’n Nuwe wêreld sonder lyding
“Aan die vorige dinge sal nie gedink word en hulle sal in die hart nie opkom nie. Maar wees bly en juig vir ewig oor wat ek skep.”—Jesaja 65:17, 18.
DAARDIE profetiese woorde is meer as 2700 jaar gelede deur God geïnspireer. Hulle beskryf, gedeeltelik, hoe die lewe in die toekoms op die aarde sal wees. Wanneer? Nadat God die huidige stelsel van dinge tot ’n einde gebring het. Talle Bybelprofesieë maak dit duidelik dat dit God se voorneme is om hierdie huidige stelsel van dinge binnekort te verwyder en om dit met ’n nuwe wêreld sonder enige lyding te vervang.
Hoe anders sal die lewe in daardie nuwe wêreld vergeleke met die lewe deur die vorige mensegeskiedenis heen tog nie wees nie! God se profetiese Woord deel ons mee dat dit heeltemal sonder oorlog, misdaad, armoede en ongeregtigheid sal wees. Siekte en die dood sal vir altyd weg wees. Die verdelende regerings, godsdienste of ekonomiese stelsels wat getoon het dat hulle hopeloos onvoldoende is, sal nie meer daar wees nie. Trane van vreugde sal trane van droefheid vervang, want goddeloosheid en lyding sal vir altyd weg wees.
In Bybelprofesieë voorafgeskadu
Let op hoe sulke toestande in hierdie uittreksels uit Bybelprofesieë voorafgeskadu is:
Geen oorlog meer nie: ‘Hy laat die oorloë ophou tot by die einde van die aarde’ (Psalm 46:10). “Nie meer sal nasie teen nasie die swaard ophef nie, en hulle sal nie meer leer om oorlog te voer nie.”—Jesaja 2:4.
Geregtigheid vir almal: “En ek sal die reg tot ’n riglyn maak, en die geregtigheid tot ’n skietlood.”—Jesaja 28:17.
Geen vrees meer nie: “Maar hulle sal sit elkeen onder sy wingerdstok en onder sy vyeboom, sonder dat iemand hulle verskrik” (Miga 4:4). “En hulle sal veilig wees in hul land.”—Esegiël 34:27.
Honger uit die weg geruim: “Mag daar volheid van koring wees in die land, op die top van die berge” (Psalm 72:16). “En die bome van die veld sal hulle vrugte gee, en die land sal sy opbrengs gee.”—Esegiël 34:27.
Geen ouderdom of siekte meer nie: “Dan word sy vlees fris van jeugdige krag, hy keer terug na die dae van sy jonkheid” (Job 33:25). “En geen inwoner sal sê: Ek is siek nie.”—Jesaja 33:24.
Die dood, droefheid en pyn vir altyd verwyder: “God sal al die trane van hulle oë afvee, en daar sal geen dood meer wees nie; ook droefheid en geween en moeite sal daar nie meer wees nie, want die eerste dinge het verbygegaan.”—Openbaring 21:4.
Onaangetas deur die verlede
Die inkomende nuwe wêreld wat God gaan bewerkstellig, sal so bevredigend wees dat nie eens onaangename herinneringe aan vorige lyding die aarde se bewoners se genot van die lewe sal bederf nie. Die talle opbouende gedagtes en aktiwiteite wat die alledaagse lewe van mense in daardie nuwe era sal wees, sal die vorige onaangename herinneringe geleidelik uitwis. God se belofte is: “Aan die vorige dinge sal nie gedink word en hulle sal in die hart nie opkom nie.” Mense sal ‘vir ewig juig’ oor wat God aardwyd gaan bewerkstellig. “Die hele aarde rus, is stil; hulle breek uit in jubel.”—Jesaja 65:17, 18; 14:7.
Vandag ‘maak uitgestelde hoop die hart siek’, soos die Bybel sê. Maar in die nuwe wêreld sal die situasie andersom wees. Gedurende daardie tyd sal ‘’n wens wat uitkom ’n lewensboom wees’ (Spreuke 13:12). Harte sal nie meer deur lyding of deur onvervulde hoop beswaar word nie. Pleks daarvan sal hulle met tevredenheid en vreugde gevul wees, weens al die wonderlike dinge wat God aan die mensegesin sal voorsien.
’n Ander regering
Pleks van ’n onbevredigende menseregering te hê wat onafhanklik van God is, sal die nuwe wêreld ’n heeltemal ander regering hê. Bestuursgesag sal van mense weggeneem word. Hulle sal nooit weer toegelaat word om onafhanklik van God te regeer nie.
Bybelprofesie sê: “Maar in die dae van dié konings [die heersers wat nou aan bewind is] sal die God van die hemel ’n koninkryk [in die hemel] verwek wat in ewigheid nie vernietig sal word nie, en die heerskappy daarvan sal aan geen ander volk oorgelaat word nie [aangesien menseheerskappy nie meer sal bestaan nie]; dit sal al daardie koninkryke [wat nou bestaan] verbrysel en daar ’n einde aan maak, maar self sal dit vir ewig bestaan.”—Daniël 2:44.
