Die siel volgens die Bybel
“Die mens [het] ’n lewende siel geword.”—GENESIS 2:7.
1. Wat moet ons ondersoek om vas te stel wat die Bybel aangaande die siel leer?
SOOS ons gesien het, is daar talle uiteenlopende beskouings oor die siel. Selfs onder diegene wat beweer dat hulle hulle beskouings op die Bybel baseer, is daar verskillende idees oor wat die siel is en wat daarmee gebeur wanneer ons sterf. Maar wat leer die Bybel werklik aangaande die siel? Om uit te vind, moet ons die betekenis ondersoek van die Hebreeuse en Griekse woorde wat in die Bybel met “siel” vertaal word.
“Siel” as ’n lewende skepsel
2, 3. (a) Watter woord word met “siel” in die Hebreeuse Geskrifte vertaal, en wat is die basiese betekenis van hierdie woord? (b) Hoe bevestig Genesis 2:7 dat die woord “siel” na ’n hele persoon kan verwys?
2 Die Hebreeuse woord wat met “siel” vertaal word, is neʹfesj, en dit kom 754 keer voor in die Hebreeuse Geskrifte (wat gewoonlik die Ou Testament genoem word). Wat beteken neʹfesj? Volgens The Dictionary of Bible and Religion verwys dit “gewoonlik na die hele lewende wese, na die hele individu”.
3 Genesis 2:7 sê byvoorbeeld: “Die HERE God het die mens geformeer uit die stof van die aarde en in sy neus die asem van die lewe geblaas. So het dan die mens ’n lewende siel geword.” Let op dat Adam nie ’n siel gehad het nie; hy was ’n siel—net soos iemand wat ’n dokter word ’n dokter is. Die woord “siel” kan derhalwe ’n persoon in sy geheel beskryf.
4, 5. (a) Gee voorbeelde wat toon dat die woord “siel” na ’n hele persoon verwys? (b) Hoe staaf The Dictionary of Bible and Religion die begrip dat ’n persoon ’n siel is?
4 Hierdie begrip word regdeur die Hebreeuse Geskrifte gestaaf, waar ons uitdrukkings vind soos “in geval ’n siel sondig” (Levitikus 5:1, NW), “enige siel wat enige soort werk sal verrig” (Levitikus 23:30, NW), “in geval ’n man betrap word dat hy ’n siel . . . ontvoer” (Deuteronomium 24:7, NW), ‘sy siel het ongeduldig geraak’ (Rigters 16:16, NW), “hoe lank sal julle my siel kwel?” (Job 19:2) en “my siel drup weg van kommer”.—Psalm 119:28.
5 Daar is geen aanduiding in hierdie gedeeltes dat die siel ’n skimagtige wese is wat ná die dood voortleef nie. “Om in ons terme te sê dat die ‘siel’ van die geliefde hom verlaat het om by die Here te wees of om van die ‘onsterflike siel’ te praat, sou eenvoudig nie verstaanbaar wees in die kultuur van die OT [Ou Testament] nie”, sê The Dictionary of Bible and Religion.
6, 7. Watter woord word as “siel” in die Christelike Griekse Geskrifte vertaal, en wat is die basiese betekenis van hierdie woord?
6 Psu·kheʹ is die woord wat meer as honderd keer met “siel” vertaal word in die Christelike Griekse Geskrifte (wat gewoonlik die Nuwe Testament genoem word). Soos neʹfesj, verwys hierdie woord dikwels na ’n hele persoon. Kyk byvoorbeeld na die volgende stellings: “My siel [is] verontrus” (Johannes 12:27). “Vrees het op elke siel begin val” (Handelinge 2:43). “Laat elke siel onderdanig wees aan die hoër owerhede” (Romeine 13:1). “Praat vertroostend met die terneergedrukte siele” (1 Tessalonisense 5:14). “’n Paar mense, naamlik agt siele, [is] veilig deur die water heen gevoer.”—1 Petrus 3:20.
7 Soos neʹfesj, verwys psu·kheʹ ongetwyfeld na die hele persoon. Volgens die geleerde Nigel Turner beteken hierdie woord “dit wat kenmerkend van ’n mens is, jyself, die stoflike liggaam waarin God se rûah [gees] geblaas is. . . . Die klem is op die hele persoon.”
8. Is diere siele? Verduidelik.
8 In die Bybel word die woord “siel” nie net op mense toegepas nie, maar ook op diere. In die beskrywing van die skepping van seeskepsele sê Genesis 1:20 (NW) byvoorbeeld dat God beveel het: “Laat die waters ’n gewemel van lewende siele voortbring.” En op die volgende skeppingsdag het God gesê: “Laat die aarde lewende siele voortbring volgens hulle soorte, mak diere en bewegende diere en wilde diere van die aarde volgens hulle soorte.” (Genesis 1:24, NW; vergelyk Numeri 31:28, NW.) “Siel” kan derhalwe na ’n lewende skepsel verwys, hetsy mens of dier.
“Siel” as die lewe van ’n skepsel
9. (a) Watter wyer betekenis kan ook aan die woord “siel” geheg word? (b) Bots dit met die idee dat die siel die persoon self is?
9 Soms verwys die woord “siel” na die lewe wat ’n persoon of ’n dier geniet. Dit verander nie die Bybel se definisie van die siel as ’n persoon of ’n dier nie. Ter toeligting: Ons sê dat iemand lewend is, wat beteken dat hy ’n lewende persoon is. Ons kan ook sê dat hy lewe besit. ’n Lewende persoon is insgelyks ’n siel. Maar terwyl hy lewe, kan daar van die “siel” gepraat word as iets wat hy besit.
10. Gee voorbeelde om te toon dat die woord “siel” na die lewe kan verwys wat ’n persoon of ’n dier geniet.
10 God het byvoorbeeld vir Moses gesê: “Al die manne wat jou siel gesoek het, is dood” (Exodus 4:19, NW). Moses se vyande wou hom ongetwyfeld om die lewe bring. Soortgelyke gebruike van die woord “siel” word in die volgende stellings gesien. “Ons [het] baie bang geword ter wille van ons siel” (Josua 9:24, NW). “Hulle het bly vlug vir hulle siel” (2 Konings 7:7, NW). “Die regverdige sorg vir die siel van sy mak dier” (Spreuke 12:10, NW). “Die Seun van die mens [het] gekom . . . om sy siel te gee as ’n losprys in ruil vir baie” (Matteus 20:28). “Hy [het] baie na aan die dood gekom, deurdat hy sy siel aan gevaar blootgestel het” (Filippense 2:30). In elke geval beteken die woord “siel” “lewe”.a
11. Wat kan van die Bybel se gebruik van die woord “siel” gesê word?
11 Die woord “siel” soos dit in die Bybel gebruik word, verwys dus na ’n persoon of ’n dier of na die lewe wat ’n persoon of ’n dier geniet. Die Bybel se definisie van die siel is eenvoudig, konsekwent en vry van die ingewikkelde filosofieë en bygelowe van mense. Maar wat gebeur met die siel by die dood? Om hierdie vraag te beantwoord, moet ons eers verstaan waarom ons sterf.
[Voetnoot]
a Matteus 10:28 gebruik ook die woord “siel” in die betekenis van “lewe”.
[Prente op bladsy 20]
Hulle is almal siele