Wat is regtig belangrik?

OP ’N dag het ’n man na Jesus toe gekom. Hy het geweet Jesus was baie wys, en daarom het hy vir hom gesê: ‘Leermeester, sê vir my broer hy moet vir my party van die dinge gee wat hy het.’ Die man het gedink dat hy party van daardie dinge moet hê.

Wat sou jy gesê het as jy Jesus was?— Jesus het gesien die man het ’n probleem. Maar die probleem was nie dat hy die dinge nodig gehad het wat sy broer gehad het nie. Die man se probleem was dat hy nie geweet het wat regtig belangrik is in die lewe nie.

Kom ons dink ’n bietjie hieroor. Wat moet vir ons die belangrikste wees? Moet dit mooi speelgoed, nuwe klere of sulke goed wees?— Nee, daar is iets wat baie belangriker is. En dít is die les wat Jesus vir die man wou leer. Daarom het hy ’n storie vertel oor ’n man wat God vergeet het. Wil jy dit graag hoor?—

Hierdie man was baie ryk. Hy het grond en skure gehad. Alles wat hy geplant het, het goed gegroei. Daar was nie plek in sy skure om alles wat hy geoes het, te bêre nie. Wat sou hy doen? Wel, hy het vir homself gesê: ‘Ek sal my skure afbreek en groter skure bou. Dan sal ek alles wat ek oes en al my goeie dinge, in hierdie nuwe skure bêre.’

Die ryk man het gedink dat dit die wyse ding is om te doen. Hy het gedink hy is baie slim om soveel goed op te gaar. Hy het vir homself gesê: ‘Ek het baie goeie dinge opgegaar. Dit sal my baie jare lank hou. Nou kan ek ontspan. Ek sal eet, drink en vrolik wees.’ Maar daar was iets verkeerd met hoe die man gedink het. Weet jy wat dit was?— Hy het net aan homself en sy eie plesier gedink. Hy het van God vergeet.

Daarom het God met die ryk man gepraat. Hy het gesê: ‘Jou dwase man. Jy sal vannag doodgaan. Wie sal nou die goed hê wat jy opgegaar het?’ Kon die ryk man daardie goed gebruik nadat hy doodgegaan het?— Nee, iemand anders sou dit kry. Jesus het gesê: “So gaan dit met die mens wat vir homself skatte vergaar, maar nie ryk is teenoor God nie.”—Lukas 12:13-21.

Jy wil tog nie soos daardie ryk man wees nie, wil jy?— Sy hoofdoel in die lewe was om materiële dinge te kry. Dit was ’n fout. Hy wou altyd nog meer hê. Maar hy was nie ‘ryk teenoor God’ nie.

Baie mense is soos daardie ryk man. Hulle wil altyd nog meer goed hê. Maar dit kan tot groot probleme lei. Byvoorbeeld, jy het speelgoed, nè?— Watter soort speelgoed het jy? Vertel bietjie vir my.— Sê nou een van jou maats het ’n bal of ’n pop of ’n ander speelding wat jy nie het nie? Sou dit reg wees as jy jou ouers probeer dwing om vir jou ook een te koop?—

Daar is miskien tye wanneer dit lyk of ’n speelding baie belangrik is. Maar wat gebeur ná ’n rukkie daarmee?— Dit raak oud. Dit breek dalk, en dan wil jy dit nie eens meer hê nie. Jy het eintlik iets wat baie kosbaarder is as speelgoed. Weet jy wat dit is?—

Dit is jou lewe. Jou lewe is baie belangrik, want daarsonder kan jy niks doen nie. Maar jou lewe hang daarvan af dat jy doen wat God behaag, of bly maak, nie waar nie?— Laat ons dan nie soos daardie dwase ryk man wees wat God vergeet het nie.

Dit is nie net kinders wat dwase dinge doen soos daardie ryk man nie. Baie grootmense doen dit ook. Party van hulle wil altyd meer hê as wat hulle het. Hulle het miskien genoeg kos vir die dag, klere om te dra en ’n plek om te bly. Maar hulle wil nog meer hê. Hulle wil baie klere hê. En hulle wil groter huise hê. Hierdie goed kos geld. Daarom werk hulle hard om baie geld te kry. En hoe meer geld hulle kry, hoe meer wil hulle hê.

Party grootmense raak so besig om geld te maak, dat hulle nie meer tyd het om saam met hulle gesin te wees nie. En hulle het geen tyd vir God nie. Kan hulle geld hulle aan die lewe hou?— Nee, dit kan nie. Kan hulle hulle geld gebruik nadat hulle dood is?— Nee. Dit is omdat dooie mense glad niks kan doen nie.—Prediker 9:5, 10.

Beteken dit dat dit verkeerd is om geld te hê?— Nee. Ons kan kos en klere met geld koop. Die Bybel sê dit is ’n beskerming (Prediker 7:12). Maar as ons lief is vir geld, gaan ons groot probleme hê. Ons sal soos daardie dwase ryk man wees wat vir homself skatte opgegaar het en nie ryk was teenoor God nie.

Wat beteken dit om ryk te wees teenoor God?— Dit beteken dat ons God eerste in ons lewe stel. Party mense sê hulle glo in God. Hulle dink dit is genoeg om net te glo. Maar is hulle regtig ryk teenoor God?— Nee, hulle is soos die ryk man wat God vergeet het.

Jesus het nooit sy Vader in die hemel vergeet nie. Hy het nie probeer om baie geld te maak nie. En hy het nie baie materiële dinge gehad nie. Jesus het geweet wat regtig belangrik is in die lewe. Weet jy wat dit is?— Dit is om ryk te wees teenoor God.

Sê bietjie vir my, hoe kan ons ryk wees teenoor God?— Ons kan ryk wees teenoor God as ons die dinge doen wat hom behaag. Jesus het gesê: ‘Ek doen altyd die dinge wat hom behaag’ (Johannes 8:29). God hou daarvan as ons doen wat hy wil hê ons moet doen. Sê nou vir my, watter dinge kan jy doen om God te behaag?— Ja, jy kan die Bybel lees, na Christelike vergaderinge toe gaan, tot God bid en ander help om van hom te leer. Dít is regtig die belangrikste dinge in die lewe.

Omdat Jesus ryk was teenoor God, het Jehovah vir hom gesorg. Hy het vir Jesus die beloning gegee om vir ewig te lewe. As ons soos Jesus is, sal Jehovah ons liefhê en ook vir ons sorg. Laat ons dan soos Jesus wees en nooit soos daardie ryk man wat God vergeet het nie.