Jesus Christus—Wie is hy?

“SELFS baie mense wat nie Christene is nie, glo dat Hy ’n groot en wyse onderrigter was. Hy was beslis een van die invloedrykste mense wat nog geleef het” (The World Book Encyclopedia). Wie is “Hy”? Jesus Christus, die stigter van die Christelike geloof. Weet jy wie hy is? Oefen hy enigsins ’n invloed op jou lewe uit?

Die gebeure tydens Jesus se bediening is in die Bybel opgeteken in vier geskiedkundige werke wat die Evangelies genoem word. Hoe eg is hierdie verslae? Nadat die bekende geskiedskrywer Will Durant dit noukeurig ondersoek het, het hy geskryf: “As ’n paar eenvoudige manne in een geslag so ’n kragtige en aantreklike persoon, so ’n verhewe etiek en so ’n besielende visioen van die broederskap van die mens kon skep, sou dit ’n wonderwerk wees wat veel groter is as enige van dié wat in die Evangelies opgeteken is.”

Vir miljoene mense in die Ooste en elders is Jesus Christus egter ’n vreemdeling. Hulle glo dalk dat hy gelewe het, maar hulle dink nie dat hy enige invloed op hulle lewe uitoefen nie. Ander meen dat Jesus nie hulle aandag werd is nie weens die dinge wat sy voorgewende volgelinge al gedoen het. Sommige mense in Japan sê moontlik: ‘Hulle het ’n atoombom op Nagasaki gegooi, ’n stad met meer Christene as die meeste ander stede in Japan.’

Sal jy egter ’n dokter blameer vir ’n pasiënt se siekte as die pasiënt versuim het om by die dokter se voorskrif te bly? Natuurlik nie. Mense in die Christendom ignoreer al lank Jesus se voorskrifte om hulle daaglikse probleme te oorbrug. Pleks van Jesus te verwerp weens sogenaamde Christene, wat nie sy riglyne volg nie, kan jy eerder self iets oor hom leer. Ondersoek die Bybel en kyk wie Jesus werklik is en hoe hy selfs jóú lewe kan verander.

Liefde—sy voorskrif

Jesus Christus was ’n groot onderrigter wat byna 2 000 jaar gelede in Palestina gelewe het. Baie min is oor sy kinderdae bekend (Matteus, hoofstukke 1 en 2; Lukas, hoofstukke 1 en 2). Toe hy 30 geword het, het Jesus begin met sy bediening om “van die waarheid te getuig” (Johannes 18:37; Lukas 3:21-23). Die vier geskiedkundige verslaggewers van Jesus se lewe het die aandag gevestig op sy openbare bediening, die laaste drie en ’n half jaar van sy aardse lewe.

Gedurende Jesus se bediening het hy vir sy dissipels die sleutel gegee waarmee hulle verskeie probleme in hulle lewe uit die weg kon ruim. Wat was hierdie sleutel? Dit was liefde. In een van die bekendste preke in die geskiedenis, die Bergpredikasie, het Jesus sy dissipels geleer hoe om liefde teenoor hulle medemens te betoon. Hy het gesê: “Alles wat julle dus wil hê dat die mense aan julle moet doen, moet julle ook net so aan hulle doen” (Matteus 7:12). Hierdie beginsel word die Gulde Reël genoem. Die “mense” na wie Jesus hier verwys het, sluit selfs ’n mens se vyande in. In dieselfde preek het hy gesê: “Hou aan om julle vyande lief te hê en om te bid vir dié wat julle vervolg” (Matteus 5:44). Sal sulke liefde nie baie van die probleme oplos waarvoor ons vandag te staan kom nie? Die Hindoeleier Mohandas Gandhi het so gedink. Hy het volgens berig gesê: “Wanneer [ons] die leerstellings toepas wat deur Christus in hierdie Bergpredikasie gemeld is, sal ons die probleme . . . van die hele wêreld opgelos het.” Jesus se leer oor liefde kan, indien dit toegepas word, die mensdom se probleme oplos.

