Deel 11
Die nuwe wêreld se fondament reeds in wording
1, 2. Wat gebeur reg voor ons oë ter vervulling van Bybelprofesieë?
DIT is ook wonderlik dat die fondament van God se nuwe wêreld nou reeds in wording is, onderwyl Satan se ou wêreld agteruitgaan. God is besig om voor ons oë ’n volk uit alle nasies te versamel en hulle as die fondament van ’n nuwewêreld-gemeenskap te vorm wat binnekort die teenswoordige verdeelde wêreld gaan vervang. In die Bybel, in 2 Petrus 3:13, word hierdie nuwe gemeenskap “’n nuwe aarde” genoem.
2 ’n Bybelprofesie sê ook: “In die laaste dae [die tyd waarin ons nou leef] . . . [sal] vele volke gewis heengaan en sê: ‘Kom, julle mense, en laat ons opgaan na die berg van Jehovah [sy ware aanbidding], . . . en hy sal ons onderrig omtrent sy weë, en ons sal in sy paaie wandel.’”—Jesaja 2:2, 3, NW.
3. (a) Onder wie word Jesaja se profesie vervul? (b) Wat sê die laaste boek van die Bybel hieroor?
3 Daardie profesie word nou vervul onder diegene wat hulle onderwerp aan ‘God se weë en wat in sy paaie wandel’. Die laaste boek van die Bybel praat van hierdie vredeliewende internasionale mensegemeenskap as “’n groot menigte . . . uit alle nasies en stamme en volke en tale”, ’n ware wêreldwye broederskap wat God in eenheid dien. En die Bybel sê ook: “Dit is hulle wat uit die groot verdrukking kom.” Dit wil sê, hulle sal die einde van hierdie bose stelsel van dinge oorleef.—Openbaring 7:9, 14; Mattheüs 24:3, vgl. NW.
’n Ware internasionale broederskap
4, 5. Waarom is die wêreldwye broederskap van Jehovah se Getuies moontlik?
4 Miljoene Getuies van Jehovah probeer opreg om in ooreenstemming met God se onderrigting en weë te lewe. Hulle hoop op die ewige lewe is geanker in God se nuwe wêreld. Deur hulle daaglikse lewe gehoorsaam volgens God se wette te rig, toon hulle dat hulle bereid is om hulle nou, sowel as in die nuwe wêreld aan sy heerskappy te onderwerp. Ongeag hulle nasionaliteit of ras, gehoorsaam hulle oral dieselfde standaarde—dié standaarde wat deur God in sy Woord uiteengesit word. Daarom is hulle ’n ware internasionale broederskap, ’n nuwewêreld-gemeenskap wat deur God gevorm word.—Jesaja 54:13; Mattheüs 22:37, 38; Johannes 15:9, 14.
5 Jehovah se Getuies gee hulleself nie die eer vir die feit dat hulle ’n unieke wêreldwye broederskap is nie. Hulle weet dat dit te danke is aan God se kragtige gees, wat inwerk op mense wat hulle aan sy wette onderwerp (Handelinge 5:29, 32; Galasiërs 5:22). Die eer kom God toe. Soos Jesus gesê het: “Die dinge wat by mense onmoontlik is, is by God moontlik” (Lukas 18:27). Die God wat derhalwe die ewigdurende heelal moontlik gemaak het, is die een wat ook die ewigdurende nuwewêreld-gemeenskap moontlik maak.
6. Waarom kan die broederskap van Jehovah se Getuies ’n hedendaagse wonderwerk genoem word?
6 Die wyse waarop Jehovah in die nuwe wêreld gaan regeer, kan dus reeds gesien word in dít wat hy tot stand bring in die fondament vir die nuwe wêreld wat nou gevorm word. En wat hy met sy Getuies gedoen het, is in sekere sin ’n hedendaagse wonderwerk. Waarom? Omdat hy Jehovah se Getuies tot ’n ware wêreldwye broederskap verenig het, een wat nooit deur nasionale, rasse- of godsdiensbelange verdeel kan word nie. Hoewel daar miljoene Getuies is en hulle in meer as 200 lande woon, word hulle in eenheid saamgesnoer deur ’n onbreekbare band. Hierdie wêreldwye broederskap, wat sonder weerga in die hele geskiedenis is, is inderdaad ’n hedendaagse wonderwerk—God se wonderwerk.—Jesaja 43:10, 11, 21; Handelinge 10:34, 35; Galasiërs 3:28.