Jesus het sy volgelinge geleer om vir die aarde se nuwe regering te bid toe hy gesê het: “Laat u koninkryk kom; laat u wil geskied, soos in die hemel net so ook op die aarde.”—Mattheüs 6:10.
Dit sal die mensdom se nuwe regering wees—die hemelse heerskappy van God deur middel van sy Koninkryk in die hande van Christus. En op aarde sal lojale mensedienaars van God sake ooreenkomstig God se leiding bestuur (Jesaja 32:1). Die apostel Petrus het van hierdie nuwe reëling gepraat as ‘nuwe hemele en ’n nuwe aarde waarin geregtigheid woon wat ons volgens sy belofte verwag’ (2 Petrus 3:13). Daardie Koninkryksregering is die Bybel se sentrale leer.
‘Die skepping sal vrygemaak word’
Hierdie nuwe regering sal ook die aarde se natuurkragte geheel en al beheers. ‘Dade van die natuur’ soos aardbewings, orkane, oorstromings of droogtes sal nie meer angs veroorsaak nie. Jesus self het sy mag getoon om hierdie kragte te beheers. By een geleentheid toe die skuit waarop Jesus en sy dissipels was byvoorbeeld gedurende ’n storm wou omslaan, het hy die wind en die see laat bedaar. Die verbaasde dissipels het gesê: “Wat vir ’n mens is Hy, dat selfs die winde en die see Hom gehoorsaam is?”—Mattheüs 8:23-27.
Die aarde, sowel as die menseskepping daarop, sal dus ’n ongeëwenaarde vryheid vind. “Die skepping self [sal] vrygemaak . . . word van die slawerny van die verganklikheid tot die vryheid van die heerlikheid van die kinders van God. Want ons weet dat die hele skepping tesame sug en tesame in barensnood is tot nou toe.”—Romeine 8:21, 22.
Kan ons seker wees dat menseheerskappy binnekort sal eindig en dat God se nuwe regering die leiding van al die sake van die aarde sal oorneem? Ons kan seker wees daarvan, want die Universele Soewerein het sy woord gegee: “My raad sal bestaan, en al wat my behaag, sal Ek doen; . . . Soos Ek dit gespreek het, sal Ek dit ook laat kom; Ek het dit voorberei, Ek sal dit ook doen.”—Jesaja 46:10, 11.
“’n Vasgestelde tyd”
Hoe sal dit bewerkstellig word? Wanneer sal dit gebeur? God se Woord sê: “Vir alles is daar ’n vasgestelde tyd” (Prediker 3:1, NW). Dit sluit ’n vasgestelde tyd in vir God om ‘genoeg!’ te sê en om goddeloosheid en lyding te beëindig. Daniël het van “die vasgestelde tyd van die einde” gepraat (Daniël 8:19, NW). Jesus het ook van ’n “vasgestelde tyd” gepraat.—Markus 13:32, 33, NW.
Ja, God het ’n definitiewe tyd vasgestel wanneer hy in menseaangeleenthede gaan ingryp en die ellendige eksperiment met menseheerskappy wat onafhanklik van hom is, gaan uitwis. “Gód sal die regverdige en die goddelose oordeel, want dáár is ’n tyd vir elke saak en vir elke werk” (Prediker 3:17). En die getuienis ter vervulling van Bybelprofesieë toon dat God se aangewese tyd vir die toelating van lyding binnekort gaan eindig. Wanneer daardie tyd verstryk het, sal hy die onbevredigende stelsel van menseheerskappy vernietig wat die mensegesin duisende jare lank al groot lyding besorg.—Mattheüs 24:3-14; 2 Timotheüs 3:1-5, 13; Openbaring 19:11-21.
Let op wat met diegene sal gebeur wat hulle aan God se heerskappy onderwerp wanneer hy sy oordeel voltrek, in teenstelling met dié wat dit nie doen nie: “En nog ’n klein rukkie en die goddelose sal daar nie wees nie; . . . Die ootmoediges daarenteen sal die aarde besit en hulle verlustig oor groot vrede.” “Maar die nageslag van die goddelose word uitgeroei. Die regverdiges sal die aarde besit en vir ewig daarop woon.” “Kyk na die opregte, want daar is ’n toekoms vir die man van vrede. Maar die oortreders word tesame verdelg.”—Psalm 37:10, 11, 28, 29, 37, 38; sien ook Spreuke 2:21, 22; Mattheüs 5:5.
