Wêreldwye broederskap is wis en seker!
DIE sendeling was nog maar ’n kort rukkie in Wes-Afrika toe hy ’n godsdiensbyeenkoms in ’n afgeleë streek bygewoon het. Toe hy ’n plaaslike gesin nader, het ’n tweejarige seuntjie om geen klaarblyklike rede nie skielik begin huil.
Die sendeling het die kind probeer troos, maar die seuntjie het net harder gehuil. “Wat is verkeerd?” wou die sendeling van die moeder weet. Sy het ietwat verleë geantwoord: “Ek dink dis jy. Hy is bang vir jou kleur. Hy het nog nooit ’n witman gesien nie.”
Van kindsbeen af word ons bewus van die fisieke verskille tussen mense. Vooroordele ontwikkel later. Kinders se sienings word gevorm namate hulle die gesindhede en optrede van ouer persone, soos hulle ouers, waarneem. Ook op skool word hulle deur onderwysers, vriende en klasmaats beïnvloed.
’n Langtermyn-studie in die Verenigde State het gewys dat kinders teen 12-jarige ouderdom reeds stereotipe sienings en gesindhede omtrent die etniese, rasse- en godsdiensgroepe om hulle ontwikkel het. Wanneer hulle volwassenheid bereik, is hierdie gesigspunte diep gesetel.
Jehovah se Getuies is anders
In ’n wêreld waar vooroordeel hoogty vier, is die feit dat Jehovah se Getuies baie anders is opmerklik. Hulle is internasionaal bekend vir hulle rasseharmonie, en dit word dikwels deur waarnemers by hulle groot jaarlikse byeenkomste opgemerk.
Die nuusblad States-Item het byvoorbeeld van ’n groot byeenkoms van Getuies in die suide van die Verenigde State gesê: “’n Atmosfeer van broederskap het die Louisiana-Superdome gevul toe Jehovah se Getuies, jonk en oud, swart en wit, plaasgeneem het . . . om te leer en te deel. . . . Rassediskriminasie . . . is nie ’n probleem onder die getuies nie.”
Tydens ’n byeenkoms van Getuies in Suid-Afrika het ’n Xhosa-vrou opgemerk: “Dit is verbasend dat mense van alle rasse hier in Suid-Afrika so eensgesind kan wees. Dit is so anders as waaraan ek in die kerke gewoond was.”
Toe besoekers uit Noord- en Suid-Amerika, asook Europa, groot byeenkomste van Getuies in die Verre-Ooste en die Stille Suidsee-gebied bygewoon het, was daar volgens een berig “geen teken van rassisme onder hulle of hulle gashere te bespeur nie”.
Wat dus die miljoene getuies van Jehovah aardwyd so anders maak, is hulle egte eenheid en rasseharmonie. Hulle word deur ware Christelike liefde saamgesnoer. Dit is net soos Jesus gesê het dit sou wees: “Hieraan sal almal weet dat julle my dissipels is, as julle liefde onder mekaar het.”—Johannes 13:35.
Gevolglik het Jehovah se Getuies reeds ’n ware, blywende internasionale broederskap! Hulle neem Jesus se woorde in Mattheüs 23:8 ter harte: “Julle is almal broeders.” En dit terwyl rasse- en etniese verdeeldheid en haat besig is om die struktuur van nasies uitmekaar te skeur.—Sien ook 1 Korinthiërs 1:10; 1 Johannes 3:10-12; 4:20, 21; 5:2, 3.
Hoe eenheid bereik word
Die grondslag van hierdie eenheid is die Bybelse onderrig wat Jehovah se Getuies by hulle Koninkryksale asook deur hulle persoonlike studie van die Bybel ontvang. Hulle is soos die Christene in Thessalonika van wie die apostel Paulus gesê het: “Toe julle die woord van God ontvang het wat deur ons verkondig is, [het] julle dit aangeneem . . . nie as die woord van mense nie, maar, soos dit werklik is, as die woord van God wat ook werk in julle wat glo.”—1 Thessalonicense 2:13.
Die Getuies glo derhalwe wat die Bybel sê en probeer opreg om God se denke na te volg. Hulle neem die geïnspireerde woorde van die Christenapostel Petrus ter harte: “Ek sien waarlik dat God geen aannemer van die persoon is nie, maar dat in elke nasie die een wat Hom vrees en geregtigheid doen, Hom welgevallig is.”—Handelinge 10:34, 35.
