Jesus se lewe en bediening
Die tweede wonderwerk in Kana
WANNEER Jesus ná uitgebreide predikingswerk in Judea na sy tuisomgewing terugkeer, is dit nie om te rus nie. Hy begin eerder met ’n selfs groter bediening in Galilea, die land waar hy grootgeword het. Sy dissipels bly egter nie by hom nie. Hulle gaan terug na hul gesinne en hul vorige beroepe.
Watter boodskap begin Jesus verkondig? Dit: “Die koninkryk van God het naby gekom; bekeer julle en glo die evangelie.” En die reaksie? Die Galileërs verwelkom Jesus. Hy word deur almal geëer. Die rede hiervoor is nie soseer sy boodskap nie, maar eerder dat baie van hulle maande tevore by die Paasfees in Jerusalem was en die merkwaardige tekens gesien het wat hy gedoen het.
Jesus begin klaarblyklik sy groot Galilese bediening in Kana. Jy sal onthou dat hy vroeër, toe hy van Judea af gekom het, by ’n bruilof in Kana water in wyn verander het. By hierdie tweede geleentheid is ’n kind van ’n regeringsamptenaar van koning Herodes Antipas baie siek. Wanneer die amptenaar hoor dat Jesus van Judea na Kana gekom het, reis hy van sy huis in Kapernaüm af soontoe om hom te vind. Baie bedroef smeek hy: ‘Kom asseblief dadelik, voordat my kind sterwe.’
Jesus antwoord: ‘Gaan huis toe. Jou seun lewe!’ Herodes se amptenaar glo hom en pak die lang rit huis toe aan. Terwyl hy nog op pad is, kom sy diensknegte hom tegemoet om vir hom te sê dat alles in orde is—sy seun het herstel! ‘Wanneer het hy beter geword?’ vra hy.
‘Gister om 1:00 nm.’, antwoord hulle.
Die amptenaar besef dat dit die uur was waarop Jesus gesê het: ‘Jou seun lewe!’ Daarna word die man en sy hele huisgesin dissipels van Christus.
Kana is derhalwe begunstig as die plek waar Jesus twee keer wonderwerke gedoen het om sy terugkeer uit Judea aan te kondig. Dit is natuurlik nie die enigste wonderwerke wat hy tot op hierdie tyd gedoen het nie, maar hulle is betekenisvol omdat hulle sy terugkeer na Galilea gekenmerk het.
Jesus gaan nou terug na sy huis in Nasaret. Wat wag daar op hom? Johannes 4:43-54; Markus 1:14, 15; Lukas 4:14, 15.
♦ Wat gebeur met Jesus se dissipels wanneer hy na Galilea terugkeer, en hoe ontvang die mense hom?
♦ Watter wonderwerk doen Jesus en hoe raak dit diegene wat daarby betrokke is?
♦ Hoe word Kana dus deur Jesus begunstig?
[Volbladillustrasie op bladsy 8]