Hoe om God se volk uit te ken
7. Hoe het Jesus gesê, sou sy ware volgelinge uitgeken kan word?
7 Hoe kan ons verder vasstel wie die volk is wat God as die fondament vir sy nuwe wêreld gebruik? Wel, wie vervul Jesus se woorde in Johannes 13:34, 35? Hy het gesê: “’n Nuwe gebod gee Ek julle, dat julle mekaar moet liefhê; soos Ek julle liefgehad het, moet julle ook mekaar liefhê. Hieraan sal almal weet dat julle my dissipels is, as julle liefde onder mekaar het.” Jehovah se Getuies glo Jesus se woorde en tree daarvolgens op. Soos God se Woord beveel, het hulle ‘mekaar vurig lief’ (1 Petrus 4:8). Daarbenewens ‘beklee hulle hulle met liefde wat die volmaakte band van eenheid is’ (Kolossense 3:14, NW). Broederliefde is derhalwe die “gom” wat hulle wêreldwyd bymekaar hou.
8. Hoe identifiseer 1 Johannes 3:10-12 God se volk verder?
8 Ook sê 1 Johannes 3:10-12: “Hierin is die kinders van God en die kinders van die duiwel openbaar: elkeen wat die geregtigheid nie doen nie, is nie uit God nie, en hy ook wat sy broeder nie liefhet nie. Want dit is die boodskap wat julle van die begin af gehoor het, dat ons mekaar moet liefhê; nie soos Kain wat uit die Bose was en sy broer doodgeslaan het nie.” Daarom is God se volk ’n geweldlose, wêreldwye broederskap.
Nog ’n kenmerk
9, 10. (a) Aan watter werk sal God se knegte in die laaste dae uitgeken word? (b) Hoe het Jehovah se Getuies Mattheüs 24:14 vervul?
9 Daar is nog ’n manier waarop God se knegte uitgeken kan word. In sy profesie oor die wêreld se einde het Jesus baie dinge voorspel wat hierdie tydperk as die laaste dae sou kenmerk. (Sien Deel 9.) ’n Grondkenmerk van hierdie profesie word in sy woorde in Mattheüs 24:14 genoem: “Hierdie evangelie [“goeie nuus”, NW] van die koninkryk sal verkondig word in die hele wêreld tot ’n getuienis vir al die nasies; en dan sal die einde kom.”
10 Het ons hierdie profesie in vervulling sien gaan? Ja. Sedert die laaste dae in 1914 begin het, het Jehovah se Getuies die goeie nuus van God se Koninkryk deur die hele wêreld heen verkondig op die wyse wat Jesus beveel het, naamlik by mense se huise (Mattheüs 10:7, 12; Handelinge 20:20, vgl. NW). Miljoene Getuies besoek mense in elke nasie om met hulle oor die nuwe wêreld te praat. Dit het daartoe gelei dat jy hierdie brosjure ontvang het, aangesien die druk en verspreiding van miljarde stukke lektuur oor God se Koninkryk deel uitmaak van die werk wat Jehovah se Getuies doen. Weet jy van enigiemand anders wat deur die hele wêreld heen van huis tot huis met mense oor God se Koninkryk praat? En Markus 13:10 toon dat hierdie predikings- en onderrigtingswerk “eers” gedoen moet word voordat die einde kom.
Die tweede groot geskil word beantwoord
11. Wat bewys Jehovah se Getuies nog deur hulle aan God se heerskappy te onderwerp?
11 Jehovah se Getuies bewys nog iets deur hulle aan God se wette en beginsels te onderwerp. Hulle bewys dat Satan ’n leuenaar was toe hy beweer het dat die mens nie onder beproewing aan God getrou sou bly nie, en sodoende gee hulle ’n antwoord op die tweede groot geskil, wat op die mens se onkreukbaarheid betrekking het (Job 2:1-5). Aangesien hulle ’n gemeenskap van miljoene mense uit alle nasies is, toon die Getuies as een liggaam lojaliteit aan God se heerskappy. Hoewel hulle onvolmaakte mense is, ondersteun hulle God se kant van die geskil oor universele soewereiniteit, ten spyte van sataniese druk.
12. Wie volg die Getuies na deur die geloof wat hulle toon?
12 Vandag voeg hierdie miljoene Getuies van Jehovah hulle getuienis by dié van ’n lang lys ander getuies wat in die verlede hulle lojaliteit aan God getoon het. Van hulle was Abel, Noag, Job, Abraham, Sarah, Isak, Jakob, Debora, Rut, Dawid en Daniël, om maar net ’n paar te noem (Hebreërs, hoofstuk 11). Hulle is, soos die Bybel sê, ’n “groot wolk van getuies” (Hebreërs 12:1). Hulle en ander, waaronder die dissipels van Jesus, het hulle onkreukbaarheid aan God gehandhaaf. En Jesus self het die beste voorbeeld gestel deur volmaakte onkreukbaarheid te handhaaf.
