Hoofstuk tien

Wie kan teen die Vors van die vorste staande bly?

1, 2. Waarom is die visioen wat Daniël in die derde jaar van Belsasar se heerskappy gehad het vir ons van belang?

SEWE-EN-VYFTIG jaar het verbygegaan sedert Jehovah se tempel in Jerusalem vernietig is. Belsasar en sy vader, Nabonidus, heers saam oor die Babiloniese Ryk, die derde wêreldmoondheid van Bybelprofesie.a God se profeet Daniël is ’n banneling in Babilon. En gedurende “die derde jaar van die regering van koning Belsasar” stuur Jehovah aan Daniël ’n visioen wat sekere besonderhede oor die herstel van ware aanbidding bekend maak.—Daniël 8:1.

² Die profetiese visioen wat Daniël gesien het, het ’n groot uitwerking op hom gehad en is van groot belang vir ons wat vandag gedurende “die tyd van die einde” lewe. Die engel Gabriël sê vir Daniël: “Kyk, ek maak jou bekend wat aan die einde van die strafgerig sal gebeur, want dit sien op die bepaalde tyd van die einde” (Daniël 8:16, 17, 19, 27). Kom ons gee dan ons noukeurige aandag terwyl ons bespreek wat Daniël gesien het en wat dit vandag vir ons beteken.

’N RAM MET TWEE HORINGS

3, 4. Watter dier het Daniël voor die rivier sien staan, en wat stel hy voor?

³ “Ek het naamlik in die gesig gesien”, skryf Daniël, “terwyl ek kyk, was ek in die vesting Susan wat in die provinsie Elam lê; en ek het in die gesig gesien dat ek my aan die Ulairivier bevind het” (Daniël 8:2). Of Daniël werklik in Susan (Susa)—die hoofstad van Elam, sowat 350 kilometer oos van Babilon—was, en of hy net in sy visioen daar was, word nie gesê nie.

⁴ Daniël gaan voort: “Ek het my oë opgeslaan en gesien, en kyk, daar staan ’n ram voor die rivier; en hy het twee horings gehad” (Daniël 8:3a). Die identiteit van die ram bly nie vir Daniël ’n geheim nie. Die engel Gabriël sê later: “Die ram wat jy gesien het met die twee horings, is die konings van die Meders en die Perse” (Daniël 8:20). Die Meders het van die bergagtige plato oos van Assirië gekom, en die Perse het oorspronklik ’n merendeels nomadiese lewe in die streek noord van die Persiese Golf gelei. Namate die Medo-Persiese Ryk gegroei het, het sy bewoners ’n besondere liefde vir luukshede ontwikkel.

5. Hoe het die horing wat “laaste uitgekom” het, hoër geword?

⁵ “Die twee horings was hoog”, vertel Daniël, “ook was die een hoër as die ander, en die hoogste het laaste uitgekom” (Daniël 8:3b). Die hoër horing wat later uitgekom het, beeld die Perse af, terwyl die ander horing die Meders voorstel. Die Meders was aanvanklik die dominante volk. Maar in 550 v.G.J. het Kores, die heerser van Persië, maklik die oorwinning oor die Mediese koning Astuages behaal. Kores het die gebruike en wette van die twee volke gekombineer, hulle koninkryke verenig en hulle verowerings uitgebrei. Van toe af was die ryk tweeledig van aard.

DIE RAM HOU HOM GROOT

6, 7. Hoe was dit dat ‘al die diere nie voor die ram kon standhou nie’?

⁶ Daniël gaan voort met sy beskrywing van die ram en sê: “Ek het die ram sien stoot na die weste en na die noorde en na die suide, en al die diere kon voor hom nie standhou nie, en daar was niemand wat uit sy mag gered het nie; maar hy het gedoen net wat hy wou, en het magtig geword [“het hom baie groot gehou”, NW].”—Daniël 8:4.

⁷ In die vorige visioen wat aan Daniël gegee is, is Babilon afgebeeld deur die wilde dier wat uit die see opgeklim het en soos ’n leeu met die vlerke van ’n arend gelyk het (Daniël 7:4, 17). Daardie simboliese dier kon nie voor “die ram” van hierdie nuwe visioen staande bly nie. Babilon het in 539 v.G.J. voor Kores die Grote geval. Byna 50 jaar daarna kon “al die diere”, of politieke heerskappye, nie teen die Medo-Persiese Ryk—die vierde wêreldmoondheid van Bybelprofesie—opstaan nie.

