Wat beteken dit alles?
JESUS CHRISTUS het gesê dat “die voleinding van die stelsel van dinge” deur oorlog, voedseltekorte, pessiektes en aardbewings gekenmerk sal word.—Matteus 24:1-8; Lukas 21:10, 11.
Sedert 1914 word die lewe bederf deur oorloë tussen nasies en etniese groepe, dikwels as gevolg van politieke inmenging deur geestelikes, en deesdae deur wydverspreide terreuraanvalle.
Ten spyte van wetenskaplike vooruitgang is ernstige voedseltekorte die lot van honderdmiljoene mense regoor die wêreld. Elke jaar sterf miljoene mense weens ’n gebrek aan voedsel.
Pessiektes, dit wil sê groot epidemies van aansteeklike siektes, is ook deel van die teken wat Jesus gegee het. Ná die Eerste Wêreldoorlog het ’n griepepidemie meer as 21 000 000 lewens geëis. In teenstelling met die plae van vergange jare, wat grotendeels tot spesifieke gebiede beperk was, het dit nasies in alle wêrelddele sowel as afgeleë eilande getref. Nou teister vigs die wêreld, en plae soos tering, malaria, rivierblindheid en Chagassiekte is ’n voortdurende probleem in ontwikkelende lande.
Daar word berig dat tienduisende aardbewings van verskillende sterktes elke jaar plaasvind. Ondanks die beskikbare toerusting en verbeterde waarskuwingsmetodes is rampe in bevolkingssentrums as gevolg van aardbewings dikwels in die nuus.
Die Bybel het ook voorspel: “Weet dít, dat daar in die laaste dae kritieke tye sal wees wat moeilik is om deur te kom. Want mense sal liefhebbers van hulleself wees, liefhebbers van geld, aanmatigend, hoogmoedig, lasteraars, ongehoorsaam aan ouers, ondankbaar, dislojaal, sonder natuurlike geneentheid, nie bereid tot enige ooreenkoms nie, kwaadsprekers, sonder selfbeheersing, wreedaardig, sonder liefde vir die goeie, verraaiers, eiesinnig, opgeblase van trots, liefhebbers van genot eerder as liefhebbers van God, wat ’n vorm van godvrugtige toegewydheid het maar die krag daarvan verloën; en keer jou van hierdie mense af.”—2 Timoteus 3:1-5.
Stem jy nie saam dat ons in ‘kritieke tye lewe wat moeilik is om deur te kom’ nie?
Het jy al opgelet dat mense in ’n buitengewoon hoë graad liefhebbers van hulleself en liefhebbers van geld is en deur trots aangedryf word?
Bestaan daar enige twyfel dat die wêreld vol mense is wat veeleisend maar ondankbaar, nie bereid tot enige ooreenkoms nie en dislojaal is?
Is jy daarvan bewus dat ongehoorsaamheid aan ouers tesame met ’n skokkende gebrek aan liefde, nie net op ’n paar plekke nie maar wêreldwyd, dramaties toegeneem het?
Jy besef ongetwyfeld dat ons in ’n wêreld lewe wat dronk is van liefde vir genot, maar ’n gebrek het aan liefde vir die goeie. Dit is hoe die Bybel gesindhede beskryf wat gedurende “die laaste dae” sou heers.
Het ons verdere bewyse nodig om die tyd waarin ons lewe, te identifiseer? Jesus het ook voorspel dat die goeie nuus van God se Koninkryk gedurende hierdie selfde tydperk in die hele bewoonde aarde verkondig sal word (Matteus 24:14). Word dit gedoen?
Die Wagtoring, ’n tydskrif wat op die Bybel gebaseer is en daartoe verbind is om die goeie nuus van Jehovah se Koninkryk te verkondig, word gereeld in meer tale as enige ander tydskrif gedruk.
Elke jaar wy Jehovah se Getuies meer as ’n miljard uur daaraan om persoonlik vir ander van God se Koninkryk te getuig.