13. Watter woorde van Jesus oor Satan is waar bewys?
13 Dit bewys dat wat Jesus vir die godsdiensleiers oor Satan gesê het waar is: “Maar nou probeer julle om My om die lewe te bring, iemand wat aan julle die waarheid vertel het, wat Ek van God gehoor het. . . . Julle het die duiwel as vader, en die begeertes van julle vader wil julle doen. Hy was ’n mensemoordenaar van die begin af en staan nie in die waarheid nie, omdat daar in hom geen waarheid is nie. Wanneer hy leuentaal praat, praat hy uit se eie, omdat hy ’n leuenaar is en die vader daarvan.”—Johannes 8:40, 44.
Wat is jou keuse?
14. Wat gebeur nou met die fondament van die nuwe wêreld?
14 Die fondament van die nuwe wêreld wat nou deur God geskep word in die vorm van die internasionale gemeenskap van Jehovah se Getuies word al hoe sterker. Elke jaar gebruik honderdduisende mense hulle wilsvryheid, gegrond op juiste kennis, om God se heerskappy te aanvaar. Hulle word ’n deel van die nuwewêreld-gemeenskap, ondersteun God se kant van die geskil oor universele soewereiniteit en bewys dat Satan ’n leuenaar is.
15. Watter skeidingswerk doen Jesus in ons dag?
15 Deur God se heerskappy te kies, voldoen hulle aan die vereistes om aan die “regterhand” van Christus geplaas te word wanneer hy “die skape” van “die bokke” skei. In sy profesie oor die laaste dae het Jesus voorspel: “Voor Hom sal al die nasies versamel word, en Hy sal hulle van mekaar afskei soos die herder die skape van die bokke afskei; en Hy sal die skape aan sy regterhand en die bokke aan sy linkerhand sit.” Die skape is nederige mense wat hulle by Christus se broers skaar en hulle ondersteun, en wat hulle aan God se heerskappy onderwerp. Die bokke is hardnekkige mense wat Christus se broers verwerp en niks doen om God se heerskappy te ondersteun nie. Met watter gevolg? Jesus het gesê: “Hulle [die bokke] sal weggaan in die ewige straf, maar die regverdiges [die skape] in die ewige lewe.”—Mattheüs 25:31-46.
16. Wat moet jy doen as jy in die komende Paradys wil lewe?
16 God gee waarlik vir ons om! Hy gaan binnekort ’n genotvolle aardse paradys tot stand bring. Wil jy graag in daardie Paradys lewe? Indien wel, moet jy jou waardering vir Jehovah se voorsienings toon deur van hom te leer en ag te slaan op wat jy leer. “Soek Jehovah, julle mense, terwyl hy te vinde is. Roep tot hom terwyl hy nog naby is. Laat die goddelose sy weg verlaat en die man van skadelikheid sy gedagtes; en laat hom terugkeer tot Jehovah, wat hom barmhartig sal wees.”—Jesaja 55:6, 7, NW.
17. Waarom moet jy geen tyd verspil om te kies wie jy wil dien nie?
17 Daar is geen tyd te verspil nie. Die einde van hierdie ou stelsel is baie naby. God se Woord vermaan: “Moenie die wêreld liefhê of die dinge wat in die wêreld is nie. As iemand die wêreld liefhet, dan is die liefde van die Vader nie in hom nie . . . En die wêreld gaan verby en sy begeerlikheid, maar hy wat die wil van God doen, bly vir ewig.”—1 Johannes 2:15-17.
18. Watter optrede sal verseker dat jy met vertroue daarna kan uitsien om in God se wonderlike nuwe wêreld te lewe?
18 God se volk word nou opgelei vir die ewige lewe in die nuwe wêreld. Hulle leer die geestelike en ander vaardighede aan wat nodig is om ’n paradys tot stand te bring. Ons spoor jou dringend aan om God as Heerser te kies en die lewensreddende werk te ondersteun wat hy nou deur die hele wêreld heen laat doen. Bestudeer die Bybel saam met Jehovah se Getuies, en leer die God ken wat werklik vir jou omgee en wat ’n einde aan lyding gaan maak. Op hierdie manier kan jy ook ’n deel word van die fondament vir die nuwe wêreld. Dan kan jy met vertroue daarna uitsien om God se guns te verkry en vir ewig in daardie wonderlike nuwe wêreld te lewe.
[Prent op bladsy 31]
Jehovah se Getuies het ’n ware internasionale broederskap
[Prent op bladsy 32]
Die fondament van God se nuwe wêreld is reeds in wording