Hoofstuk 20

Die tweede wonderwerk in Kana

WANNEER Jesus ná ’n uitgebreide predikingsveldtog in Judea na sy tuisgebied terugkeer, is dit nie om te rus nie. Hy begin eerder met ’n selfs groter bediening in Galilea, die landstreek waar hy grootgeword het. Maar pleks dat sy dissipels by hom bly, gaan hulle terug na hul gesinne en hul vorige beroepe.

Watter boodskap begin Jesus verkondig? Dít: “Die koninkryk van God het naby gekom; bekeer julle en glo die evangelie.” En die reaksie? Die Galileërs verwelkom Jesus. Hy geniet die agting van almal. Die rede hiervoor is egter nie soseer sy boodskap nie, maar eerder dat baie van hulle maande tevore by die Pasga in Jerusalem was en die merkwaardige tekens gesien het wat hy gedoen het.

Jesus begin klaar-blyklik sy groot Ga-lilese bediening in Kana. Jy onthou dalk dat hy vroeër, toe hy van Judea af teruggekom het, by ’n bruilof in Kana water in wyn verander het. By hierdie tweede geleentheid is die kind van ’n regeringsamptenaar van koning Herodes Antipas baie siek. Wanneer die amptenaar hoor dat Jesus van Judea na Kana gekom het, reis hy van sy huis in Kapernaüm af soontoe om Jesus te vind. Baie bedroef smeek die man: ‘Kom asseblief dadelik, voordat my kind sterwe.’

Jesus antwoord: ‘Gaan huis toe. Jou seun is genees!’ Herodes se amptenaar glo hom en pak die lang reis huis toe aan. Terwyl hy nog op pad is, kom sy diensknegte hom tegemoet om vir hom te sê dat alles in orde is—sy seun het herstel! ‘Wanneer het hy beter geword?’ vra hy.

‘Gister om 1:00 nm.’, antwoord hulle.

Die amptenaar besef dat dit die uur was waarop Jesus gesê het: ‘Jou seun is genees!’ Daarna word die man en sy hele huisgesin dissipels van Christus.

Kana is derhalwe begunstig as die plek waar Jesus twee keer wonderwerke gedoen het om sy terugkeer uit Judea aan te kondig. Dit is natuurlik nie die enigste wonderwerke wat hy tot dusver gedoen het nie, maar hulle is betekenisvol omdat hulle sy terugkeer na Galilea aangedui het.

Jesus gaan nou terug na sy huis in Nasaret. Wat wag daar op hom? Johannes 4:43-54; Markus 1:14, 15; Lukas 4:14, 15.

▪ Wat gebeur met Jesus se dissipels wanneer hy na Galilea terugkeer, en hoe ontvang die mense hom?

▪ Watter wonderwerk doen Jesus, en watter uitwerking het dit op diegene wat daarby betrokke is?

▪ Hoe word Kana dus deur Jesus begunstig?