In ooreenstemming hiermee het Jesus sy volgelinge beveel om dissipels van mense “van al die nasies” te maak (Mattheüs 28:19). Jehovah se Getuies soek dus daadwerklik na liefhebbers van geregtigheid onder alle rasse- en etniese groepe, sonder om uitsonderings te maak. En wanneer mense uit verskillende agtergronde en rasse verenig om saam te aanbid, te werk en gesellig te verkeer, word stereotipe denke te bowe gekom. Hulle leer om mekaar te waardeer, om mekaar lief te hê.
Dit is waar dat iemand wat lank rassevooroordeel gekoester het nie sy opvattings dadelik sal verander nie. Maar wanneer hy ’n Getuie word, begin hy hom met “die nuwe persoonlikheid” van ’n ware Christen beklee, en hy streef ernstig daarna om sy vorige opvattings te bowe te kom (Efesiërs 4:22-24, NW). Hy probeer nie om sy vooroordele te regverdig deur te sê: ‘Dis hoe ek grootgeword het’ nie. Nee, hy streef daarna om sy denke te vernuwe en om ‘die hele broederskap lief te hê’.—1 Petrus 2:17, vgl. NW.
Bybelprofesieë word vervul
Wat tans onder Jehovah se Getuies plaasvind, is baie betekenisvol. Trouens, dit is in die Bybel voorspel.
Let op wat volgens die profesie in Jesaja 2:2-4 “aan die einde van die dae”, gedurende hierdie “laaste dae” van die goddelose stelsel van dinge, sou plaasvind (2 Timotheüs 3:1-5, 13). Hierdie profesie van Jesaja wys dat die ware aanbidding van Jehovah in ons geslag tot stand gebring sou word en dat ‘mense uit al die nasies daarheen sou toestroom. En baie volke sal gewis heengaan en sê: “Kom, laat ons optrek na Jehovah se berg van ware aanbidding. Hy sal ons sy weë leer en ons sal in sy paaie wandel.”’
Jesaja se profesie het ook gewys op die volgende buitengewone gevolg wat dwarsdeur die afgelope eeu aardwyd onder Jehovah se Getuies waargeneem is: “En hulle sal van hul swaarde pikke smee en van hul spiese snoeimesse; nie meer sal nasie teen nasie die swaard ophef nie, en hulle sal nie meer leer om oorlog te voer nie.”
Ook die Bybelboek Openbaring het, met verwysing na ons tyd, voorspel dat ’n groot menigte mense “uit alle nasies en stamme en volke en tale” saamgesnoer sou word in ’n ware broederskap om God in eenheid te dien.—Openbaring 7:9, 15.
Dit is nie wensdenkery nie. Die groot menigte uit alle nasies, uit alle rasse- en etniese groepe, word reeds gevorm. ’n Ware en blywende aardwye broederskap word nóú tot stand gebring! Dit is die basis van ’n totaal nuwe, aardwye gemeenskap van verenigde en gelukkige mense wat die plek sal inneem van die huidige verdorwe gemeenskap wat binnekort deur God vernietig sal word. Hierdie verenigde gemeenskap sal, volgens Jesus se woorde, “die aarde beërwe”, en hulle sal vir ewig daarop leef onder die heerskappy van God se Koninkryk.—Mattheüs 5:5; 6:9, 10; Psalm 37:10, 11, 28, 29, 37, 38.
Waarom ondersoek jy dit nie self nie? Besoek gerus enige Koninkryksaal van Jehovah se Getuies en ervaar hulle rasseharmonie. Of nooi die Getuies in wanneer hulle weer by jou deur aanklop, en vra hulle om vir jou in die Bybel te wys wat die basis is van hulle rasseharmonie. Vra hulle om jou te vertel van hulle Bybelse hoop op ’n nuwe wêreld waar ware broederskap aardwyd sal bestaan.
Ons het die waarborg van die almagtige God, Jehovah, dat sy voorneme om ’n broederskap uit die ganse mensdom tot stand te bring, vervul sal word. Hy sê: “So sal my woord wees wat uit my mond uitgaan: dit sal nie leeg na My terugkeer nie, maar doen wat My behaag en voorspoedig wees in alles waartoe Ek dit stuur.”—Jesaja 55:11.
Ons nooi jou uit om die bewyse van Bybelprofesieë en van die vervulling van daardie profesieë te ondersoek. As jy dit doen, sal jy besef rasseharmonie is nie net moontlik nie maar onvermydelik!
[Lokteks op bladsy 9]
Wat tans onder Jehovah se Getuies plaasvind, is in die Bybel voorspel
[Prent op bladsy 10]
Jehovah se Getuies is uniek vanweë hulle ware rasseharmonie