Deel 10
Die wonderlike nuwe wêreld wat God tot stand gaan bring
1, 2. Wat sal gebeur nadat die oorlog van Armageddon die aarde gereinig het?
WAT sal gebeur nadat God se oorlog van Armageddon die aarde gereinig het? Dan sal ’n glorieryke nuwe era begin. Die oorlewendes van Armageddon, wat reeds hulle lojaliteit aan God se heerskappy bewys het, sal in die nuwe wêreld ingelei word. Wat ’n opwindende nuwe tydperk in die geskiedenis sal dit tog wees wanneer wonderlike seëninge van God na die mensdom voortvloei!
2 Die oorlewendes sal onder die leiding van God se Koninkryk ’n paradys begin skep. Hulle sal hulle kragte inspan om onselfsugtige belange na te streef wat almal wat dan lewe tot voordeel sal strek. Die aarde sal in ’n pragtige, vreedsame, bevredigende tuiste vir die mensdom omskep word.
Geregtigheid vervang goddeloosheid
3. Watter onmiddellike verligting sal daar net ná Armageddon wees?
3 Dit sal alles moontlik gemaak word deur die vernietiging van Satan se wêreld. Dan sal daar nie meer valse godsdienste, sosiale stelsels of regerings wees wat verdeeldheid saai nie. Dan sal daar nie meer sataniese propaganda wees om mense te mislei nie; al die organisasies waardeur hierdie propaganda voortgebring word, sal saam met Satan se stelsel ten gronde gaan. Dink net: die hele verderflike atmosfeer van Satan se wêreld sal uit die weg geruim wees! Wat ’n verligting sal dit tog nie wees nie!
4. Beskryf die verandering wat daar in onderrigting sal plaasvind.
4 Dan sal die vernietigende idees van menseheerskappy vervang word deur die opbouende onderrigting wat van God af kom. “Al jou kinders sal deur die HERE geleer wees, en die vrede van jou kinders sal groot wees” (Jesaja 54:13). Met hierdie heilsame onderrigting wat jaar ná jaar sal voortgaan, sal “die aarde . . . vol wees van die kennis van die HERE soos die waters die seebodem oordek” (Jesaja 11:9). Mense sal nie meer dinge leer wat sleg is nie, maar ‘die inwoners van die wêreld sal geregtigheid leer’ (Jesaja 26:9). Opbouende gedagtes en dade sal aan die orde van die dag wees.—Handelinge 17:31; Filippense 4:8.
5. Wat sal met alle goddeloosheid en goddelose mense gebeur?
5 Daar sal gevolglik nie meer moord, geweld, verkragting, rowery of enige ander misdaad wees nie. Niemand sal weens die goddelose dade van ander hoef te ly nie. Spreuke 10:30 sê: “Die regverdige sal vir ewig nie wankel nie, maar die goddelose sal in die land nie bly woon nie.”
Volmaakte gesondheid herstel
6, 7. (a) Aan watter wrede werklikheid sal die Koninkryksheerskappy ’n einde maak? (b) Hoe het Jesus dit getoon terwyl hy op aarde was?
6 In die nuwe wêreld gaan al die bose gevolge van die oorspronklike opstand ongedaan gemaak word. Die Koninkryksheerskappy gaan byvoorbeeld siekte en ouderdom verwyder. Al geniet jy vandag ’n mate van goeie gesondheid is dit ’n wrede werklikheid dat namate jy ouer word jou oë verdof, jou tande bederf, jou gehoor verswak, jou vel verrimpel, jou inwendige organe agteruitgaan, tot jy uiteindelik sterf.
7 Maar daardie ontstellende gevolge van ouderdom wat ons van ons eerste ouers geërf het, gaan binnekort iets van die verlede wees. Onthou jy wat Jesus aangaande gesondheid getoon het terwyl hy op aarde was? Die Bybel sê: “Ondertussen kom daar groot menigtes na Hom met kreupeles, blindes, stommes, gebreklikes en baie ander by hulle, en hulle het dié by die voete van Jesus neergesit, en Hy het hulle gesond gemaak, sodat die skare verbaas was om te sien dat stommes praat, gebreklikes gesond word, kreupeles loop en blindes sien.”—Mattheüs 15:30, 31.
