Wagtoring – AANLYN BIBLIOTEEK
Wagtoring
AANLYN BIBLIOTEEK
Afrikaans
  • BYBEL
  • PUBLIKASIES
  • VERGADERINGE
  • ie bl. 22-24
  • Wat gebeur by die dood met die siel?

Video nie beskikbaar nie.

Jammer, die video kon nie laai nie.

  • Wat gebeur by die dood met die siel?
  • Wat gebeur met ons wanneer ons sterf?
  • Onderhofies
  • Soortgelyke materiaal
  • Die dooies is in ’n toestand van onbewustheid
  • Die siel kan sterf
  • “Uitgaan” en ‘terugkeer’
  • Die dilemma van die “tussenstadium”
  • Wat is die gees?
  • Lewe ná die dood—Wat sê die Bybel?
    Die Wagtoring kondig Jehovah se Koninkryk aan—1999
  • Het jy ’n onsterflike siel?
    Die Wagtoring kondig Jehovah se Koninkryk aan—2007
  • Lewe die siel na die dood voort?
    Die Wagtoring kondig Jehovah se Koninkryk aan—1990
  • Die siel
    Ontwaak!—2015
Sien nog
Wat gebeur met ons wanneer ons sterf?
ie bl. 22-24

Wat gebeur by die dood met die siel?

“Die leerstelling dat die mensesiel onsterflik is en ná die mens se dood en die ontbinding van sy liggaam sal voortbestaan, is een van die hoekstene van die Christelike filosofie en teologie.”—“NEW CATHOLIC ENCYCLOPEDIA.”

1. Wat erken die New Catholic Encyclopedia aangaande die siel wat ná die dood voortleef?

DIE bogemelde naslaanwerk erken egter: “Die idee dat die siel ná die dood voortleef, is nie maklik in die Bybel te vinde nie”. Wat leer die Bybel dan in werklikheid oor wat by die dood met die siel gebeur?

Die dooies is in ’n toestand van onbewustheid

2, 3. Wat is die toestand van die dooies, en watter tekste toon dit?

2 Die toestand van die dooies word duidelik gestel in Prediker 9:5, 10, waar ons lees: “Die dooies weet niks nie . . . Daar is geen strewe, geen planne, geen kennis of intelligensie in die graf nie” (Moffatt). Die dood is dus ’n toestand van niebestaan. Wanneer die mens sterf, ‘keer hy na sy aarde toe terug; op daardie dag is dit met sy planne gedaan’, het die psalmis geskryf.—Psalm 146:4.

3 Die dooies is dus in ’n toestand van onbewustheid, onbedrywigheid. Toe God oordeel oor Adam uitgespreek het, het hy gesê: “Stof is jy, en tot stof sal jy terugkeer” (Genesis 3:19). Voordat God Adam uit die stof van die aarde geformeer en aan hom lewe gegee het, het hy nie bestaan nie. Toe Adam gesterf het, het hy na daardie toestand teruggekeer. Sy straf was die dood—nie ’n oorplasing na ’n ander ryk nie.

Die siel kan sterf

4, 5. Gee voorbeelde uit die Bybel wat toon dat die siel kan sterf.

4 Wat het met Adam se siel gebeur toe hy gesterf het? Wel, onthou dat die woord “siel” in die Bybel dikwels bloot na ’n persoon verwys. Wanneer ons dus sê dat Adam gesterf het, sê ons dat die siel met die naam Adam gesterf het. Dit klink dalk vreemd vir iemand wat aan die onsterflikheid van die siel glo. Maar die Bybel sê: “Die siel wat sondig, dié moet sterwe” (Esegiël 18:4). Levitikus 21:1 (NW) praat van “’n afgestorwe siel” (’n “lyk”, Jerusalem Bible). En Nasireërs is aangesê om nie naby “enige dooie siel” (“’n dooie liggaam”, Lamsa) te kom nie.—Numeri 6:6, NW.

5 ’n Soortgelyke verwysing na die siel word in 1 Konings 19:4 (NW) gevind. Elia, wat erg ontsteld was, het “begin vra dat sy siel mag sterf”. Jona het insgelyks “bly vra dat sy siel mag sterf, en hy het herhaaldelik gesê: ‘Dit is vir my beter om te sterf as om te lewe’” (Jona 4:8, NW). En Jesus gebruik die uitdrukking ‘om ’n siel dood te maak’, wat The Bible in Basic English weergee as “om dood te maak” (Markus 3:4). Die dood van die siel beteken dus eenvoudig die dood van die persoon.