8, 9. (a) Hoe het “die ram . . . na die weste en na die noorde en na die suide” gestoot? (b) Wat sê die boek Ester oor die opvolger van die Persiese koning Darius I?

⁸ Die Medo-Persiese Wêreldmoondheid het “uit die Ooste” gekom en gemaak net soos hy wou en het gestoot “na die weste en na die noorde en na die suide” (Jesaja 46:11). Koning Kambuses II, wat Kores die Grote opgevolg het, het Egipte verslaan. Sy opvolger was die Persiese koning Darius I, wat in 513 v.G.J. weswaarts beweeg het oor die straat van Bosporus en die Europese gebied van Trasië ingeval het, waarvan Bisantium (nou Istanboel) die hoofstad was. In die jaar 508 v.G.J. het hy Trasië onderwerp, en in 496 v.G.J. het hy Masedonië oorwin. Teen die tyd van Darius het die Medo-Persiese “ram” dus in drie hoofrigtings gebied ingeneem: noord tot in Babilonië en Assirië, wes deur Klein-Asië en suid tot in Egipte.

⁹ Die Bybel getuig van die grootheid van die Medo-Persiese Ryk en noem Darius se opvolger, Xerxes I, “die Ahasveros wat geregeer het van Indië af tot by Kus, honderd-sewen-en-twintig provinsies” (Ester 1:1). Maar hierdie groot ryk sou plek maak vir ’n ander een, en in hierdie verband bring Daniël se visioen ’n paar interessante besonderhede aan die lig wat ons geloof in God se profetiese woord behoort te versterk.

DIE BOK STOOT DIE RAM OM

10. Watter dier het in Daniël se visioen “die ram” omgestoot?

¹⁰ Stel jou Daniël se verwondering voor oor wat hy nou sien. Die verslag sê: “Terwyl ek daarop ag gee, kom daar ’n bokram uit die weste aan oor die oppervlakte van die hele aarde, sonder om aan die grond te raak; en die bok het ’n aansienlike horing tussen sy oë gehad. En hy het na die ram met die twee horings aangekom wat ek voor die rivier sien staan het, en hom in die woede van sy krag stormgeloop. En ek het hom gesien hoe hy tot by die ram kom en op hom verbitterd word en die ram stoot en sy twee horings verbreek; en daar was geen krag in die ram om voor hom stand te hou nie, sodat hy hom teen die grond gegooi en hom vertrap het, en daar was niemand wat die ram uit sy mag gered het nie” (Daniël 8:5-7). Wat beteken dit alles?

11. (a) Hoe het die engel Gabriël verduidelik wie “die harige bok” en sy “groot horing” is? (b) Wie is deur die aansienlike horing afgebeeld?

¹¹ Nie ons of Daniël word in enige twyfel gelaat oor die betekenis van hierdie visioen nie. “Die harige bok is die koning van Griekeland; en die groot horing wat tussen sy oë was, dit is die eerste koning”, vertel die engel Gabriël vir Daniël (Daniël 8:21). In 336 v.G.J. is die laaste koning van die Persiese Ryk, Darius III (Kodommanus), gekroon. In daardie selfde jaar het Aleksander in Masedonië koning geword. Die geskiedenis toon dat Aleksander die Grote die voorspelde eerste “koning van Griekeland” geword het. Aleksander het in die jaar 334 v.G.J. “uit die weste” gekom en vinnig beweeg. Skynbaar “sonder om aan die grond te raak”, het hy gebiede verower en “die ram” omgestoot. Deur die Medo-Persiese heerskappy wat byna twee eeue geduur het tot ’n einde te bring, het Griekeland dus die vyfde wêreldmoondheid van Bybelse belang geword. Wat ’n merkwaardige vervulling van ’n Goddelike profesie!