8, 9. Beskryf die geluk wat in die nuwe wêreld ervaar sal word wanneer volmaakte gesondheid herstel is.
8 Watter groot vreugde sal daar tog in die nuwe wêreld wees wanneer al ons gebreke genees is! Ons sal nooit weer as gevolg van swak gesondheid hoef te ly nie. “Geen inwoner sal sê: Ek is siek nie.” “Dan sal die oë van die blindes geopen en die ore van die dowes ontsluit word. Dan sal die lamme spring soos ’n takbok, en die tong van die stomme sal jubel.”—Jesaja 33:24; 35:5, 6.
9 Sal dit nie opwindend wees om elke oggend wakker te word en te besef dat jy nou blakende gesondheid geniet nie? Sal dit nie vir ouer persone genot verskaf om te weet dat hulle tot volle jeugdige lewenskrag herstel is en dat hulle die volmaaktheid sal bereik wat Adam en Eva oorspronklik geniet het nie? Die Bybel se belofte is: “Dan word sy vlees fris van jeugdige krag, hy keer terug na die dae van sy jonkheid” (Job 33:25). Wat ’n genot sal dit tog wees om daardie brille, gehoortoestelle, krukke, rolstoele en medisynes weg te gooi! Daar sal nooit weer ’n behoefte aan hospitale, dokters en tandartse wees nie.
10. Wat sal met die dood gebeur?
10 Mense wat sulke blakende gesondheid geniet, sal nie wil sterf nie. En hulle hoef ook nie, want die mensdom sal nie meer in die greep van oorgeërfde onvolmaaktheid en die dood wees nie. Christus “moet as koning heers totdat [God] al sy vyande onder sy voete gestel het. Die laaste vyand wat vernietig word, is die dood.” “Die genadegawe van God is die ewige lewe.”—1 Korinthiërs 15:25, 26; Romeine 6:23; sien ook Jesaja 25:8.
11. Hoe som Openbaring die seëninge van die nuwe wêreld op?
11 Die laaste boek van die Bybel som die seëninge op wat die mensdom in die Paradys van die sorgsame God sal ontvang wanneer dit sê: “En God sal al die trane van hulle oë afvee, en daar sal geen dood meer wees nie; ook droefheid en geween en moeite sal daar nie meer wees nie, want die eerste dinge het verbygegaan.”—Openbaring 21:4.
Die dooies keer terug
12. Hoe het Jesus sy godgegewe mag om mense op te wek, getoon?
12 Jesus het meer gedoen as om die siekes en die lammes gesond te maak. Hy het ook mense uit die graf teruggebring. Hy het sodoende getoon wat ’n wonderlike krag God hom gegee het om mense uit die dood op te wek. Onthou jy die geleentheid toe Jesus na die huis van ’n man gegaan het wie se dogtertjie gesterf het? Jesus het vir die dogtertjie wat dood was, gesê: “Dogtertjie, Ek sê vir jou, staan op!” Met watter resultaat? “En die dogtertjie het dadelik opgestaan en begin rondloop.” Toe die mense wat daar was dit sien, “was hulle buite hulleself van groot verrukking”. Hulle was oorstelp van vreugde!—Markus 5:41, 42, vgl. NW; sien ook Lukas 7:11-16; Johannes 11:1-45.
13. Watter soort mense gaan opgewek word?
13 In die nuwe wêreld gaan “daar ’n opstanding . . . wees van die dode, regverdiges sowel as onregverdiges” (Handelinge 24:15). Dan sal Jesus sy godgegewe mag gebruik om die dooies op te wek, want hy het gesê: “Ek is die opstanding en die lewe; wie in My glo, sal lewe al het hy ook gesterwe” (Johannes 11:25). Hy het ook gesê: “Almal wat in die grafte [in God se geheue] is, sal sy [Jesus se] stem hoor en sal uitgaan.”—Johannes 5:28, 29.
14. Watter dinge sal verdwyn omdat die dood nie meer daar is nie?
14 Hoeveel vreugde sal daar tog wêreldwyd wees wanneer die een groep afgestorwenes na die ander tot die lewe terugkeer om by hulle geliefdes aan te sluit! Daar sal nie meer doodsberigte wees om die oorlewendes hartseer te maak nie. Pleks daarvan sal net die teenoorgestelde dalk gebeur: aankondigings van pas opgewektes wat vreugde sal verskaf aan diegene wat hulle liefgehad het. Daar sal dus nie meer begrafnisse, lykstapels, krematoriums of begraafplase wees nie!
