Goeie gebruik van visuele hulpmiddele

WAAROM is dit nuttig om visuele hulpmiddele in jou onderrigting te gebruik? Omdat dit jou onderrigting doeltreffender kan maak. Jehovah God en Jesus Christus het visuele hulpmiddele gebruik, en ons kan by hulle leer. Wanneer visuele hulpmiddele met die gesproke woord gekombineer word, word inligting deur twee sintuie ingeneem. Dit kan help om jou gehoor se aandag te boei en om ’n dieper indruk te maak. Hoe kan jy visuele hulpmiddele gebruik wanneer jy die goeie nuus bekend maak? Hoe kan jy seker maak dat jy dit goed gebruik?

Hoe die grootste Onderrigters visuele hulpmiddele gebruik het. Jehovah het onvergeetlike visuele hulpmiddele gebruik om uiters belangrike lesse aan ander te leer. Een aand het hy Abraham na buite gebring en gesê: “Kyk asseblief op na die hemel en tel die sterre, as jy hulle enigsins kan tel. . . . So sal jou saad word” (Gen. 15:5). Hoewel die belofte uit ’n menslike oogpunt onmoontlik gelyk het, is Abraham diep getref en het hy geloof in Jehovah gestel. By ’n ander geleentheid het Jehovah Jeremia na die huis van ’n pottebakker gestuur en hom in die pottebakker se werkswinkel laat ingaan om te kyk hoe die man klei vorm. Wat ’n onvergeetlike les oor die Skepper se gesag oor mense was dit tog! (Jer. 18:1-6). En hoe kon Jona ooit die les in barmhartigheid vergeet wat Jehovah hom deur middel van die kalbasplant geleer het? (Jona 4:6-11). Jehovah het selfs vir sy profete gesê om profetiese boodskappe in dade uit te beeld terwyl hulle van sekere gepaste voorwerpe gebruik gemaak het (1 Kon. 11:29-32; Jer. 27:1-8; Eseg. 4:1-17). Die verskillende dele van die tabernakel en die tempel is in werklikheid voorstellings wat ons help om hemelse werklikhede te verstaan (Heb. 9:9, 23, 24). God het ook dikwels van visioene gebruik gemaak om belangrike inligting oor te dra.—Eseg. 1:4-28; 8:2-18; Hand. 10:9-16; 16:9, 10; Op. 1:1.

Hoe het Jesus visuele hulpmiddele gebruik? Toe die Fariseërs en die partyaanhangers van Herodes hom met sy woorde probeer vastrek het, het Jesus ’n denarius gevra en hulle aandag gevestig op die beeld van die keiser op die muntstuk. Toe het hy verduidelik dat ’n mens aan die keiser moet terugbetaal wat aan die keiser behoort, maar aan God moet terugbetaal wat aan God behoort (Matt. 22:19-21). Toe Jesus sy dissipels wou leer dat hulle God moet eer met alles wat hulle het, het hy hulle aandag gevestig op ’n arm weduwee by die tempel wie se bydrae—twee muntstukkies—al haar middele vir lewensonderhoud was (Luk. 21:1-4). By ’n ander geleentheid het hy ’n jong kind gebruik as ’n voorbeeld van nederigheid, van iemand sonder ambisie (Matt. 18:2-6). Hy het ook deur sy eie dade getoon wat dit beteken om nederig te wees deur sy dissipels se voete te was.—Joh. 13:14.

Maniere om visuele hulpmiddele te gebruik. Ons kan nie, soos Jehovah, deur middel van visioene kommunikeer nie. Maar daar is talle gedagteprikkelende prente in die publikasies van Jehovah se Getuies. Gebruik dit om belangstellendes te help om hulle die aardse Paradys voor te stel wat in God se Woord belowe word. Tydens ’n tuisbybelstudie kan jy ’n student se aandag vestig op ’n prent wat verband hou met wat julle studeer en hom vra wat hy sien. Toe sekere visioene aan die profeet Amos gegee is, is dit interessant dat Jehovah hom gevra het: “Wat sien jy, Amos?” (Amos 7:7, 8; 8:1, 2). Jy kan soortgelyke vrae stel wanneer jy mense se aandag vestig op prente wat as visuele onderrigmiddele dien.

As jy wiskundige berekenings uitskryf of ’n tydlyn gebruik wat die volgorde van belangrike gebeure aangee, kan dit mense help om profesieë soos die “sewe tye” van Daniël 4:16 en die “sewentig weke” van Daniël 9:24 makliker te verstaan. Sulke visuele hulpmiddele verskyn in etlike van ons studiepublikasies.