“Uitgaan” en ‘terugkeer’

6. Wat bedoel die Bybel wanneer dit sê dat Ragel se siel “uitgegaan” het?

6 Maar wat van die tragiese dood van Ragel, wat plaasgevind het toe sy aan haar tweede seun geboorte gegee het? In Genesis 35:18 lees ons: “Toe haar siel uitgaan—want sy het gesterwe—noem sy hom Ben-Oni. Maar sy vader het hom Benjamin genoem.” Gee hierdie gedeelte nie te kenne dat Ragel ’n innerlike wese gehad het wat haar by die dood verlaat het nie? Hoegenaamd nie. Onthou dat die woord “siel” ook kan verwys na die lewe wat ’n persoon het. In hierdie geval het Ragel se “siel” dus bloot haar “lewe” beteken. Daarom vertaal ander Bybels die frase ‘haar siel gaan uit’ met “haar lewe het uitgevloei” (Knox), “sy het haar laaste asem uitgeblaas” (Jerusalem Bible) en “haar lewe het uit haar uitgegaan” (Bible in Basic English). Daar is geen aanduiding dat ’n geheimsinnige deel van Ragel ná haar dood voortgeleef het nie.

7. In watter opsig het die siel van die weduwee se verrese seun “in hom teruggekeer”?

7 Die opstanding van ’n weduwee se seun, wat in 1 Konings hoofstuk 17 opgeteken is, is iets soortgelyks. Terwyl Elia oor die jong seun gebid het, het “die HERE . . . Elia verhoor; en die siel van die kind het in hom teruggekeer, sodat hy weer lewendig geword het”, soos ons in vers 22 lees. Weer eens beteken die woord “siel” “lewe”. Daarom sê die New American Standard Bible: “Die lewe van die kind het in hom teruggekeer, en hy het weer begin lewe.” Ja, dit was lewe wat in die kind teruggekeer het, en nie die een of ander skimagtige vorm nie. Dit is in harmonie met wat Elia vir die seun se moeder gesê het: “Kyk, jou seun [die hele persoon] lewe!”—1 Konings 17:23.

Die dilemma van die “tussenstadium”

8. Wat glo baie verklaarde Christene sal gedurende die opstanding gebeur?

8 Baie verklaarde Christene glo dat daar ’n toekomstige opstanding gaan wees wanneer liggame met onsterflike siele verenig sal word. Dan word die verresenes finaal geoordeel—’n beloning vir diegene wat ’n goeie lewe gelei het of vergelding vir die goddeloses.

9. Wat word bedoel met die uitdrukking “tussenstadium”, en wat sê party gebeur met die siel gedurende hierdie tydperk?

9 Hierdie opvatting klink eenvoudig. Maar diegene wat aan die onsterflikheid van die siel glo, vind dit moeilik om te verduidelik wat met die siel gebeur van die sterfdag tot die tyd van die opstanding. Trouens, hierdie “tussenstadium”, soos dit dikwels genoem word, het eeue lank al tot spekulasie gelei. Party sê dat die siel gedurende hierdie tyd na die vaevuur gaan, waar dit van daaglikse sonde gereinig kan word sodat dit vir die hemel geskik sal wees.a

10. Waarom is dit onskriftuurlik om te glo dat siele ná die dood in die vaevuur vertoef, en hoe lig die ondervinding van Lasarus dit toe?

10 Maar soos ons reeds gesien het, is die siel eenvoudig die persoon. Wanneer die persoon sterf, sterf die siel. Gevolglik is daar geen bewuste bestaan ná die dood nie. Trouens, toe Lasarus gesterf het, het Jesus Christus nie gesê dat hy in die vaevuur, Limbo of enige ander “tussenstadium” is nie. Jesus het eerder net gesê: “Lasarus slaap” (Johannes 11:11, New English Bible). Jesus, wat die waarheid weet aangaande wat by die dood met die siel gebeur, het ongetwyfeld geglo dat Lasarus in ’n onbewuste toestand was, dat hy nie bestaan het nie.

Wat is die gees?

11. Waarom kan die woord “gees” nie na ’n liggaamlose deel van ’n persoon verwys wat ná die dood voortleef nie?

11 Wanneer iemand sterf, sê die Bybel dat sy ‘gees uitgaan en hy na sy aarde toe terugkeer’ (Psalm 146:4). Beteken dit dat ’n liggaamlose gees letterlik vertrek en ná ’n persoon se dood voortleef? Dit kan nie die geval wees nie, want die psalmis sê voorts: “Op daardie dag is dit met sy planne gedaan” (“eindig al sy gedagtes”, NEB). Wat is die gees dan, en hoe ‘gaan dit uit’ ’n persoon wanneer hy sterf?

