Hoofstuk 10

Reise na Jerusalem

DIT is nou lente. En die tyd het aangebreek vir Josef se gesin om saam met vriende en familie hulle jaarlikse lentereis na Jerusalem te onderneem om die Pasga te vier. Daar is soos gewoonlik groot opgewondenheid wanneer hulle op die reis van sowat 100 kilometer vertrek. Jesus is nou 12 jaar oud, en hy sien met besondere belangstelling na die fees uit.

Vir Jesus en sy gesin is die Pasga nie net ’n eendaagse geleentheid nie. Hulle bly ook vir die sewedaagse Fees van die Ongesuurde Brode wat daarop volg, wat hulle as deel van die Pasgaseisoen beskou. Gevolglik duur die hele reis van hulle tuisdorp Nasaret af, tesame met die verblyf in Jerusalem, ongeveer twee weke. Maar weens ’n voorval waarby Jesus betrokke is, duur dit vanjaar langer.

Die probleem kom aan die lig tydens die terugreis van Jerusalem af. Josef en Maria aanvaar dat Jesus tussen die familielede en vriende is wat saamreis. Maar toe hulle vir die nag uitspan, kan hulle hom nog nie kry nie, en hulle gaan soek hom onder hulle reisgenote. Daar is geen spoor van hom nie. Daarop gaan Josef en Maria die hele pad terug na Jerusalem toe om hom te soek.

Hulle soek ’n hele dag lank, maar sonder welslae. Op die tweede dag kry hulle hom ook nie. Uiteindelik, op die derde dag, gaan hulle na die tempel. Daar, in een van die sale, sien hulle Jesus tussen die Joodse leraars sit, besig om na hulle te luister en hulle uit te vra.

“Kind, waarom het jy so met ons gemaak?” vra Maria. “Jou vader en ek het jou met angs gesoek.”

Jesus is verbaas dat hulle nie geweet het waar om hom te kry nie. “Waarom moes julle na my gaan soek?” vra hy. “Het julle nie geweet dat ek in die huis van my Vader moet wees nie?”—NW.

Jesus kan nie verstaan waarom sy ouers dit nie weet nie. Daarna gaan Jesus saam met sy ouers terug huis toe en bly hy onderdanig aan hulle. Hy neem toe in wysheid en fisieke grootte en ook in guns by God en die mense. Ja, Jesus stel van sy kinderdae af ’n goeie voorbeeld, nie net deur geestelike belange na te streef nie, maar ook deur sy ouers te eerbiedig. Lukas 2:40-52; 22:7.

▪ Watter reis onderneem Jesus gereeld in die lente saam met sy gesin, en hoe lank duur dit?

▪ Wat gebeur gedurende die reis wanneer Jesus 12 jaar oud is?

▪ Watter voorbeeld stel Jesus vir kinders van vandag?