‘Skenk aandag aan hoe jy luister’

OM TE luister, is ’n belangrike deel van die leerproses. Dit kan ook ’n invloed hê op ’n mens se vooruitsigte op oorlewing. Voordat Jehovah sy volk uit slawerny in Egipte bevry het, het hy instruksies aan Moses gegee, wat weer vir die ouer manne van Israel gesê het wat hulle moet doen om hulle eersgeborenes van die doodsengel te red (Eks. 12:21-23). Die ouer manne het hierdie inligting toe aan elke huisgesin oorgedra. Dit is mondelings gedoen. Die volk moes aandagtig luister. Hoe het hulle daarop gereageer? Die Bybel sê: “Al die kinders van Israel [het] gedoen net soos Jehovah Moses en Aäron beveel het. Hulle het net so gedoen” (Eks. 12:28, 50, 51). Gevolglik is Israel op ’n ontsagwekkende wyse verlos.

Vandag berei Jehovah ons vir ’n selfs groter verlossing voor. Die onderrigting wat hy voorsien, verdien beslis ons noulettende aandag. Hierdie onderrigting word by die gemeentelike vergaderinge gegee. Vind jy ten volle baat by hierdie vergaderinge? Baie hang af van hoe jy luister.

Onthou jy die hoofpunte van die onderrigting by die vergaderinge? Is dit jou gewoonte om week na week te kyk hoe jy die onderrigting wat gegee word, in jou eie lewe kan toepas of met ander daaroor kan praat?

Berei jou hart voor

As ons ten volle baat wil vind by die onderrigting wat by Christelike vergaderinge gegee word, moet ons ons hart voorberei. Die belangrikheid hiervan word beklemtoon deur wat tydens die bewind van koning Josafat van Juda gebeur het. Josafat het ’n moedige standpunt vir ware aanbidding ingeneem. Hy het “die hoogtes en die heilige pale uit Juda verwyder” en vorste, Leviete en priesters opdrag gegee om Jehovah se Wet aan die volk in al die stede van Juda te leer. Tog het ‘die hoogtes nie verdwyn nie’ (2 Kron. 17:6-9; 20:33). Die aanbidding van valse gode en die ongeoorloofde manier waarop Jehovah op die heidense hoogtes aanbid is, was so diepgewortel dat dit nie uitgewis is nie.

Waarom het die onderrigting wat Josafat gereël het, nie ’n blywende uitwerking gehad nie? Die verslag gaan voort: “Die volk het nog nie hulle hart voorberei vir die God van hulle voorvaders nie.” Hulle het gehoor, maar het nie dienooreenkomstig opgetree nie. Miskien het hulle gevoel dat dit ongerieflik is om na die tempel in Jerusalem te reis om offerandes te bring. Hoe dit ook al sy, hulle harte is nie deur geloof beweeg nie.

Om te voorkom dat ons na die weë van Satan se wêreld terugdryf, moet ons ons harte voorberei om die onderrigting in te neem wat Jehovah vandag voorsien. Hoe? ’n Belangrike manier is deur gebed. Ons moet bid dat ons die onderrigting van God met dankbaarheid sal aanneem (Ps. 27:4; 95:2). Dit sal ons help om die pogings van ons broers te waardeer wat, al is hulle onvolmaak, hulle beskikbaar stel om deur Jehovah gebruik te word om sy volk te onderrig. Dit sal ons beweeg om Jehovah te dank, nie net vir nuwe punte wat ons leer nie, maar ook vir die geleentheid om ons waardering te vergroot vir punte wat ons al voorheen geleer het. Omdat dit ons begeerte is om God se wil ten volle uit te voer, bid ons: “Onderrig my, o Jehovah, aangaande u weg. . . . Verenig my hart om u naam te vrees.”—Ps. 86:11.

Konsentreer

Daar is baie dinge wat kan verhinder dat ons aandagtig luister. Ons dink dalk aan al ons bekommernisse. Geraas en steurnisse in die gehoor of buite die vergaderplek kan ons aandag aftrek. Fisiese ongemak kan dit vir ons moeilik maak om te konsentreer. Diegene met jong kinders vind dikwels dat hulle aandag verdeeld is. Wat kan ons help om op die program te konsentreer?

Ons oë bepaal in groot mate waarop ons ons aandag vestig. Gebruik jou oë om jou te help konsentreer deur hulle op die spreker gevestig te hou. Wanneer hy na ’n Bybelteks verwys—selfs ’n bekende een—slaan dit na en lees dit saam met hom. Weerstaan die versoeking om jou kop in die rigting van elke geluid of beweging te draai. As jy kyk na dinge wat jou aandag aftrek, sal baie van die onderrigting wat van die verhoog af gegee word, verlore gaan.

As enige “verontrustende gedagtes” dit vir jou moeilik maak om op die program te konsentreer, moet jy Jehovah vra om jou ’n kalm hart en verstand te gee sodat jy kan aandag skenk (Ps. 94:19; Fil. 4:6, 7). Doen dit herhaaldelik indien nodig (Matt. 7:7, 8). Die gemeentelike vergaderinge is ’n voorsiening van Jehovah. Jy kan daarvan seker wees dat hy wil hê jy moet daarby baat vind.—1 Joh. 5:14, 15.