12. Hoe is “die groot horing” van die simboliese bok “gebreek”, en wat was die vier horings wat in sy plek uitgekom het?

¹² Maar Aleksander se mag was kort van duur. Die visioen gaan voort: “En die bok het uitermate magtig geword; maar toe hy sterk was, het die groot horing afgebreek, en vier aansienlike horings het in sy plek uitgekom na die vier windstreke van die hemel” (Daniël 8:8). Gabriël verduidelik die profesie en sê: “Dat dit gebreek is en vier in sy plek ontstaan het—vier koninkryke sal uit sy volk ontstaan, maar nie met sy krag nie” (Daniël 8:22). Net soos voorspel is, is Aleksander “gebreek”, of het hy gesterf, toe hy op die hoogtepunt van sy suksesvolle loopbaan was. Hy was maar 32 jaar oud. En sy groot ryk is eindelik onder vier van sy generaals verdeel.

’N RAAISELAGTIGE HORINKIE

13. Wat het uit een van die vier horings gegroei, en hoe het dit opgetree?

¹³ Die volgende deel van die visioen dek meer as 2 200 jaar, en die vervulling daarvan strek tot in hedendaagse tye. Daniël skryf: “Uit een van dié [die vier horings] het ’n horing, eers klein, uitgekom, maar dit het baie groot geword na die suide en na die ooste en na die Pragtige Land toe. En dit het groot geword tot by die leër van die hemel en het sommige van die leër, naamlik van die sterre, op die aarde laat val en hulle vertrap. Selfs tot by die Vors van die leër het dit groot geword [“het hy hom baie groot gehou”, NW], sodat die voortdurende offer Hom ontneem en sy heilige woning neergewerp is. En ’n leër is aan die horing oorgelewer in goddeloosheid saam met die voortdurende offer; en dit het die waarheid op die grond neergewerp en in sy optrede voorspoed gehad.”—Daniël 8:9-12.

14. Wat het die engel Gabriël oor die bedrywighede van die simboliese horinkie gesê, en wat sal met daardie horinkie gebeur?

¹⁴ Voor ons die betekenis kan verstaan van die woorde wat so pas aangehaal is, moet ons eers na God se engel luister. Nadat die engel Gabriël daarop gewys het dat vier koninkryke uit Aleksander se ryk sou voortkom, sê hy: “Aan die einde van hulle heerskappy, as die goddelose die maat volgemaak het, sal ’n koning optree, hard van aangesig en wat listige streke verstaan. En sy krag sal sterk word, maar nie deur sy krag nie; en hy sal buitengewoon baie kwaad aanrig en dit voorspoedig uitvoer; en hy sal magtiges vernietig en ook die volk van die heiliges. En op grond van sy slimheid sal hy met geluk bedrog pleeg, en hy sal groot dinge onderneem in sy hart en baie mense onverwags vernietig, ja, optree teen die Vors van die vorste, maar hy sal sonder toedoen van mensehand verbreek word.”—Daniël 8:23-25.

15. Wat het die engel vir Daniël gesê om met betrekking tot die visioen te doen?

¹⁵ “En jý, hou die gesig geheim”, sê die engel vir Daniël, “want dit sien op ’n verre toekoms” (Daniël 8:26). Die vervulling van hierdie deel van die visioen sou eers in die “verre toekoms” plaasvind, en Daniël moes ‘die gesig geheim hou’. Die betekenis daarvan het blykbaar vir Daniël verborge gebly. Maar daardie “verre toekoms” is nou hier. Daarom vra ons: ‘Wat toon die wêreldgeskiedenis oor die vervulling van hierdie profetiese visioen?’

DIE HORINKIE SE KRAG WORD STERK

16. (a) Uit watter simboliese horing het die horinkie gekom? (b) Hoe het Rome die sesde wêreldmoondheid van Bybelprofesie geword, maar waarom was dit nie die simboliese horinkie nie?

¹⁶ Volgens die geskiedenis was die horinkie ’n uitgroeisel uit een van die vier simboliese horings—die een wat die verste na die weste was. Dit was die Hellenistiese koninkryk van generaal Kassander oor Masedonië en Griekeland. Later is hierdie koninkryk deur die koninkryk van generaal Lusimagos, die koning van Trasië en Klein-Asië, geabsorbeer. In die tweede eeu voor ons Gewone Jaartelling is hierdie westelike dele van die Hellenistiese gebied deur Rome verower. Teen die jaar 30 v.G.J. het Rome al die Hellenistiese koninkryke oorgeneem en het dit die sesde wêreldmoondheid van Bybelprofesie geword. Maar die Romeinse Ryk was nie die horinkie van Daniël se visioen nie, want daardie ryk het nie tot “die bepaalde tyd van die einde” geduur nie.—Daniël 8:19.

