Hoofstuk 1

Boodskappe vanuit die hemel

DIE hele Bybel is in werklikheid ’n boodskap vanuit die hemel wat ons hemelse Vader vir ons onderrigting voorsien het. Maar sowat 2 000 jaar gelede is twee spesiale boodskappe oorgedra deur ’n engel wat “voor God staan”. Sy naam is Gabriël. Kom ons kyk na die omstandighede van daardie twee belangrike besoeke aan die aarde.

Dit is die jaar 3 v.G.J. In die heuwels van Judea, waarskynlik nie te ver van Jerusalem af nie, woon ’n priester van Jehovah genaamd Sagaria. Hy en sy vrou Elisabet is albei al bejaard. En hulle het geen kinders nie. Sagaria neem sy beurt waar vir priesterlike diens in God se tempel in Jerusalem. Skielik verskyn Gabriël aan die regterkant van die reukofferaltaar.

Sagaria is baie bang. Maar Gabriël stil sy vrese en sê: “Moenie vrees nie, Sagaria, want jou gebed is verhoor, en jou vrou Elisabet sal vir jou ’n seun baar, en jy moet hom Johannes noem.” Gabriël sê verder Johannes “sal groot wees voor die Here” en “sal vir die Here ’n toegeruste volk . . . berei”.

Maar Sagaria kan dit nie glo nie. Dit lyk onmoontlik dat hy en Elisabet op hulle ouderdom ’n kind kan hê. Daarom sê Gabriël vir hom: “Jy sal swyg en nie kan praat tot op die dag dat hierdie dinge gebeur, omdat jy my woorde . . . nie geglo het nie.”

Wel, intussen wonder die mense buite waarom Sagaria so lank in die tempel bly. Toe hy uiteindelik uitkom, kan hy nie praat nie, maar slegs met sy hande beduie, en hulle besef dat hy iets bonatuurliks gesien het.

Sagaria keer terug huis toe nadat sy tempeldienstyd verstryk het. En kort daarna gebeur dit werklik—Elisabet raak swanger! Terwyl sy wag dat haar kind gebore word, sonder Elisabet haar vyf maande lank van mense af.

Later verskyn Gabriël weer. En met wie praat hy? Dit is met ’n jong, ongetroude vrou genaamd Maria van die dorp Nasaret. Watter boodskap dra hy hierdie keer oor? Luister! “Jy het genade by God gevind”, sê Gabriël vir Maria. “Kyk, jy sal swanger word en ’n Seun baar, en jy moet Hom Jesus noem.” Gabriël sê voorts: “Hy sal groot wees en die Seun van die Allerhoogste genoem word; . . . en Hy sal koning wees oor die huis van Jakob tot in ewigheid, en aan sy koninkryk sal daar geen einde wees nie.”

Ons kan seker wees dat Gabriël dit ’n voorreg geag het om hierdie boodskappe oor te dra. En wanneer ons meer oor Johannes en Jesus lees, sal ons duideliker sien presies waarom hierdie boodskappe vanuit die hemel so belangrik is. 2 Timotheüs 3:16; Lukas 1:5-33.

▪ Watter twee belangrike boodskappe word vanuit die hemel oorgedra?

▪ Wie dra die boodskappe oor, en aan wie word hulle oorgedra?

▪ Waarom is die boodskappe so moeilik om te glo?