Jesus se lewe en bediening

Jesus se vroeë gesinslewe

NASARET, waar Jesus grootword, is ’n onbelangrike dorpie. Dit is geleë in die rûensveld van ’n gebied wat Galilea genoem word, nie ver van die pragtige Jisreël-vallei nie.

Wanneer Josef en Maria Jesus, moontlik sowat twee jaar oud, van Egipte af hierheen bring, is hy skynbaar Maria se enigste kind. Maar nie lank nie. Mettertyd word Jakobus, Joses, Simon en Judas gebore, en Maria en Josef het ook dogters. Uiteindelik het Jesus minstens ses jonger broers en susters.

Jesus het ook ander familielede. Ons weet reeds van sy ouer neef Johannes, wat ver daarvandaan in Judea bly. Maar nader, in Galilea, woon Salome, wat blykbaar Maria se suster is. Salome is getroud met Sebedeüs, derhalwe sou hulle twee seuns, Jakobus en Johannes, Jesus se neefs wees. Ons weet nie of Jesus veel tyd saam met hierdie seuns deurgebring het terwyl hy grootgeword het nie, maar soos ons sal sien, het hulle later intieme metgeselle geword. Josef moet baie hard werk om sy groeiende gesin te versorg. Hy is ’n timmerman. Omdat Josef Jesus as sy eie seun grootmaak, word Jesus ‘die seun van die timmerman’ genoem. Josef leer Jesus om ook ’n timmerman te wees, en hy leer fluks. Dit is waarom mense later van Jesus sê: ‘Hy is die timmerman.’

Die lewe van Josef se gesin draai om die aanbidding van Jehovah God. In ooreenstemming met God se wet gee Josef en Maria hulle kinders geestelike onderrig ‘wanneer hulle in die huis sit en wanneer hulle op pad is, wanneer hulle gaan lê en wanneer hulle opstaan’. Daar is ’n sinagoge in Nasaret, en ons kan daarvan seker wees dat Josef sy gesin ook gereeld soontoe neem om daar te aanbid. Maar hulle put ongetwyfeld die grootste vreugde uit gereelde reise na Jehovah se tempel in Jerusalem, soos ons in ons volgende artikel sal sien. Mattheüs 13:55, 56; 27:56; Markus 15:40; 6:3; Deuteronomium 6:6-9.

♦ Hoeveel jonger broers en susters het Jesus gehad, en wat was party van hulle se name?

♦ Wie was drie bekende neefs van Jesus?

♦ Wat was Jesus se sekulêre werk?