Entoesiasme

ENTOESIASME help om lewe aan ’n toespraak te gee. Hoewel dit belangrik is om leersame materiaal te hê, is dit ’n lewendige, entoesiastiese aanbieding wat sal help om die aandag van ’n gehoor te boei. Ongeag jou kulturele agtergrond of persoonlikheid, jy kan entoesiasme aankweek.

Praat met gevoel. Toe Jesus met ’n vrou van Samaria gepraat het, het hy gesê dat diegene wat Jehovah aanbid, dit “met gees en waarheid” moet doen (Joh. 4:24). Hulle aanbidding moet aangedryf word deur ’n hart vol waardering en moet in ooreenstemming wees met die waarheid wat in God se Woord gevind word. Wanneer iemand diep waardering het, sal dit weerspieël word in die manier waarop hy praat. Hy sal gretig wees om met ander oor Jehovah se liefdevolle voorsienings te praat. Sy gesigsuitdrukkings, sy gebare en sy stem sal toon hoe hy werklik voel.

Waarom is ’n spreker wat lief is vir Jehovah en wat glo wat hy sê, dan nie altyd entoesiasties wanneer hy praat nie? Dit is nie genoeg dat hy bloot voorberei wat hy gaan sê nie. Hy moet hom in sy onderwerp inleef, emosioneel daarby betrokke wees. Gestel hy moet oor die losprysoffer van Jesus Christus praat. Wanneer die spreker sy toespraak hou, moet sy gedagtes nie net met feite gevul wees nie, maar ook met waardering vir wat Jesus se losprys vir hom sowel as sy gehoor beteken. Hy moet sy gevoelens van waardering teenoor Jehovah God en Christus Jesus vir hierdie wonderlike voorsiening in gedagte hou. Hy moet dink oor die wonderlike vooruitsig van lewe wat dit vir die mensdom moontlik maak—ewige geluk in volmaakte gesondheid in ’n herstelde aardse paradys! Dit moet dus uit sy hart kom.

Die Bybel sê oor die skrifgeleerde Esra, ’n onderrigter in Israel, dat hy ‘sy hart voorberei het om die wet van Jehovah te raadpleeg en om dit na te kom en om Israel te leer’ (Esra 7:10). As ons dieselfde doen—deur nie net inligting nie, maar ook ons hart voor te berei—sal ons uit die hart praat. Wanneer ’n mens die waarheid met soveel opregtheid oordra, kan dit diegene met wie ons praat, baie help om ’n ware liefde vir die waarheid op te bou.

Dink aan jou gehoor. Nog ’n belangrike faktor wat jou sal help om entoesiasties te wees, is om oortuig te wees dat jou gehoor die inligting wat jy gaan bespreek, nodig het. Wanneer jy jou toespraak voorberei, moet jy dus nie net leersame materiaal insamel nie, maar ook tot Jehovah bid vir sy leiding sodat jy dit tot voordeel van jou gehoor kan gebruik (Ps. 32:8; Matt. 7:7, 8). Dink aan waarom jou gehoor die inligting nodig het, hoe dit hulle tot voordeel sal strek en hoe jy dit op so ’n manier kan oordra dat hulle die waarde daarvan sal besef.

Werk aan jou materiaal totdat jy iets het waaroor jy opgewonde voel. Dit hoef nie iets nuuts te wees nie, maar jou benadering tot die onderwerp kan nuut wees. As jy iets voorberei wat werklik jou gehoor sal help om hulle verhouding met Jehovah te versterk, om sy voorsienings te waardeer, om die druk van die lewe in hierdie ou stelsel die hoof te bied of om welslae in hulle bediening te behaal, het jy alle rede om entoesiasties oor jou toespraak te wees.

Sê nou jy word gevra om in die openbaar te lees? Om dit entoesiasties te kan doen, moet jy nie net die woorde reg kan uitspreek en hulle reg kan groepeer nie. Bestudeer die materiaal. As jy ’n gedeelte uit die Bybel gaan lees, kan jy gerus ’n bietjie navorsing daaroor doen. Maak seker dat jy die basiese betekenis daarvan verstaan. Kyk wat jy en jou gehoor daaruit kan leer, en lees met die begeerte om daardie gedagtes oor te dra aan dié wat na jou luister.

Berei jy vir die veldbediening voor? Hersien die onderwerp vir bespreking en die tekste wat jy wil gebruik. Dink ook aan wat mense kwel. Wat is in die nuus? Met watter probleme het hulle te kampe? Wanneer jy toegerus is om vir mense te wys dat God se Woord die oplossings het vir die probleme wat hulle kwel, sal jy gretig wees om dit te doen en sal jou entoesiasme spontaan wees.

Openbaar entoesiasme deur ’n lewendige aanbieding. Entoesiasme kom die duidelikste na vore as jou aanbieding lewendig is. Dit moet in jou gesigsuitdrukking gesien kan word. Jy moet oortuig klink, nie dogmaties nie.

Balans is nodig. Party mense is geneig om oor alles opgewonde te raak. Hulle moet dalk gehelp word om te besef dat iemand wat bombasties of te emosioneel raak, die gehoor se aandag op homself vestig en nie op die boodskap nie. Aan die ander kant moet diegene wat skaam is, gehelp word om hulle gedagtes vryelik uit te spreek.

Entoesiasme is aansteeklik. As jy goeie kontak met jou gehoor het en entoesiasties oor jou toespraak is, sal jou gehoor daardie entoesiasme aanvoel. Apollos was ’n lewendige spreker, en hy is as ’n welsprekende man beskryf. As jy gloei van God se gees, sal jou lewendige aanbieding dié wat na jou luister, tot optrede aanspoor.—Hand. 18:24, 25; Rom. 12:11.

Entoesiasme wat by die materiaal pas. Pas op dat jy nie regdeur jou toespraak so entoesiasties is dat jy jou gehoor uitput nie. Hulle sal dan nie so geredelik ag slaan op enige aansporing wat jy hulle gee nie. Dit toon hoe belangrik dit is om materiaal voor te berei wat afwisseling in jou toespraak moontlik sal maak. Probeer om nie in ’n styl te verval wat dit laat klink asof jy ’n onverskillige gesindheid het nie. As jy jou materiaal versigtig kies, sal jy ’n lewendige belangstelling daarin hê. Maar sommige punte moet eenvoudig met meer entoesiasme as ander oorgedra word, en dit moet op bedrewe wyse regdeur jou toespraak ingevleg word.

Hoofpunte moet veral entoesiasties aangebied word. Jou toespraak moet hoogtepunte hê, klimakse waarnatoe jy opbou. Aangesien dit die hoogtepunte van jou toespraak is, sal dit gewoonlik die punte wees wat bedoel is om jou gehoor te motiveer. Nadat jy jou gehoor oortuig het, moet jy hulle tot optrede aanspoor, vir hulle toon hoe hulle daarby baat sal vind as hulle toepas wat bespreek is. Jou entoesiasme sal jou help om die harte van dié wat na jou luister, te bereik. Lewendige voordrag moet nooit geforseerd wees nie. Daar moet ’n rede daarvoor wees, en jou materiaal sal jou daardie rede gee.