Gepaste stemsterkte

AS ’N openbare spreker nie hard genoeg praat nie, sal party in die gehoor moontlik begin insluimer. As ’n verkondiger in die veldbediening te sag praat, sal die huisbewoner miskien belangstelling verloor. En by vergaderinge waar die gehoor nie hard genoeg kommentaar lewer nie, sal diegene wat teenwoordig is, nie die nodige aanmoediging kry nie (Heb. 10:24, 25). As ’n spreker daarenteen op die verkeerde tyd harder begin praat, sal die gehoor ongemaklik, selfs geïrriteerd, raak.—Spr. 27:14.

Neem jou gehoor in ag. Met wie praat jy? met een persoon? met ’n gesin? met ’n klein groepie wat vir velddiens vergader? met die hele gemeente? of met ’n groot gehoor by ’n byeenkoms? Dit is duidelik dat stemsterkte wat in een situasie gepas is dalk nie in ’n ander situasie gepas is nie.

By verskillende geleenthede het knegte van God groot gehore toegespreek. By die inwyding van die tempel in Jerusalem in die tyd van Salomo was daar geen klanktoerusting nie. Salomo het dus op ’n platform gestaan en die volk “met ’n harde stem” geseën (1 Kon. 8:55; 2 Kron. 6:13). Eeue later, ná die uitstorting van heilige gees op Pinkster 33 G.J., het ’n skare—waarvan party belangstellendes en ander spotters was—om die groepie Christene in Jerusalem vergader. Petrus het praktiese wysheid aan die dag gelê deur ‘op te staan en sy stem te verhef’ (Hand. 2:14). ’n Kragtige getuienis is gegee.

Hoe weet jy of jy in ’n gegewe situasie hard genoeg praat? Die gehoor se reaksie is een van die beste maatstawwe. As jy opmerk dat party in die gehoor sukkel om te hoor, moet jy jou stemsterkte probeer aanpas.

Hetsy ons met een persoon of met ’n groep praat, dit is goed om in ag te neem wie die gehoor is. As iemand hardhorend is, sal jy moontlik harder moet praat. Maar mense wat bloot weens hulle ouderdom ’n bietjie stadiger reageer, sal dit nie waardeer as jy skreeu nie. Mense sal moontlik selfs dink dat jy onbeskof is. In party kulture dink mense dat jy kwaad of ongeduldig is as jy baie hard praat.

Neem steurende geluide in ag. Wanneer jy aan die veldbediening deelneem, het die omstandighede waarmee jy te doen kry, beslis ’n invloed op die stemsterkte wat jy moet gebruik om ’n getuienis te gee. Daar is dalk verkeersgeraas, luidrugtige kinders, blaffende honde, oorverdowende musiek of ’n televisie wat baie hard speel. Maar in gebiede waar huise na aan mekaar is, sal dit die huisbewoner dalk in die verleentheid stel as jy so hard praat dat jy die aandag van die bure trek.

Broers wat toesprake in die gemeente of by byeenkomste hou, het ook met verskeie omstandighede te kampe. Om in die opelug met ’n gehoor te praat, is iets heeltemal anders as om ’n toespraak in ’n saal met goeie akoestiek te hou. In Latyns-Amerika het twee sendelinge ’n openbare toespraak in die binnehof van die huis van ’n belangstellende gehou terwyl vuurwerk in die nabygeleë plaza afgeskiet is en ’n haan aanhoudend daar naby gekraai het!

Soms moet ’n spreker as gevolg van iets wat in die middel van ’n toespraak gebeur, pouseer tot die steurnis afneem, of hy moet harder praat. As ’n vergadering byvoorbeeld in ’n gebou met ’n sinkdak gehou word, kan ’n skielike reënbui dit amper onmoontlik maak vir die gehoor om die spreker te hoor. ’n Kind wat huil of die steurnis wat deur laatkommers veroorsaak word, sal beslis aanpasbaarheid verg. Leer om by die steurnisse aan te pas sodat jou gehoor ten volle baat kan vind by die inligting wat jy bespreek.

Klanktoerusting is nuttig as dit beskikbaar is, maar dit beteken nie dat die spreker nie harder hoef te praat wanneer die situasie dit vereis nie. Op party plekke waar kragonderbrekings dikwels voorkom, moet sprekers hulle toesprake eenvoudig sonder ’n mikrofoon voortsit.