17. (a) Watter bande was daar tussen Brittanje en die Romeinse Ryk? (b) Watter verband is daar tussen die Britse Ryk en die Hellenistiese koninkryk van Masedonië en Griekeland?

¹⁷ Wat word dan deur die geskiedenis as daardie aggressiewe koning, “hard van aangesig”, geïdentifiseer? Brittanje was eintlik ’n uitgroeisel aan die noordwestelike kant van die Romeinse Ryk. Tot die vroeë deel van die vyfde eeu G.J. was daar Romeinse provinsies in wat nou Brittanje is. Mettertyd het die Romeinse Ryk agteruitgegaan, maar die invloed van die Grieks-Romeinse beskawing het in Brittanje voortgeduur, sowel as in ander dele van Europa wat onder Romeinse beheer was. “Toe die Romeinse Ryk geval het”, het die Mexikaanse digter, skrywer en Nobelpryswenner Octavio Paz geskryf, “het die Kerk sy plek ingeneem.” Hy het bygevoeg: “Die Kerkvaders, sowel as die latere geleerdes, het Griekse filosofie met Christelike leerstellings verweef.” En die 20ste-eeuse filosoof en wiskundige Bertrand Russell het gesê: “Die Westerse beskawing, wat ’n Griekse oorsprong het, is gebaseer op ’n filosofiese en wetenskaplike oorlewering wat twee en ’n half duisend jaar gelede in Milete [’n Griekse stad in Klein-Asië] begin het.” Daar kan dus gesê word dat die Britse Ryk sy kulturele oorsprong in die Hellenistiese koninkryk van Masedonië en Griekeland gehad het.

18. Wat is die horinkie wat in die “tyd van die einde” ’n koning “hard van aangesig” geword het? Verduidelik.

¹⁸ Teen 1763 het die Britse Ryk sy magtige mededingers, Spanje en Frankryk, verslaan. Van toe af het hy getoon dat hy die heerser van die seë en die sewende wêreldmoondheid van Bybelprofesie is. Selfs nadat die 13 Amerikaanse kolonies in 1776 van Brittanje weggebreek het en die Verenigde State van Amerika gevorm het, het die Britse Ryk gegroei totdat dit ’n kwart van die aarde se oppervlak beslaan het en oor ’n kwart van sy bevolking geheers het. Die sewende wêreldmoondheid het nog groter krag gekry toe die Verenigde State van Amerika met Brittanje saamgewerk het en die Anglo-Amerikaanse tweeledige wêreldmoondheid gevorm het. Ekonomies en militêr gesproke het hierdie moondheid inderdaad ’n koning “hard van aangesig” geword. Die horinkie wat in die “tyd van die einde” ’n wrede politieke moondheid geword het, is dus die Anglo-Amerikaanse Wêreldmoondheid.

19. Wat is “die Pragtige Land” wat in die visioen genoem word?

¹⁹ Daniël het gesien dat die horinkie “baie groot geword” het na “die Pragtige Land” toe (Daniël 8:9). Die Beloofde Land, wat Jehovah vir sy uitverkore volk gegee het, was so pragtig dat dit ‘die sieraad van al die lande’, dit wil sê van die hele aarde, genoem is (Esegiël 20:6, 15). Dit is wel so dat Brittanje Jerusalem op 9 Desember 1917 ingeneem het, dat die Volkebond die mandaat oor Palestina in 1920 aan Groot-Brittanje toegewys het en dat hierdie situasie tot 14 Mei 1948 voortgeduur het. Maar die visioen is profeties en bevat baie simbole. En “die Pragtige Land” wat in die visioen genoem word, beeld nie Jerusalem af nie, maar die aardse toestand van die volk wat gedurende die tyd van die sewende wêreldmoondheid deur God as heilig beskou word. Kom ons kyk hoe die Anglo-Amerikaanse Wêreldmoondheid die heiliges probeer bedreig.