Sy liefde in aksie

Jesus se woorde en dade het ooreengestem. Hy het ander se belange voor sy eie gestel en liefde in aksie getoon. Op ’n dag het Jesus en sy dissipels vir baie mense gepreek, sonder om die tyd te neem om iets te eet. Jesus het gesien dat sy dissipels ‘’n bietjie moes rus’, en daarom het hulle na ’n eensame plek toe gegaan. Maar ’n skare het voor hulle daar aangekom en vir hulle gewag. Hoe sou jy gereageer het as jy in Jesus se posisie was? Wel, Jesus “is ontroer deur medelye met hulle” en “het hulle baie dinge begin leer” (Markus 6:30-34). Hierdie sterk gevoel van medelye het hom beweeg om aan te bied om ander te help.

Wat Jesus ten behoewe van ander gedoen het, was nie tot geestelike onderrigting beperk nie. Hy het ook praktiese hulp verleen. Hy het byvoorbeeld 5 000 mans (buiten vroue en kinders) gevoed wat op ’n dag tot laat na hom geluister het. By ’n ander geleentheid het hy nóg 4 000 gevoed. Die eerste keer het hy vyf brode en twee visse gebruik, en die tweede keer sewe brode en ’n paar vissies (Matteus 14:14-21; 15:32-38; Markus 6:35-44; 8:1-9). Wonderwerke? Ja, hy was ’n wonderdoener.

Jesus het ook talle siekes genees. Hy het die blindes, die lammes, die melaatses en die dowes gesond gemaak. Hy het dan selfs die dooies opgewek! (Lukas 7:22; Johannes 11:30-45). ’n Melaatse het hom op ’n keer gesmeek: “As u net wil, kan u my rein maak.” Hoe het Jesus gereageer? “Hy [het] sy hand uitgesteek en hom aangeraak en vir hom gesê: ‘Ek wil. Word gereinig’” (Markus 1:40, 41). Jesus is beweeg deur ’n sterk begeerte om hom te help. Deur sulke wonderwerke het hy sy liefde getoon vir dié wat ly.

Moeilik om te glo? Maar Jesus het die meeste van sy wonderwerke in die openbaar verrig. Selfs sy teenstanders, wat by elke geleentheid met hom probeer foutvind het, kon nie die feit ontken dat hy wonderwerke verrig het nie (Johannes 9:1-34). Buitendien het sy wonderwerke ’n doel gehad. Hulle het mense gehelp om Jesus te identifiseer as die een wat deur God gestuur is.—Johannes 6:14.

’n Kort oorsig van Jesus se leringe en sy lewe maak hom bemind by ons en beweeg ons om sy liefde na te boots. Maar dit is nie die enigste manier waarop Jesus ons lewe kan beïnvloed nie. Hy was nie net ’n groot onderrigter wat liefde aan ander geleer het nie. Hy het getoon dat hy ’n voormenslike bestaan gehad het as die enigverwekte Seun van God (Johannes 1:14; 3:16; 8:58; 17:5; 1 Johannes 4:9). Hy lewe ook nou ná sy dood, wat hom vir jou van selfs groter belang maak. Die Bybel toon dat Jesus opgewek is en nou as Koning van God se Koninkryk gekroon is (Openbaring 11:15). Jesus het gesê: “Dít beteken die ewige lewe, dat hulle kennis inneem van u, die enigste ware God, en van die een wat u uitgestuur het, Jesus Christus” (Johannes 17:3; 20:31). Trouens, om kennis van Jesus Christus in te neem, kan ewige lewe in die Paradys beteken! Hoe is dit moontlik? Leer gerus meer oor Jesus en kyk hoe ‘die liefde wat die Christus het ons dring’ om hom na te volg (2 Korintiërs 5:14). Jehovah se Getuies sal jou met graagte help.—Johannes 13:34, 35.

Tensy anders aangedui, kom alle Skrifgedeeltes uit die Nuwe Wêreld-vertaling van die Christelike Griekse Geskrifte.