Hoe om na toesprake te luister

Jy kan waarskynlik treffende punte onthou wat jy in toesprake gehoor het. Om na ’n toespraak te luister, behels egter meer as om net uitstaande punte te onthou. ’n Toespraak is soos ’n reis. Hoewel daar moontlik interessante dinge langs die pad te sien is, is die bestemming, die doel, waaroor dit eintlik gaan. Dalk probeer die spreker die gehoor tot ’n sekere gevolgtrekking lei of hulle tot een of ander optrede beweeg.

Neem byvoorbeeld die toespraak wat Josua voor die nasie Israel gehou het, wat in Josua 24:1-15 opgeteken is. Sy doel was om die volk aan te spoor om ’n ferm standpunt vir ware aanbidding in te neem deur hulle heeltemal van die afgodediens van die omliggende nasies af te skei. Waarom was dit so belangrik? Omdat valse godsdiens algemeen voorgekom het, het dit ’n ernstige bedreiging vir die nasie se goeie posisie voor Jehovah ingehou. Die volk se reaksie op Josua se beroep was: “Dit is vir ons ondenkbaar om Jehovah te verlaat om ander gode te dien. . . . Ons sal Jehovah dien.” En hulle het!—Jos. 24:16, 18, 31.

Terwyl jy na ’n toespraak luister, probeer om die doel daarvan te identifiseer. Kyk hoe die punte wat die spreker uitbring, help om daardie doel te bereik. Vra jou af wat die inligting jou aanspoor om te doen.

Hoe om tydens besprekings te luister

Die Wagtoring-studie, die Gemeentelike Boekstudie en dele van die Diensvergadering word as vraag-en-antwoord-besprekings van gedrukte Bybelmateriaal gehou.

Om tydens ’n bespreking te luister, is in sekere opsigte soos om aan ’n gesprek deel te neem. Jy moet aandagtig luister om ten volle daarby baat te vind. Let op in watter rigting die bespreking beweeg. Kyk hoe die broer wat die bespreking lei, die tema en die hoofpunte beklemtoon. Beantwoord sy vrae in jou gedagtes. Luister terwyl ander die materiaal verduidelik en toepas. Wanneer ’n mens inligting vanuit ander se oogpunt beskou, kan dit jou nuwe insig in ’n bekende onderwerp gee. Dra by tot die wedersydse aanmoediging deur jou eie geloof in woorde uit te druk.—Rom. 1:12.

As jy die toegewese materiaal vooraf bestudeer, sal dit jou help om verdiep te wees in die bespreking en ander se kommentare te volg. As jou omstandighede dit moeilik maak om die materiaal deeglik te bestudeer, probeer ten minste ’n paar minute neem om voor die vergadering ’n oorsig van die inligting te kry. Dit sal jou in staat stel om meer uit die bespreking te leer.

Hoe om by byeenkomste te luister

By byeenkomste sal daar waarskynlik meer dinge wees wat die aandag kan aftrek as by gemeentelike vergaderinge. Dan kan dit selfs moeiliker wees om te luister. Wat kan ons help?

Dit is belangrik om ’n goeie nagrus te kry. Kyk elke dag voor die program begin na die tema, en hou dit in gedagte. Kyk ook na elke toespraaktitel, en probeer vooruitdink wat bespreek sal word. Maak goed gebruik van jou Bybel. Baie mense vind dat dit hulle help om op die program te konsentreer as hulle kort aantekeninge van die hoofpunte maak. Maak ’n aantekening van punte wat jy van plan is om in jou eie lewe en bediening toe te pas. Bespreek ’n paar punte terwyl julle elke dag na en van die byeenkomsterrein reis. Dit sal jou help om die inligting te onthou.

Leer kinders om te luister

Christenouers kan hulle kinders—selfs kleuters—help om ‘wys te word tot redding’ deur hulle na gemeentelike vergaderinge en byeenkomste te bring (2 Tim. 3:15). Aangesien kinders se geaardhede verskil en hulle ook nie ewe lank kan konsentreer nie, is onderskeidingsvermoë nodig om hulle te help om aandagtig te luister. Jy sal die volgende wenke nuttig vind.

Laat jou kinders by die huis op sekere tye stilsit en lees of na die prente in ons Christelike publikasies kyk. Moenie speelgoed na die vergaderinge bring om jou kinders besig te hou nie. Net soos in eertydse Israel is kinders vandag teenwoordig “sodat hulle kan luister en sodat hulle kan leer” (Deut. 31:12). As dit prakties is, gee sommige ouers selfs vir hulle klein kindertjies persoonlike eksemplare van die publikasies wat bestudeer word. Wanneer die kinders ’n bietjie ouer word, moet ouers hulle help om voor te berei om aan besprekings deel te neem wat gehoordeelname vereis.

Die Skrif toon dat daar ’n noue verband is tussen gehoorsaamheid en om na Jehovah te luister. Dit kan in Moses se woorde aan die nasie Israel gesien word: “Ek [het] jou die lewe en die dood voorgehou . . . , die seën en die vloek; en jy moet die lewe kies . . . deur Jehovah jou God lief te hê, deur na sy stem te luister en deur hom aan te kleef” (Deut. 30:19, 20). As ons God se goedkeuring wil hê en met die ewige lewe geseën wil word, is dit vandag noodsaaklik dat ons luister na die onderrigting wat Jehovah voorsien en gehoorsaam is deur dit in ons lewe toe te pas. Hoe belangrik is dit dus tog dat ons gehoor gee aan Jesus se vermaning: ‘Skenk aandag aan hoe jy luister’!—Luk. 8:18.