aan Abraham? (b) Hoe kon Jehovah sy “vriend” gebruik?

⁶ Daar is gewoonlik ’n kragtige beweegrede wanneer iemand sweer of ’n eed aflê. Dit is veral die geval wanneer God uit sy eie, vrywillig, sweer. Daar bestaan so ’n beweegrede in hierdie geval waarin Jehovah volgens berig gesweer het, ja, by homself gesweer het. Die beëdigde belofte wat Jehovah aan Abraham, sy “vriend”, gedoen het, raak ons vandag almal. Jehovah het dit op prys gestel toe Abraham volgens die goddelike uitnodiging opgetree en sy geboorteland verlaat het om na die land te gaan wat Jehovah as ’n besitting aan Abraham se afstammelinge sou gee. Jehovah kon met veiligheid die naam van hierdie “vriend” groot maak en hom gebruik om ander te seën. Jehovah kon tereg vir hom sê: “En Ek sal seën diegene wat jou seën, en hom vervloek wat jou vervloek; en in jou sal al die geslagte van die aarde geseën word.”—Genesis 12:3; Jesaja 41:8.

7. (a) Met watter wonderwerk het God Abraham begunstig toe sy vrou 90 jaar oud was? (b) Hoe het Abraham sy geloof en gehoorsaamheid op ’n unieke wyse getoon?

⁷ Toe Abraham se vrou, Sara, 90 jaar oud was, lankal verby die baarsame leeftyd, het God haar op wonderdadige wyse begunstig sodat sy hulle geliefde seun Isak vir Abraham gebaar het ter bevordering van Sy wonderlike belofte aan Abraham. Abraham was gereed en bereid om selfs hierdie kosbare seun as ’n menseoffer te bring uit gehoorsaamheid aan die bevel van sy God, Jehovah. Hierdie unieke blyk van geloof en gehoorsaamheid het Jehovah so geroer dat hy aan sy “vriend” Abraham gesê het:

8, 9. (a) Hoe het Jehovah op hierdie blyk van Abraham se geloof en gehoorsaamheid gereageer? (b) Aan wie het God homself verantwoordelik gemaak?

⁸ “Ek sweer by Myself, spreek die HERE, omdat jy dit gedoen het en jou seun, jou enigste, nie teruggehou het nie, dat Ek jou ryklik sal seën en jou nageslag grootliks sal vermeerder soos die sterre van die hemel en soos die sand wat aan die seestrand is; en jou nageslag sal die poort van sy vyande in besit neem. En in jou nageslag [“saad”, NW] sal al die nasies van die aarde geseën word, omdat jy na my stem geluister het.”—Genesis 22:15-18.

⁹ Dit is die eerste plek in die Bybel waar daar berig word dat Jehovah gesweer het. Omdat hy by niemand hoër kon sweer nie, het hy by homself gesweer en homself sodoende daartoe verbind. Op dié manier het hy homself verantwoordelik gemaak aan niemand buiten homself nie. Dit moet tot sy eie eer strek dat hy sy deklarasie van voorneme uitvoer.

In watter mate?

10. Ongeveer hoe lank gelede het God sy verbond met Abraham gesluit, en watter vraag ontstaan gevolglik?

¹⁰ Abraham het die beloofde land Kanaän om en by 4 000 jaar gelede binnegegaan. In watter mate is daardie verbond wat in 1943 v.G.J. gesluit is dus teen hierdie tyd nagekom?

11. (a) Wat toon die Republiek van Israel se lidmaatskap van die VV, en met watter gevolge vir hom? (b) Voldoen die natuurlike afstammelinge van Abraham aan die vereistes om die beloofde “saad” te wees?

¹¹ Vandag bestaan die Republiek van Israel in die Midde-Ooste. Uit eiebelang is dit ’n lid van die Verenigde Volke. Die VV verteenwoordig die verwerping van die Koninkryk van Jehovah God in die hande van die beloofde “saad” van Abraham en sal gevolglik vernietig word in “die oorlog van daardie groot dag van die almagtige God”, Armageddon. Elke lid van die VV, onder meer die Republiek van Israel, sal uitgewis word. Ongelukkig voldoen die vleeslike, natuurlike afstammelinge van Abraham nie aan die vereistes om die beloofde Messiaanse “saad” te wees waardeur Jehovah God die ganse mensdom gaan seën nie.—Openbaring 16:14-16.

12, 13. (a) Waarom gaan die “Vredevors” nie soos sy voorvader Dawid alleen regeer nie? (b) Moes gesalfde Christene wag totdat die Koninkryk in 1914 opgerig is om die beloofde seën te ontvang, en hoe weet ons dit?

