Hoofstuk 9

Jesus se vroeë gesinslewe

TERWYL Jesus in Nasaret grootword, is dit ’n klein, onbelangrike dorpie. Dit is geleë in die heuwelland van ’n gebied wat Galilea genoem word, nie ver van die pragtige Jisreëlvallei nie.

Wanneer Josef en Maria Jesus, moontlik sowat twee jaar oud, van Egipte af hierheen bring, is hy blykbaar Maria se enigste kind. Maar nie lank nie. Mettertyd word Jakobus, Joses, Simon en Judas gebore, en Maria en Josef het ook dogters. Uiteindelik het Jesus minstens ses jonger broers en susters.

Jesus het ook ander familielede. Ons weet reeds van sy ouer neef Johannes wat ver daarvandaan in Judea bly. Maar nader, in Galilea, woon Salome, wat blykbaar Maria se suster is. Salome is getroud met Sebedeüs, derhalwe sal hulle twee seuns, Jakobus en Johannes, Jesus se neefs wees. Ons weet nie of Jesus veel tyd saam met hierdie seuns deurbring terwyl hy grootword nie, maar later word hulle intieme metgeselle.

Josef moet baie hard werk om sy groeiende gesin te versorg. Hy is ’n timmerman. Omdat Josef Jesus as sy eie seun grootmaak, word Jesus “die seun van die timmerman” genoem. Josef leer Jesus om ook ’n timmerman te wees, en hy leer fluks. Dit is waarom mense later van Jesus vra: “Is Hy nie die timmerman . . . nie?”

Die lewe van Josef se gesin draai om die aanbidding van Jehovah God. In ooreenstemming met God se Wet gee Josef en Maria hulle kinders geestelike onderrig ‘wanneer hulle in die huis sit en wanneer hulle op pad is, wanneer hulle gaan lê en wanneer hulle opstaan’. Daar is ’n sinagoge in Nasaret, en ons kan seker wees dat Josef sy gesin ook gereeld soontoe neem om daar te aanbid. Maar hulle put ongetwyfeld die grootste vreugde uit gereelde reise na Jehovah se tempel in Jerusalem. Mattheüs 13:55, 56; 27:56; Markus 15:40; 6:3; Deuteronomium 6:6-9.

▪ Ten minste hoeveel jonger broers en susters het Jesus, en wat is party van hulle se name?

▪ Wie is drie bekende neefs van Jesus?

▪ Watter ambag beoefen Jesus uiteindelik, en waarom?

▪ Watter noodsaaklike onderrig gee Josef sy gesin?