In julle gesinsbybelstudie kan ’n bespreking van dinge soos die tabernakel, die tempel in Jerusalem en die tempel in Esegiël se visioen makliker gemaak word om te verstaan as jy ’n prent of ’n diagram gebruik. Dit kan gevind word in Insight on the Scriptures, die aanhangsel van die New World Translation of the Holy Scriptures—With References en verskeie nommers van Die Wagtoring.

Maak goed gebruik van kaarte wanneer jy die Bybel saam met jou gesin lees. Volg Abraham se reis van Ur na Haran en tot in Bet-El. Bestudeer die roete wat Israel gevolg het toe die nasie Egipte verlaat en na die Beloofde Land gereis het. Vind die gebied wat aan elke stam van Israel as ’n erfdeel gegee is. Kyk hoe ver Salomo se ryk gestrek het. Volg Elia se roete toe hy die hele pad van Jisreël af tot by die wildernis aan die ander kant van Berseba gevlug het nadat Isebel hom gedreig het (1 Kon. 18:46–19:4). Vind die stede en dorpe waar Jesus gepreek het. Volg die reise van Paulus, soos dit in die boek Handelinge beskryf word.

Visuele hulpmiddele is nuttig wanneer jy Bybelstudente oor die funksies van die gemeente inlig. Jy kan vir jou student ’n gedrukte program wys en verduidelik watter soort inligting ons by byeenkomste bespreek. Baie mense is beïndruk wanneer hulle persoonlik deur die Koninkryksaal of op ’n toer van ’n takkantoor van Jehovah se Getuies geneem word. Dit kan ’n doeltreffende manier wees om wanopvattings oor ons werk en die doel daarvan uit die weg te ruim. Wanneer jy iemand deur die Koninkryksaal neem, moet jy verduidelik hoe dit van ander plekke van aanbidding verskil. Vestig sy aandag op die beskeie voorkoms van hierdie onderrigsentrum. Wys vir die persoon aspekte van die Koninkryksaal wat spesifiek verband hou met ons openbare bediening—die lektuurtoonbank, gebiedskaarte en bydraebussies (in teenstelling met kollekteborde).

Waar video’s beskikbaar is wat onder leiding van die Bestuursliggaam voorberei is, kan jy dit gebruik om vertroue in die Bybel op te bou, om studente oor die werk van Jehovah se Getuies in te lig en om mense aan te spoor om in ooreenstemming met Bybelbeginsels te lewe.

Gebruik visuele hulpmiddele vir groter groepe. Wanneer dit goed voorberei is en op ’n bekwame wyse aangebied word, kan visuele hulpmiddele goeie onderrigmiddele vir groter groepe wees. Hierdie visuele hulpmiddele word in verskeie vorme deur die “getroue en verstandige slaaf”-klas voorsien.

Studiemateriaal in Die Wagtoring bevat gewoonlik visuele hulpmiddele in die vorm van illustrasies wat die studiehouer kan gebruik om belangrike punte te beklemtoon. Dit is ook die geval met publikasies wat by Gemeentelike Boekstudies gebruik word.

Party sketse vir openbare toesprake bied blykbaar meer geleenthede om visuele hulpmiddele te gebruik om punte toe te lig. Maar dit is gewoonlik beter om die aandag te vestig op wat in die Bybel is, wat die meeste in die gehoor in hulle hande sal hê. As ’n prent of ’n kort skets van hoofpunte soms nodig is om een of verskeie hoofpunte van ’n toespraak oor te dra, moet jy vooraf seker maak dat die visuele hulpmiddel duidelik van agter in die vergaderplek gesien (of gelees) kan word. Hierdie middele moet spaarsaam gebruik word.

Ons gebruik nie visuele hulpmiddele wanneer ons praat en onderrig sodat ons mense kan vermaak nie. Wanneer ’n gepaste visuele hulpmiddel gebruik word, moet dit visuele trefkrag gee aan idees wat spesiale klem verdien. Hierdie hulpmiddele dien ’n nuttige doel wanneer dit help om die gesproke woord op te helder en makliker verstaanbaar te maak, of wanneer dit kragtige bewys lewer van die geldigheid van wat gesê word. As dit reg gebruik word, kan ’n gepaste visuele hulpmiddel so ’n blywende indruk maak dat die visuele hulpmiddel sowel as die les baie jare lank onthou word.

Die vermoë om te hoor en te sien, speel albei ’n belangrike rol in die leerproses. Onthou hoe hierdie sintuie deur die grootste Onderrigters gebruik is, en probeer hulle navolg in jou pogings om mense se harte te bereik.