Jesus se lewe en bediening

Boodskappe vanuit die hemel

DIE hele Bybel is in werklikheid ’n boodskap vanuit die hemel, daar ons hemelse Vader dit vir ons onderrig voorsien het. Maar sowat 2 000 jaar gelede is twee spesiale boodskappe afgelewer deur ’n engel wat „voor God staan”. Sy naam is Gabriël. Kom ons kyk na die omstandighede van daardie twee belangrike besoeke aan die aarde.

Dit is die jaar 3 v.G.J. In die heuwels van Judea, waarskynlik nie te ver van Jerusalem af nie, woon ’n priester van Jehovah genaamd Sagaria. Hy en sy vrou Elisabet is albei bejaard. En hulle het geen kinders nie. Sagaria neem sy beurt vir priesterlike diens in God se tempel in Jerusalem waar. Skielik verskyn Gabriël aan die regterkant van die reukofferaltaar.

Sagaria is baie bang. Maar Gabriel stil sy vrese en sê: ,God het jou gebede verhoor. Elisabet sal ’n seun hê, en jy moet hom Johannes noem. Hy sal vir Jehovah ’n toegeruste volk berei.’ Maar Sagaria kan dit nie glo nie. Dit lyk onmoontlik dat hy en Elisabet op hulle ouderdom ’n kind kan hê. Gabriël sê dus: ,Omdat jy my nie geglo het nie, sal jy stom wees totdat hierdie dinge gebeur.’

Wel, intussen wonder die mense buite waarom Sagaria so lank in die tempel bly. Toe hy uiteindelik uitkom, kan hy nie praat nie, maar slegs met sy hande beduie, en hulle besef dat hy iets bonatuurliks gesien het. Sagaria keer terug huis toe nadat sy tempeldienstyd verstryk het. En kort daarna gebeur dit werklik​—Elisabet word swanger! Terwyl sy wag dat haar kind gebore word, sonder Elisabet haar vyf maande lank van mense af.

Kyk! Gabriël verskyn weer. En met wie praat hy? Dit is met ’n jong, ongetroude vrou genaamd Maria van die dorp Nasaret. Watter boodskap dra hy hierdie keer oor? Luister! ,Jy sal swanger word en ’n seuntjie hê en jy moet hom Jesus noem’, sê Gabriël. ,Hy sal ’n groot koning wees, en sy koninkryk sal vir ewig staan.’

Ons kan seker wees dat Gabriël dit ’n voorreg geag het om daardie boodskappe oor te dra. En wanneer ons in toekomstige nommers van hierdie tydskrif meer oor Johannes en Jesus lees, sal ons duideliker sien presies waarom hierdie boodskappe vanuit die hemel so belangrik is. 2 Timotheüs 3:16; Lukas 1:5-33.

♦ Watter twee belangrike boodskappe was daar vanuit die hemel?

♦ Wie het die boodskappe afgelewer en aan wie is dit oorgedra?

♦ Waarom was die boodskappe so moeilik om te glo?