“SY HEILIGE WONING” NEERGEWERP

20. Wie is “die leër van die hemel” en “die sterre” wat die horinkie probeer laat val?

²⁰ Die horinkie “het groot geword tot by die leër van die hemel en het sommige van die leër, naamlik van die sterre, op die aarde laat val”. Volgens die engel se verklaring is “die leër van die hemel” en “die sterre” wat die horinkie probeer laat val, “die volk van die heiliges” (Daniël 8:10, 24). Hierdie “heiliges” is geesgesalfde Christene. Omdat hulle in ’n verhouding met God gebring word deur middel van die nuwe verbond, wat deur Jesus Christus se vergote bloed bekragtig is, word hulle geheilig, gereinig en afgesonder vir uitsluitlike diens aan God (Hebreërs 10:10; 13:20). Jehovah het hulle as erfgename saam met sy Seun in die hemelse erfenis aangewys en beskou hulle dus as heilig (Efesiërs 1:3, 11, 18-20). In Daniël se visioen verwys “die leër van die hemel” na die oorblyfsel van die 144 000 “heiliges” op aarde, wat in die hemel saam met die Lam gaan regeer.—Openbaring 14:1-5.

21. Wie staan in ’n “heiligdom” wat die sewende wêreldmoondheid probeer om te verwoes?

²¹ Die oorblyfsel van die 144 000 is vandag aardse verteenwoordigers van die “hemelse Jerusalem”—die stadagtige Koninkryk van God—en sy tempelreëling (Hebreërs 12:22, 28; 13:14). In hierdie sin staan hulle in ’n “heiligdom” wat die sewende wêreldmoondheid probeer om te vertrap en te verwoes (Daniël 8:13). Daniël noem daardie heiligdom ook “sy [Jehovah se] heilige woning” en sê: “Die voortdurende offer [is] Hom [Jehovah] ontneem en sy heilige woning neergewerp . . . En ’n leër is aan die horing oorgelewer in goddeloosheid saam met die voortdurende offer; en dit het die waarheid op die grond neergewerp en in sy optrede voorspoed gehad” (Daniël 8:11, 12). Hoe is dit vervul?

22. Hoe het die sewende wêreldmoondheid gedurende die Tweede Wêreldoorlog “goddeloosheid” beoefen?

²² Wat was die ondervinding van Jehovah se Getuies gedurende die Tweede Wêreldoorlog? Hulle het intense vervolging verduur! Dit het in Nazi- en Fascistiese lande begin. Maar kort voor lank is “die waarheid op die grond neergewerp” dwarsdeur die ontsaglike ryk van die ‘horinkie wie se krag sterk geword het’. “Die leër” van Koninkryksverkondigers en hulle werk om “die goeie nuus” te verkondig is in byna die hele Britse Statebond verbied (Markus 13:10). Toe daardie nasies hulle mannekrag tot krygsdiens opgeroep het, het hulle geweier om Jehovah se Getuies as bedienaars vry te stel, en hulle het geen respek getoon vir hulle teokratiese aanstelling as bedienaars van God nie. In die Verenigde State moes Jehovah se getroue knegte gepeupelgeweld en groot vernederings verduur. Die sewende wêreldmoondheid het as ’t ware ’n lofoffer—“die vrug van die lippe”—probeer wegneem wat, as “die voortdurende offer”, gereeld deur Jehovah se volk aan hom geoffer word (Hebreërs 13:15). Daardie wêreldmoondheid het dus “goddeloosheid” beoefen deur die regmatige gebied van die allerhoogste God—“sy heilige woning”—te skend.

23. (a) Hoe het die Anglo-Amerikaanse Wêreldmoondheid gedurende die Tweede Wêreldoorlog “teen die Vors van die vorste” opgestaan? (b) Wie is “die Vors van die vorste”?