¹² Dit is duidelik genoeg vir almal om te sien dat die beloofde Messias nie in die Midde-Oosterse, aardse Jerusalem heers ter vervulling van die Abrahamitiese verbond nie. Anders as sy voorvader Dawid van die ou tyd gaan die Messias en “Vredevors” nie alleen regeer nie. Hy het beloof om sy 12 getroue apostels en sy ander geesverwekte dissipels, altesaam 144 000, sy medeheersers te maak (Openbaring 7:1-8; 14:1-4). Daar is nog ’n oorblyfsel van sulke dissipels op aarde. Wat is vir hulle gedoen om die Abrahamitiese verbond waaroor God gesweer het nader aan vervulling te bring? Een van diegene wat ’n vername, aanstaande medeheerser in daardie Koninkryk was, naamlik die apostel Paulus, het in Galasiërs 3:8 geskryf: “Die Skrif wat vooruit gesien het dat God die heidene uit die geloof sou regverdig, het vooraf aan Abraham die evangelie verkondig met die woorde: In jou sal al die volke geseën word.”

¹³ Dit was nie vir die Christene wat uit die nasies gekies is nodig om tot ná die oprigting van die Koninkryk in 1914 te wag om die beloofde seën te ontvang nie, want die apostel Paulus het voorts gesê: “Sodat die wat uit die geloof is, geseën word saam met die gelowige Abraham” (Galasiërs 3:9). Paulus was ’n Christen en is geseën, en so ook al die ander geesverwekte Christene van sy dag.a Die oorblyfsel, wat bestaan uit geesverwekte Christene wat geloof stel in die Messias as die vernaamste lid van die “saad” van Abraham wat die hele mensdom tot seën sal strek, ondervind eweneens vandag die beloofde seën.

14. (a) Hoe is die gesalfde Christene besonder geseënd kragtens die Abrahamitiese verbond? (b) Hoe het dit Jehovah geregverdig?

¹⁴ Deur hulself aan Jehovah toe te wy en hierdie toewyding deur waterdoop te simboliseer en dan deur die gees van God tot ’n geestelike staat verwek te word, het hierdie Christene geestelike kinders van die Grotere Abraham, Jehovah God, geword. Hulle het ook die mede-erfgename van Jesus Christus, die Grotere Isak, geword (Romeine 8:17). Kragtens die Abrahamitiese verbond is hulle inderdaad besonder geseënd. Jehovah is besig om sy eed na te kom, en aldus regverdig hy homself as Iemand wat die waarheid praat, Iemand wat volkome in staat is om te doen wat hy plegtig in sy eie naam gesweer het om te doen.

15. Wat sê die apostel Paulus is elke lid van die oorblyfsel van geesverwekte Christene?

¹⁵ Elke lid van die oorblyfsel van geesverwekte Christene is ’n Jood in ’n geestelike sin. Die apostel Paulus het gesê: “Nie hý is ’n Jood wat dit in die openbaar is nie, en nie dít is besnydenis wat dit in die openbaar in die vlees is nie; maar hy is ’n Jood wat dit in die verborgene is, en besnydenis is dié van die hart, in die gees, nie na die letter nie.”—Romeine 2:28, 29.

16. Watter klas wat in Sagaria 8:23 voorspel is, maak die geestelike Jode uit?

¹⁶ In hierdie “voleinding van die wêreld” maak daardie geesverwekte Christene, wat innerlik Jode met ’n besnydenis van die hart is, die Jode-klas uit wat in Sagaria 8:23 voorspel is, waar daar geskryf staan: “So sê die HERE van die leërskare: In dié dae sal tien man uit al die tale van die nasies die slip van ’n Joodse man gryp en dit vashou en sê: Ons wil met julle saamgaan, want ons het gehoor dat God met julle is.”

17. (a) Wie word voorgestel deur die “tien man” wat Jehovah saam met die hedendaagse oorblyfsel van die geestelike Jode wil aanbid? (b) Wat geniet die “ander skape” nou deur met die geestelike Jode in die aanbidding van Jehovah om te gaan?

¹⁷ Die “julle” saam met wie daardie “tien man” Jehovah God wil aanbid, is die hedendaagse oorblyfsel van diegene wat geestelike Jode is, die klas wat “die getroue en verstandige dienskneg” van Mattheüs 24:45-47 uitmaak. Aangesien die getal tien aardse volkomenheid voorstel, stel die “tien man uit al die tale van die nasies” al die simboliese skape voor wat in Mattheüs 25:32-46 voorspel is. Dit is die “ander skape”-klas wat Jesus gesê het hy met die oorblyfsel sal laat omgaan sodat hulle “een kudde” sou uitmaak in die sorg van die “een herder”, hyself (Johannes 10:16). So kry hulle ’n voorsmaak van die seëninge van die Abrahamitiese verbond deur middel van die “saad” van die Grotere Abraham, Jehovah God. Die dinge wat God gesweer het om vir die hele mensdom te doen, is dus beslis ophande!

[Voetnoot]

[Prent op bladsy 89]

Die Bybel het voorspel dat mense uit alle nasies met geestelike Israel sou omgaan