’n Waarlik vreedsame wêreld
15. Hoe sal Miga se profesie ten volle vervul word?
15 Ware vrede sal in alle fassette van die lewe verwesenlik word. Oorloë, aanhitsers van oorloë en die vervaardiging van wapens sal dinge van die verlede wees. Waarom? Omdat volks-, stam- en rassebelange wat verdeeldheid veroorsaak, sal verdwyn. Dan sal hierdie woorde ten volle vervul word: “Nie meer sal nasie teen nasie die swaard ophef nie, en hulle sal nie meer leer om oorlog te voer nie”.—Miga 4:3.
16. Hoe sal God toesien dat oorloë onmoontlik sal wees?
16 Dit klink dalk ongelooflik as ons die mens se bloeddorstige geskiedenis van voortdurende oorlog in aanmerking neem. Maar hierdie oorloë het plaasgevind omdat die mensdom onder mense- en demoonheerskappy was. In die nuwe wêreld, onder Koninkryksheerskappy, sal die volgende gebeur: “Kom, aanskou die dade van die HERE . . . wat die oorloë laat ophou tot by die einde van die aarde, die boog verbreek en die spies stukkend slaan, die strydwaens met vuur verbrand.”—Psalm 46:9, 10.
17, 18. Watter verhouding sal daar in die nuwe wêreld tussen mens en dier bestaan?
17 Mens en dier sal ook in vrede met mekaar leef soos hulle in Eden gedoen het (Genesis 1:28; 2:19). God sê: “Verder sluit Ek in dié dag vir hulle ’n verbond met die wilde diere van die veld en met die voëls van die hemel en die kruipende diere van die aarde . . . en Ek sal hulle in veiligheid laat rus.”—Hosea 2:17.
18 Hoe omvattend sal daardie vrede wees? “Dan wei die wolf by die lam, en die luiperd gaan lê by die bokkie, en die kalf en die jong leeu en die vetgemaakte vee bymekaar, en ’n klein seuntjie sal hulle aanja.” Nooit weer sal die diere ’n bedreiging vir die mens of vir hulleself wees nie. Selfs “die leeu sal strooi eet soos ’n bees”!—Jesaja 11:6-9; 65:25.
Die aarde word in ’n paradys omskep
19. Tot wat sal die aarde omskep word?
19 Die hele aarde sal in ’n paradystuiste vir die mensdom omskep word. Dit is waarom Jesus ’n man wat in hom geglo het, kon beloof: “Jy [sal] saam met My in die Paradys wees.” Die Bybel sê: “Die woestyn en die dor land sal bly wees, en die wildernis sal juig en bloei soos ’n narsing; . . . want in die woestyn breek waters uit en strome in die wildernis.”—Lukas 23:43; Jesaja 35:1, 6.
20. Waarom sal honger die mensdom nooit weer teister nie?
20 Onder God se Koninkryk sal honger nooit weer miljoene teister nie. “Daar sal volop koring op die aarde wees; op die top van die berge sal daar ’n oorvloed wees.” “Die bome van die veld sal hulle vrugte gee, en die land sal sy opbrings gee, en hulle sal veilig wees in hul land.”—Psalm 72:16, NW; Esegiël 34:27.
21. Wat sal met haweloses, krotbuurte en slegte woonbuurte gebeur?
21 Daar sal nie meer armoede, haweloses, krotbuurte of misdaadgeteisterde woonbuurte wees nie. “Hulle sal huise bou en bewoon, en wingerde plant en die vrug daarvan eet: hulle sal nie bou dat ’n ander dit bewoon nie; hulle sal nie plant dat ’n ander dit eet nie.” “Hulle sal sit elkeen onder sy wingerdstok en onder sy vyeboom, sonder dat iemand hulle verskrik.”—Jesaja 65:21, 22; Miga 4:4.