12. Wat beteken die Hebreeuse en Griekse woorde wat in die Bybel met “gees” vertaal is?

12 In die Bybel beteken die woorde wat met “gees” (Hebreeus, roeʹach; Grieks, pneuʹma) vertaal word basies “asem”. Daarom gebruik die vertaling van R. A. Knox die frase “die asem verlaat sy liggaam”, in plaas van “sy gees gaan uit” (Psalm 146:4, Knox). Maar die woord “gees” impliseer baie meer as net die asemhalingsproses. Waar die vernietiging van mense- en dierelewe tydens die wêreldvloed bespreek word, sê Genesis 7:22 (NW) byvoorbeeld: “Alles waarin die asem van die lewenskrag [of gees; Hebreeus, roeʹach] in sy neusgate werksaam was, naamlik alles wat op die droë grond was, het gesterf.” “Gees” kan dus na die lewenskrag verwys wat in alle lewende skepsele, mense sowel as diere, werksaam is en wat deur asemhaling onderhou word.

13. Hoe kan die gees met ’n elektriese stroom vergelyk word?

13 Ter toeligting: ’n Elektriese stroom verskaf krag aan ’n toestel. As die stroom ophou vloei, hou die toestel op met werk. Die stroom neem nie ’n eie lewe aan nie. Wanneer ’n persoon sterf, hou sy gees insgelyks op om die liggaamselle aan die lewe te hou. Dit verlaat nie die liggaam en gaan na ’n ander ryk nie.—Psalm 104:29.

14, 15. Hoe keer die gees na God terug by die dood?

14 Maar waarom sê Prediker 12:7 dan dat “die gees na God terugkeer wat dit gegee het” wanneer ’n persoon sterf? Beteken dit dat die gees letterlik deur die ruimte reis tot in God se teenwoordigheid? Dit is hoegenaamd nie wat geïmpliseer word nie. Onthou dat die gees die lewenskrag is. As daardie lewenskrag eers weg is, kan net God dit teruggee. Die gees ‘keer dus na God terug’ in die sin dat enige hoop op toekomstige lewe vir daardie persoon nou geheel en al by God berus.

15 Net God kan die gees, oftewel lewenskrag, teruggee en die persoon weer laat lewe (Psalm 104:30). Maar is God van voorneme om dit te doen?

[Voetnoot]

a Volgens die New Catholic Encyclopedia het “die [Kerk]vaders oor die algemeen duidelik bevestig dat daar ’n vaevuur is”. Tog erken hierdie naslaanwerk ook dat “die Katolieke leerstelling van die vaevuur op tradisie gebaseer is en nie op die Heilige Skrif nie”.

[Venster op bladsy 23]

Herinneringe aan ’n vorige lewe

AS NIKS ná die dood van die liggaam voortleef nie, wat dan van die herinneringe aan ’n vorige lewe wat party na bewering het?

Die Hindoegeleerde Nikhilananda sê dat ‘ondervindinge ná die dood nie deur rede verklaar kan word nie’. In die lesing “Voorbeelde in godsdienste van geloof in die ewigheid” sê die teoloog Hans Küng: “Nie een van die verslae—meestal van kinders of van lande waar daar aan reïnkarnasie geglo word—van herinneringe aan ’n vorige lewe kon bevestig word nie.” Hy sê voorts: “Die meeste van [die navorsers wat ywerig en op wetenskaplike gebied daaraan werk,] erken dat die ondervindinge wat hulle ondersoek het, nie die grondslag voorsien vir werklik oortuigende bewyse dat aardse lewe herhaal word nie.”

Sê nou jy meen dat jy persoonlike herinneringe aan ’n vorige lewe het? Sulke gevoelens kan weens verskeie faktore ontstaan. Baie van die inligting wat ons ontvang, word in die een of ander hoekie van ons onderbewussyn weggebêre omdat ons dit nie onmiddellik nodig het nie. Wanneer vergete herinneringe weer opkom, vertolk party mense dit as ’n bewys van ’n vorige lewe. Feit is nietemin dat ons geen bewysbare ondervindinge van enige ander lewe behalwe ons huidige lewe het nie. Die meeste mense wat vandag op die aarde lewe, het hoegenaamd geen herinnering aan ’n vorige lewe nie; en hulle dink ook nie dat hulle voorheen gelewe het nie.

    Afrikaanse publikasies (1975-2025)
    Meld af
    Meld aan
    • Afrikaans
    • Deel
    • Voorkeure
    • Copyright © 2025 Watch Tower Bible and Tract Society of Pennsylvania
    • Gebruiksvoorwaardes
    • Privaatheidsbeleid
    • Privaatheidsinstellings
    • JW.ORG
    • Meld aan
    Deel