Les 13

Hoe kan jy die ware godsdiens vind?

Is alle godsdienste vir God aanneemlik, of is daar net een? (1)

Waarom is daar soveel godsdienste wat beweer dat hulle Christelik is? (2)

Hoe kan jy ware Christene identifiseer? (3-7)

1. Jesus het een ware Christelike godsdiens begin. Vandag moet daar dus net een liggaam, of groep, ware aanbidders van Jehovah God wees (Johannes 4:23, 24; Efesiërs 4:4, 5). Die Bybel leer dat daar net ’n paar mense op die smal pad na die lewe is.—Matteus 7:13, 14.

2. Die Bybel het voorspel dat verkeerde leringe en onchristelike gebruike ná die dood van die apostels stadig in die Christengemeente sou inkom. Manne sou gelowiges weglok om húlle in plaas van Christus na te volg (Matteus 7:15, 21-23; Handelinge 20:29, 30). Dit is waarom ons soveel verskillende godsdienste sien wat beweer dat hulle Christelik is. Hoe kan ons ware Christene identifiseer?

3. Die uitsonderlikste kenmerk van ware Christene is dat hulle ware liefde onder mekaar het (Johannes 13:34, 35). Hulle word nie geleer om te dink dat hulle beter is as mense van ’n ander ras of velkleur nie. Hulle word ook nie geleer om mense van ander lande te haat nie (Handelinge 10:34, 35). Daarom neem hulle nie aan oorloë deel nie. Ware Christene behandel mekaar soos broers en susters.—1 Johannes 4:20, 21.

4. Nog ’n kenmerk van die ware godsdiens is dat sy lede groot respek vir die Bybel het. Hulle aanvaar dit as die Woord van God en glo wat dit sê (Johannes 17:17; 2 Timoteus 3:16, 17). Hulle beskou God se Woord belangriker as menslike idees of gebruike (Matteus 15:1-3, 7-9). Hulle probeer in hulle daaglikse lewe volgens die Bybel lewe. Hulle sê dus nie een ding en doen dan iets anders nie.—Titus 1:15, 16.

5. Die ware godsdiens moet ook God se naam eer (Matteus 6:9). Jesus het God se naam, Jehovah, aan ander bekend gemaak. Ware Christene moet dieselfde doen (Johannes 17:6, 26; Romeine 10:13, 14). Wie is die mense in jou gemeenskap wat ander van God se naam vertel?

6. Ware Christene moet God se Koninkryk verkondig. Jesus het dit gedoen. Hy het altyd oor die Koninkryk gepraat (Lukas 8:1). Hy het sy dissipels opdrag gegee om hierdie selfde boodskap in die hele aarde te verkondig (Matteus 24:14; 28:19, 20). Ware Christene glo dat net God se Koninkryk ware vrede en veiligheid vir hierdie aarde gaan bring.—Psalm 146:3-5.

7. Jesus se dissipels moet geen deel van hierdie goddelose wêreld wees nie (Johannes 17:16). Hulle raak nie by die wêreld se politieke aangeleenthede en maatskaplike geskille betrokke nie. Hulle vermy die skadelike gedrag, gebruike en gesindhede wat in die wêreld algemeen is (Jakobus 1:27; 4:4). Kan jy ’n godsdiensgroep in jou gemeenskap identifiseer wat hierdie kenmerke van ware Christene het?

[Prente op bladsy 26, 27]

Ware Christene het mekaar lief, respekteer die Bybel en verkondig God se Koninkryk