22. Hoe beskryf die Bybel die seëninge van God se heerskappy?
22 In die Paradys sal die mens met al hierdie dinge en nog meer geseën word. Psalm 145:16 (NW) sê: “U [God] open u hand en versadig die begeerte van alles wat lewe.” Dit is dus geen wonder nie dat die Bybelprofesie sê: “Die ootmoediges daarenteen sal die aarde besit en hulle verlustig oor groot vrede. . . . Die regverdiges sal die aarde besit en vir ewig daarop woon.”—Psalm 37:11, 29.
Die skade van die verlede word uitgewis
23. Hoe sal God se Koninkryk al die lyding uitwis wat ons verduur het?
23 God se Koninkryksheerskappy sal al die skade uitwis wat die afgelope sesduisend jaar aan die mensdom gedoen is. Dan sal die vreugdes enige lyding wat mense verduur het ver oortref. Die lewe sal nie deur enige slegte herinneringe aan vorige lyding vertroebel word nie. Die opbouende gedagtes en bedrywighede wat deel van mense se daaglikse bestaan sal wees, sal die pynlike herinneringe geleidelik uitwis.
24, 25. (a) Wat het Jesaja voorspel? (b) Waarom kan ons seker wees dat herinneringe aan lyding wat ons in die verlede verduur het, sal vervaag?
24 Die sorgsame God sê: “Ek skep nuwe hemele [’n nuwe hemelse regering oor die mensdom] en ’n nuwe aarde [’n nuwe regverdige mensegemeenskap], en aan die vorige dinge sal nie gedink word en hulle sal in die hart nie opkom nie. Maar wees julle bly en juig vir ewig oor wat Ek skep.” “Die hele aarde het nou rus en vrede, sy inwoners juig en sing.”—Jesaja 14:7, NAV; 65:17, 18.
25 God gaan dus deur middel van sy Koninkryk die slegte toestande wat so lank voortgeduur het heeltemal ongedaan maak. Hy sal tot in alle ewigheid sy groot sorgsaamheid vir ons toon deur seëninge op ons uit te stort wat in oorvloedige mate sal vergoed vir enige hartseer wat ons in ons verlede ervaar het. Die probleme wat ons voorheen ondervind het, sal dan net ’n vae herinnering wees, as ons dit hoegenaamd wil onthou.
26. Waarom sal God vergoed vir enige lyding in die verlede?
26 Dit is hoe God sal vergoed vir die lyding wat ons moontlik in hierdie wêreld moes verduur. Hy weet dat dit nie ons skuld is dat ons onvolmaak gebore is nie, want ons het onvolmaaktheid van ons eerste ouers geërf. Dit is nie ons skuld dat ons in ’n sataniese wêreld gebore is nie, want as Adam en Eva getrou gebly het, sou ons in ’n paradys gebore gewees het. God sal dus met groot ootmoedigheid vergoed vir die slegte verlede wat ons moes deurmaak, en hy gaan dit op ’n manier doen wat ons stoutste verwagtinge sal oortref.
27. Watter profesieë sal op ’n wonderlike wyse in die nuwe wêreld vervul word?
27 In die nuwe wêreld sal die mensdom die vryheid geniet wat in Romeine 8:21, 22 voorspel is: “Die skepping self [sal] vrygemaak . . . word van die slawerny van die verganklikheid tot die vryheid van die heerlikheid van die kinders van God. Want ons weet dat die hele skepping tesame sug en tesame in barensnood is tot nou toe.” Mense sal dan die volkome verwesenliking van die volgende gebed sien: “Laat u koninkryk kom; laat u wil geskied, soos in die hemel net so ook op die aarde” (Mattheüs 6:10). Die wonderlike toestande op die Paradysaarde sal die toestande in die hemel weerspieël.
[Prente op bladsy 23]
In die nuwe wêreld sal die bejaardes na die krag van hulle jeug terugkeer
[Prent op bladsy 24]
Alle siektes en gebreke sal in die nuwe wêreld uitgewis word
[Prent op bladsy 25]
In die nuwe wêreld sal die dooies tot lewe opgewek word
[Prent op bladsy 26]
‘Hulle sal nie meer leer om oorlog te voer nie’
[Prente op bladsy 27]
Mens en dier sal in algehele vrede in die Paradys woon
[Prent op bladsy 27]
‘God sal sy hand open en die begeerte van alles wat lewe, versadig’
[Prent op bladsy 28]
God se Koninkryk sal meer as vergoed vir al die lyding wat ons moes verduur