Neem die materiaal wat bespreek word, in ag. Die soort materiaal wat in jou toespraak gedek word, het ook ’n uitwerking op die stemsterkte wat nodig is. As die onderwerp geesdriftig aangebied moet word, moet jy nie die aanbieding verswak deur te sag te praat nie. Wanneer jy byvoorbeeld veroordelings uit die Skrif lees, moet jy harder praat as wanneer jy raad oor die betoning van liefde lees. Pas jou stemsterkte by die materiaal aan, maar wees versigtig om dit nie op ’n manier te doen wat die aandag op jou vestig nie.

Neem wat jy wil bereik, in ag. As jy jou gehoor tot geesdriftige optrede wil aanspoor, sal jy dalk met groter krag moet praat. As jy hulle denke wil verander, moet jy hulle nie afstoot deur te hard te praat nie. As jy iemand wil vertroos, is ’n sagter stem gewoonlik doeltreffender.

Doeltreffende gebruik van groter stemsterkte. Wanneer jy iemand wat besig is, se aandag probeer kry, help dit dikwels om harder te praat. Ouers weet dit; daarom roep hulle hulle kinders met ’n harde stem wanneer hulle speeltyd verby is. ’n Voorsitter moet ook dalk redelik hard praat wanneer hy ’n gemeentelike vergadering of ’n byeenkoms wil begin. Wanneer verkondigers aan die veldbediening deelneem, sal hulle mense wat buite werk, dalk hardop groet terwyl hulle nader stap.

Selfs nadat jy iemand se aandag gekry het, is dit belangrik om nog steeds hard genoeg te praat. ’n Baie sagte stem kan die indruk skep dat die spreker onvoorbereid is of nie oortuig is van wat hy sê nie.

Wanneer ’n bevel gegee word, kan dit mense tot optrede aanspoor as ’n mens harder praat (Hand. 14:9, 10). ’n Bevel wat hard uitgeroep word, kan ook ’n ramp voorkom. In Filippi was ’n tronkbewaarder op die punt om sy eie lewe te neem omdat hy gedink het dat sy gevangenes ontsnap het. “Paulus het met ’n harde stem uitgeroep en gesê: ‘Moenie jouself kwaad aandoen nie, want ons is almal hier!’” Hy het sodoende voorkom dat die man selfmoord pleeg. Paulus en Silas het toe vir die tronkbewaarder en sy huisgenote getuig, en hulle het almal die waarheid aangeneem.—Hand. 16:27-33.

Hoe om jou stemsterkte te verbeter. Party moet hulle werklik inspan om te leer hoe om gepaste stemsterkte te gebruik. Iemand praat moontlik met onvoldoende stemsterkte omdat hy ’n swak stem het. Maar met inspanning kan hy verbeter, hoewel hy miskien nog steeds ’n sagte stem sal hê. Skenk aandag aan jou asemhaling en liggaamshouding. Oefen om regop te sit en te staan. Trek jou skouers terug en haal diep asem. Maak seker dat jy die onderste deel van jou longe vul. Hierdie lugvoorraad, as dit behoorlik beheer word, maak dit vir jou moontlik om jou stemsterkte te beheer wanneer jy praat.

Ander praat weer te hard. Miskien het hulle die gewoonte aangeleer omdat hulle buite of in ’n raserige omgewing werk. Of hulle kom moontlik uit ’n omgewing waar almal skreeu en onderbrekings iets algemeens is. Gevolglik dink hulle dalk dat hulle harder as ander moet praat om iets te kan sê. Namate hulle die Bybel se raad progressief toepas om hulle met “die tere geneenthede van medelye, goedhartigheid, ootmoed, sagmoedigheid en lankmoedigheid” te beklee, sal hulle hulle stemsterkte aanpas wanneer hulle met ander gesels.—Kol. 3:12.

Goeie voorbereiding, die ervaring wat ’n mens opdoen deur gereeld velddiens te doen en gebed tot Jehovah sal jou help om met gepaste stemsterkte te praat. Hetsy jy van die verhoog af of met een persoon in die veldbediening praat, probeer dink aan hoe die ander persoon gehelp kan word deur te hoor wat jy sê.—Spr. 18:21.