Tans gee hulle lektuur wat die Bybel verklaar, in sowat 400 tale uit, selfs in tale wat deur afgeleë en klein bevolkingsgroepies gepraat word. Jehovah se Getuies het alle nasies met die goeie nuus bereik; hulle het ook die predikingswerk in baie eilande en gebiede gedoen wat te klein is om van enige betekenis in die politieke wêreld te wees. In die meeste lande het hulle ’n gereelde program van Bybelopvoeding.
Ja, die goeie nuus van God se Koninkryk word in die hele bewoonde aarde verkondig, nie om die wêreld te bekeer nie, maar as ’n getuienis. Mense in alle wêrelddele word die geleentheid gegee om te wys of hulle omgee wie die hemel en die aarde geskep het en of hulle respek vir sy wette en liefde vir hulle medemens sal betoon.—Lukas 10:25-27; Openbaring 4:11.
God se Koninkryk gaan binnekort die aarde van al die goddeloses reinig en dit ’n aardwye paradys maak.—Lukas 23:43.
[Venster op bladsy 6]
Die laaste dae waarvan?
Nie die laaste dae van die mensdom nie. Vir diegene wat die wil van God doen, bied die Bybel die vooruitsig om vir ewig te lewe.—Johannes 3:16, 36; 1 Johannes 2:17.
Nie die laaste dae van die aarde nie. God se Woord belowe dat die bewoonde aarde vir ewig sal bestaan.—Psalm 37:29; 104:5; Jesaja 45:18.
Dit is eerder die laaste dae van hierdie gewelddadige, liefdelose stelsel van dinge en van diegene wat in die weë daarvan wandel.—Spreuke 2:21, 22.
[Venster/Prent op bladsy 7]
Is die Bybel werklik God se Woord?
Die Bybelprofete het herhaaldelik geskryf: “Só het Jehovah gesê” (Jesaja 43:14; Jeremia 2:2). Selfs Jesus Christus, die Seun van God, het beklemtoon dat hy ‘nie uit homself’ gepraat het nie (Johannes 14:10). Die Bybel self sê onomwonde: “Die hele Skrif is deur God geïnspireer.”—2 Timoteus 3:16.
Geen ander boek word in soveel tale uitgegee nie—meer as 2 200, volgens die United Bible Societies. Geen ander boek het so ’n groot verspreiding nie—nou meer as viermiljard eksemplare. Is dit nie wat jy sou verwag van ’n boodskap van God wat vir die hele mensdom bedoel is nie?
Sien die boek Die Bybel—God se woord of die mens s’n?, wat deur Jehovah se Getuies uitgegee word, vir ’n vollediger bespreking van die getuienis dat die Bybel deur God geïnspireer is.
As jy die Bybel lees met waardering vir die feit dat dit werklik God se Woord is, sal jy grootliks daarby baat vind.
[Venster/Prente op bladsy 8]
Wat is God se Koninkryk?
Dit is die hemelse regering wat die heerskappy uitoefen van die ware God, Jehovah, die Skepper van die hemel en die aarde.—Jeremia 10:10, 12.
Die Bybel identifiseer Jesus Christus as die een aan wie God hierdie heersersgesag gegee het (Openbaring 11:15). Terwyl Jesus op die aarde was, het hy getoon dat hy reeds verbasende gesag van God ontvang het—gesag wat hom in staat gestel het om die natuurkragte te beheer, allerhande siektes te genees en selfs die dooies op te wek (Matteus 9:2-8; Markus 4:37-41; Johannes 11:11-44). Geïnspireerde Bybelprofesieë het voorspel dat God hom ook “heerskappy en waardigheid en ’n koninkryk [sou gee], sodat al die volke, volksgroepe en tale hóm sou dien” (Daniël 7:13, 14). Daardie koninkryk word die Koninkryk van die hemel genoem; dit is vanuit die hemel dat Jesus Christus nou sy heerskappy uitoefen.
[Prente op bladsy 7]
Die goeie nuus word wêreldwyd verkondig