²³ Deur “die heiliges” gedurende die Tweede Wêreldoorlog te vervolg, het die horinkie hom groot gehou “selfs tot by die Vors van die leër”. Of, soos die engel Gabriël sê, hy het opgetree “teen die Vors van die vorste” (Daniël 8:11, 25). Die titel “die Vors van die vorste” is uitsluitlik op Jehovah God van toepassing. Die Hebreeuse woord sar, wat as “vors” vertaal word, hou verband met ’n werkwoord wat “heerskappy uitoefen” beteken. Buiten dat dit na die seun van ’n koning of iemand uit die koninklike stand verwys, kan die woord ook op ’n leier of ’n hoof toegepas word. Die boek Daniël noem ander engelevorste—byvoorbeeld Migael. God is die vernaamste Vors van al hierdie vorste. (Daniël 10:13, 21; vergelyk Psalm 83:19.) Kan ons ons indink dat enigiemand teen Jehovah—die Vors van die vorste—sou opstaan?

“DIE HEILIGDOM” IN SY REGTE STAAT HERSTEL

24. Waarvan verseker Daniël 8:14 ons?

²⁴ Niemand kan teen die Vors van die vorste opstaan nie—nie eers ’n koning wat so “hard van aangesig” is soos die Anglo-Amerikaanse Wêreldmoondheid nie! Hierdie koning se pogings om God se heiligdom te vernietig, is nie suksesvol nie. Ná ’n tydperk van “tweeduisend-driehonderd aande en môres”, sê die engeleboodskapper, “sal die heiligdom in sy regte staat herstel word”, of “seëvier”.—Daniël 8:13, 14; The New English Bible.

25. Hoe lank is die profetiese tydperk van 2 300 dae, en aan watter gebeurtenis moet dit gekoppel word?

²⁵ Die 2 300 dae is ’n profetiese tydperk. Gevolglik is ’n profetiese jaar van 360 dae daarby betrokke (Openbaring 11:2, 3; 12:6, 14). Hierdie 2 300 dae sou dus 6 jaar, 4 maande en 20 dae lank wees. Wanneer was hierdie tydperk? Wel, in die 1930’s het God se volk al hoe meer vervolging in verskeie lande begin ervaar. En gedurende die Tweede Wêreldoorlog is Jehovah se Getuies wreed vervolg in die lande van die Anglo-Amerikaanse tweeledige wêreldmoondheid. Waarom? Weens hulle vasbeslotenheid om “eerder aan God as heerser gehoorsaam [te] wees as aan mense” (Handelinge 5:29). Gevolglik moet die 2 300 dae met daardie oorlog geassosieer word.b Maar wat kan oor die begin en die einde van hierdie profetiese tydperk gesê word?

26. (a) Van wanneer af, op die vroegste, moet ons die 2 300 dae begin tel? (b) Wanneer het die tydperk van 2 300 dae geëindig?

²⁶ Die feit dat die “heiligdom” “herstel” kon word tot die toestand waarin dit moet wees, het beteken dat die 2 300 dae begin het toe dit laas volgens God se beskouing in die “regte staat” was. Dit was op die vroegste op 1 Junie 1938 toe The Watchtower deel 1 van die artikel “Organisasie” gepubliseer het. Deel 2 het in die nommer van 15 Junie 1938 verskyn. As ons 2 300 dae (6 jaar, 4 maande en 20 dae op die Hebreeuse kalender) van 1 of 15 Junie 1938 af tel, bring dit ons by 8 of 22 Oktober 1944. Op die eerste dag van ’n spesiale byeenkoms wat op 30 September en 1 Oktober 1944 in Pittsburgh, Pennsilvanië, VSA, gehou is, het die Wagtoringgenootskap se president ’n toespraak gehou oor die onderwerp “Die hedendaagse teokratiese samestel”. By die jaarlikse sakevergadering op 2 Oktober is die Genootskap se handves gewysig in ’n poging om dit so na aan ’n teokratiese reëling te bring as wat die wet toegelaat het. Met die publikasie van duideliker Bybelse vereistes is teokratiese organisasie spoedig in groter mate in die gemeentes van Jehovah se Getuies ingestel.