Maar wat van die miljarde mense wat alreeds gesterf het? Hoe sal hulle by ’n nuwe wêreld baat vind? Deur middel van die opstanding, ’n herstelling tot die lewe hier op die aarde. Hulle sal uit die graf terugkeer en die geleentheid gegee word om die lewe vir ewig te geniet. God se Woord waarborg: “Daar [sal] ’n opstanding . . . wees van die dode, regverdiges sowel as onregverdiges” (Handelinge 24:15). En Jesus het dit getoon deur dooie mense, soos Lasarus en die seun van die weduwee van Nain, op te wek.—Johannes 11:38-44; Lukas 7:11-16.
“Vergoeding”
Hoe bemoedigend is dit tog om te weet dat God van voorneme is om lyding te beëindig en om ’n regverdige nuwe wêreld in te lui! Stel jou voor dat jy miljoene jare—ja, vir ewig—in volmaakte gesondheid en geluk te midde van paradysagtige omgewings kan leef, waar goddeloosheid en lyding vir altyd dinge van die verlede sal wees!
Sal jy nie saamstem dat hierdie “vergoeding” deur God aan die mens—deur die ewigheid heen—die betreklik paar duisend jaar wat God lyding toegelaat het by verre oortref nie? En oortref dit nie ook by verre die 70 of 80 jaar van lyding—of minder nog—wat ons dalk persoonlik gedurende ons leeftyd verduur het nie?
’n Langtermynbeskouing
Weens sy langtermynbeskouing van dinge weet die Skepper dat dit noodsaaklik was om eers die belangrike sake, soos sy reg om as Universele Soewerein te regeer en die regmatigheid van sy regering, te beslis. En dit was noodsaaklik om die saak van die geoorloofde en ongeoorloofde gebruik van vryheid van keuse te beslis. Dit was ook nodig om te toon dat sy skepping volmaak is in die sin dat mense wat hulle lojaal aan sy regverdige wette onderwerp onkreukbaarheid teenoor hom kan handhaaf wanneer hulle vervolg en deur wêreldse heersers getoets word. Die uitmuntendste voorbeeld hiervan is sy eie Seun, Jesus, toe hy op aarde was.
Nadat God al die geskille besleg het, sal hy nie toelaat dat goddeloosheid en lyding weer verskyn om die vreedsame heelal te ontsier nie. “Die benoudheid sal nie twee maal opkom nie.”—Nahum 1:9.
Tot in alle ewigheid kan God wat gedurende hierdie afgelope paar duisend jaar gebeur het, gebruik asof dit ’n toetssaak was wat in ’n hooggeregshof beslis is. As daar ooit weer vrae oor God se soewereiniteit of die geoorloofde gebruik van wilsvryheid geopper word, kan die presedent wat dit geskep het enige tyd in die toekoms op enige ander plek in die heelal toegepas word.
Wat gaan jy kies?
Ons staan vandag voor ’n keuse. Ons kan ons wilsvryheid op een van twee maniere gebruik: Ons kan kies om God se voornemens te veronagsaam, tevrede te wees met onvolmaakte menseheerskappy en die lot daarvan deel, of ons kan ons vryheid van keuse gebruik om te leer wat God se voornemens is en wat ons moet doen om hom as toegewyde onderdane van sy Koninkryk te behaag.
Jesus het in gebed tot God gesê: “En dit is die ewige lewe, dat hulle U ken, die enige waaragtige God, en Jesus Christus wat U gestuur het” (Johannes 17:3). As ons dus lewe in die nuwe wêreld wil hê, moet ons ons inspan om die waarheid oor God, sy voornemens en sy vereistes te leer. Let op hoe die Bybel dit stel: “Die HERE is met julle as julle met Hom is, en as julle Hom soek, sal Hy Hom deur julle laat vind; maar as julle Hom verlaat, sal Hy julle verlaat.”—2 Kronieke 15:2.
Die tyd vir hierdie ou wêreld word min; ’n nuwe wêreld staan voor die deur: “Die wêreld gaan verby en sy begeerlikheid, maar hy wat die wil van God doen, bly vir ewig” (1 Johannes 2:17). Watter een gaan jy kies—die uitgaande ou wêreld of die inkomende nuwe wêreld?
God se Woord sê: “Die lewe en die dood, die seën en die vloek het ek jou voorgehou. Kies dan die lewe, dat jy kan lewe, jy en jou nageslag, deur die HERE jou God lief te hê, na sy stem te luister en Hom aan te hang; want dit is jou lewe en die lengte van jou dae.”—Deuteronomium 30:19, 20.
Wil jy die seëninge geniet wat God in die vooruitsig stel vir diegene wat hulle wil na syne skik? Die uitgewers van hierdie tydskrif of Jehovah se Getuies op enige plek in die wêreld sal jou graag kosteloos help om meer hiervan te leer.
[Lokteks op bladsy 12]
Die dode sal die geleentheid hê om in God se nuwe wêreld te leef deur uit die graf opgewek te word