Les 10
Gedrag wat God haat
Hoe moet jy voel oor dinge wat God sê sleg is? (1)
Watter soorte seksuele gedrag is verkeerd? (2)
Wat moet ’n Christen se beskouing wees van leuentaal? (3) dobbelary? (3) diefstal? (3) geweld? (4) spiritisme? (5) dronkenskap? (6)
Hoe kan ’n mens slegte gedrag afleer? (7)
1. Knegte van God moet die goeie liefhê. Maar hulle moet ook leer om die kwaad te haat (Psalm 97:10). Dit beteken dat ons sekere gedrag moet vermy wat God haat. Watter soort gedrag is dit?
2. Hoerery: Voorhuwelikse geslagsomgang, egbreuk, bestialiteit, bloedskande en homoseksualiteit is alles ernstige sondes teen God (Levitikus 18:6; Romeine 1:26, 27; 1 Korintiërs 6:9, 10). As ’n paartjie nie getroud is nie maar saamlewe, moet hulle uitmekaargaan of anders wettig trou.—Hebreërs 13:4.
3. Leuentaal, dobbelary, diefstal: Jehovah God kan nie lieg nie (Titus 1:2). Mense wat sy goedkeuring wil wegdra, moet leuentaal vermy (Spreuke 6:16-19; Kolossense 3:9, 10). Elke vorm van dobbelary is deurtrek van hebsug. Christene neem dus nie aan enige soort dobbelary, soos loterye, perdewedrenne en bingo, deel nie (Efesiërs 5:3-5). En Christene steel nie. Hulle koop nie bewustelik gesteelde eiendom of neem iets sonder toestemming nie.—Exodus 20:15; Efesiërs 4:28.
4. Vlae van toorn, geweld: Onbeheerste woede kan tot gewelddade lei (Genesis 4:5-8). ’n Geweldenaar kan nie God se vriend wees nie (Psalm 11:5; Spreuke 22:24, 25, NW). Dit is verkeerd om wraak te neem of om ander met kwaad te vergeld vir die slegte dinge wat hulle dalk aan ons doen.—Spreuke 24:29; Romeine 12:17-21.
5. Towerspreuke en spiritisme: Party mense vra die hulp van die geeste om siektes te probeer genees. Ander toor hulle vyande sodat hulle siek word of selfs doodgaan. Die mag agter al hierdie gebruike is Satan. Christene moet dus glad nie daarby betrokke raak nie (Deuteronomium 18:9-13). As ’n mens na aan Jehovah bly, is dit die beste beskerming teen towerspreuke wat ander oor ons kan uitspreek.—Spreuke 18:10.
6. Dronkenskap: Dit is nie verkeerd om ’n bietjie wyn, bier of ander sterk drank te drink nie (Psalm 104:15; 1 Timoteus 5:23). Maar strawwe drinkery en dronkenskap is in God se oë verkeerd (1 Korintiërs 5:11-13; 1 Timoteus 3:8). As jy te veel drink, kan dit jou gesondheid verwoes en jou gesin ontwrig. Dit kan ook veroorsaak dat jy baie vinnig aan ander versoekings toegee.—Spreuke 23:20, 21, 29-36.
7. Mense wat dinge beoefen wat God sê sleg is, sal ‘nie God se koninkryk beërf nie’ (Galasiërs 5:19-21). As jy God werklik liefhet en hom wil behaag, kan jy hierdie gedrag afleer (1 Johannes 5:3). Leer om dít te haat wat God sê sleg is (Romeine 12:9). Gaan met mense om wat godvrugtige gewoontes het (Spreuke 13:20). Ryp Christenmetgeselle kan ’n bron van hulp wees (Jakobus 5:14). Vertrou bowenal op God se hulp deur middel van gebed.—Filippense 4:6, 7, 13.
[Prente op bladsy 20, 21]
God haat dronkenskap, diefstal, dobbelary en gewelddade