27. Wat bewys dat “die voortdurende offer” gedurende die jare van vervolging tydens die Tweede Wêreldoorlog beperk is?

²⁷ Terwyl die 2 300 dae verloop het gedurende die Tweede Wêreldoorlog, wat in 1939 begin het, was “die voortdurende offer” by God se heiligdom in groot mate beperk weens vervolging. In 1938 het die Wagtoring- Bybel en Traktaatgenootskap 39 takke gehad wat toesig gehou het oor die werk van die Getuies dwarsdeur die wêreld, maar teen 1943 was daar maar 21. Die toename in die aantal Koninkryksverkondigers gedurende daardie oorlogsjare was ook maar klein.

28, 29. (a) Wat het in Jehovah se organisasie plaasgevind terwyl die Tweede Wêreldoorlog ten einde geloop het? (b) Wat kan gesê word van die vyand se verwoede pogings om “die heiligdom” te vernietig?

²⁸ Soos ons genoem het, het Jehovah se Getuies gedurende die laaste maande van die Tweede Wêreldoorlog hulle vasbeslotenheid herbevestig om God se heerskappy te verheerlik deur hom as ’n teokratiese organisasie te dien. Dit was met hierdie doel voor oë dat hulle in 1944 begin het om hulle werk en bestuurstruktuur te herorganiseer. Trouens, Die Wagtoring van 15 Maart 1945 het ’n artikel bevat met die titel “Georganiseer vir finale werk”. Dit en ander diensgeoriënteerde artikels uit daardie selfde tydperk het getoon dat die 2 300 dae geëindig het en dat “die heiligdom” weer in sy “regte staat” was.

²⁹ Die vyand se verwoede pogings om “die heiligdom” te vernietig, het droewig misluk. Ja, die “heiliges” wat nog op die aarde was, tesame met hulle metgeselle, die “groot skare”, het geseëvier (Openbaring 7:9). En die heiligdom, in sy regte teokratiese toestand, gaan nou voort om heilige diens aan Jehovah te verrig.

30. Wat gaan binnekort gebeur met die koning wat “hard van aangesig” is?

³⁰ Die Anglo-Amerikaanse Wêreldmoondheid staan nog steeds in sy posisie. “Maar hy sal sonder toedoen van mensehand verbreek word”, het die engel Gabriël gesê (Daniël 8:25). Hierdie sewende wêreldmoondheid van Bybelprofesie—hierdie koning “hard van aangesig”—sal binnekort verbreek word, nie deur mensehande nie, maar deur bomenslike mag by Armageddon (Daniël 2:44; Openbaring 16:14, 16). Hoe opwindend is dit tog om te weet dat die soewereiniteit van Jehovah God, die Vors van die vorste, dan geregverdig sal wees!

[Voetnote]

WAT HET JY GELEER?

• Wat word afgebeeld deur

“die ram” met “twee horings”?

“die harige bok” met sy “groot horing”?

die vier horings wat in die plek van “die groot horing” uitgekom het?

die horinkie wat uit een van die vier horings uitgekom het?

• Hoe het die Anglo-Amerikaanse Wêreldmoond-heid gedurende die Tweede Wêreldoorlog “die heiligdom” probeer vernietig, en was hy suksesvol?

[Kaart/Prent op bladsy 166]

(Sien publikasie vir oorspronklike teksuitleg)

Medo-Persiese Ryk

MASEDONIË

EGIPTE

Memfis

ETIOPIË

Jerusalem

Babilon

Ekbatana

Susa

Persepolis

INDIË

[Kaart/Prent op bladsy 169]

(Sien publikasie vir oorspronklike teksuitleg)

Griekse Ryk

MASEDONIË

EGIPTE

Babilon

Indusrivier

[Kaart op bladsy 172]

(Sien publikasie vir oorspronklike teksuitleg)

Romeinse Ryk

BRITANNIA

ITALIË

Rome

Jerusalem

EGIPTE

[Volbladillustrasie op bladsy 164]

[Prente op bladsy 174]

’n Paar prominente figure van die Anglo-Amerikaanse Wêreldmoondheid:

1. George Washington, die eerste Amerikaanse president (1789-97)

2. Koningin Victoria van Brittanje (1837-1901)

3. Woodrow Wilson, Amerikaanse president (1913-21)

4. David Lloyd George, Britse eerste minister (1916-22)

5. Winston Churchill, Britse eerste minister (1940-45, 1951-55)

6. Franklin D. Roosevelt, Amerikaanse president (1933-45)