Hoofstuk 10

Waarom het my vriend my seergemaak?

“Kerry was ’n baie goeie vriendin. Ek het haar elke middag ná werk opgelaai, want sy het nie ’n motor gehad nie. Maar kort voor lank het dit vir my begin voel asof sy van my misbruik maak.

“Sy was altyd besig om op haar selfoon te praat of om ’n SMS aan iemand te stuur as sy in die motor geklim het. Sy het nooit dankie gesê wanneer ek haar afgelaai het nie en sy het opgehou om by te dra vir die petrol. En haar gesprekke was negatief. Ek het vir myself kwaad geword omdat ek so lank geduldig gebly het met haar!

“Eendag het ek vriendelik vir Kerry verduidelik dat ek haar nie meer ná werk sal kan kom oplaai nie. Van toe af het sy nog nie weer my geselskap opgesoek nie—wat my selfs meer oortuig dat sy net met my vriende was omdat sy iets by my kon kry. En dit maak regtig seer!”—Nicole.

DIT kan met die beste vriende gebeur. Eendag is die twee onafskeidbaar; die volgende dag praat hulle nie eers met mekaar nie. Hoe kan ’n goeie vriendskap so gou versuur?

● Vir Jeremy het dit gelyk of alles verander het toe ’n goeie vriend omtrent 1 600 kilometer ver weggetrek het. “Nadat hy getrek het, het hy my nooit gebel nie”, sê Jeremy, “en dit het my regtig seergemaak.”

● Kerrin het ’n persoonlikheidsverandering opgemerk in die meisie wat vyf jaar lank haar beste vriendin was. “Haar gesindheid en die dinge wat sy gesê het, het my regtig bekommer”, sê Kerrin. “Sy het negatief en sinies geword oor dinge wat vir my belangrik was. Toe ons dit probeer uitpraat het, het sy gesê dat ek eiegeregtig en dislojaal is en dat ons vriendskap nie vir haar goed was nie!”

● Vir Gloria het die einde van ’n hegte vriendskap sonder waarskuwing of verduideliking gekom. “Aan die begin het ons vreeslik goed oor die weg gekom”, sê Gloria, “en sy het vir my gesê dat ek soos ’n suster vir haar is. Toe, uit die bloute, het sy opgehou om dinge saam met my te doen en flou verskonings daarvoor uitgedink.”

● Die moeilikheid tussen Laura en Daria het begin toe Daria Laura se kêrel afgerokkel het. “Sy het ure lank met hom oor die telefoon gepraat, al het hy met my uitgegaan”, sê Laura. “Ek is deur my beste vriendin verraai en het ’n moontlike huweliksmaat verloor—alles tegelyk!”

Wat het verkeerd gegaan?

Almal maak foute. Dis net te verstane dat ’n vriend(in) die een of ander tyd iets gaan doen of sê wat jou seermaak. As jy eerlik wil wees, kan jy dalk aan ’n paar keer dink dat jy ander seergemaak het (Prediker 7:22). “Ons is almal onvolmaak, en ons gaan mekaar af en toe omkrap”, sê ’n meisie met die naam Lisa. Gewoonlik kan ’n breuk tussen vriende wat weens ’n klein misverstand ontstaan het, deur ’n kort gesprek herstel word.

Maar in ander gevalle ontstaan ’n breuk tussen vriende nie weens ’n enkele gebeurtenis nie, maar omdat hulle geleidelik agterkom dat die twee van hulle nie soveel in gemeen het as wat hulle gedink het nie. Onthou, terwyl jy grootword, verander jou belangstellings—en jou vriend(in) s’n ook. Wat kan jy doen as jy begin agterkom dat jy en ’n vriend(in) uitmekaar dryf?

Hoe om ’n vriendskap te herstel

Het jy al ooit een van jou gunstelingkledingstukke geskeur? Wat het jy gedoen? Het jy dit weggegooi? of dit heelgemaak? Dit het ongetwyfeld grootliks afgehang van hoe erg die skade was en hoeveel die kledingstuk vir jou beteken het. As jy regtig baie van die kledingstuk gehou het, het jy seker na maniere gesoek om dit heel te maak. In baie gevalle is dit ook moontlik met ’n beskadigde vriendskap. Baie hang af van wat gebeur het en hoeveel die verhouding vir jou beteken.a

As iemand jou byvoorbeeld deur die een of ander onvriendelike woord of daad seergemaak het, kan jy dalk die probleem oplos deur die raad in Psalm 4:4 toe te pas: “Sê wat julle te sê het in julle hart, op julle bed, en bly stil.” Dink dus mooi voor jy die vriendskap weggooi. Het hy of sy dit moedswillig gedoen? As jy nie seker kan wees nie, gee eerder jou vriend(in) die voordeel van die twyfel. In baie gevalle kan ‘liefde ’n menigte sondes bedek’.—1 Petrus 4:8.

Jy kan ook kyk of jy dalk tot die probleem bygedra het. As ’n vriend(in) byvoorbeeld iets vertrouliks uitlap, was jy nie dalk in die eerste plek onverstandig om hom of haar met die inligting te belas nie? ’n Ander vraag waaraan jy kan dink, is of jý die oorsaak is dat daar met jou gespot word—miskien omdat jy te veel praat of dwase dinge sê (Spreuke 15:2). Indien wel, moet jy jou afvra: ‘Moet ek veranderinge maak sodat my vriend(in) my meer sal respekteer?’

“Kan ons praat oor wat gebeur het?”

Maar sê nou jy voel dat jy die saak eenvoudig nie kan oorsien nie? In daardie geval is dit dalk die beste om met jou vriend(in) te praat. Maar sorg dat jy dit nie doen wanneer jy kwaad is nie. Die Bybel sê: “’n Woedende man verwek twis, maar die een wat nie gou toornig word nie, bring ’n rusie tot bedaring” (Spreuke 15:18). Wag dan totdat jy afgekoel het voordat jy die situasie probeer regstel.

Wanneer jy wel jou vriend(in) nader, moet jy onthou dat jou doel nie is om “kwaad vir kwaad [te] vergeld” nie (Romeine 12:17). Jy wil eerder die saak oplos en die vriendskap herstel (Psalm 34:14). Praat dus uit jou hart. Jy kan sê: “Ons is al lank vriende. Kan ons praat oor wat gebeur het?” As jy eers weet wat die oorsaak van die probleem is, sal dit dalk makliker wees om die vriendskap te herstel. Al wil jou vriend(in) nie daaroor praat nie, kan dit jou troos dat jy probeer het om die vrede te herstel.

Op die ou end kan jy seker wees dat, hoewel daar “metgeselle [is] wat geneig is om mekaar te verpletter”, daar ook “’n vriend [is] wat sterker aanhang as ’n broer” (Spreuke 18:24). Toegegee, selfs in die beste vriendskappe kan daar van tyd tot tyd ’n bietjie spanning wees. Wanneer dit gebeur, moet jy alles in jou vermoë doen om die verhouding te herstel. Om die waarheid te sê, as jy gewillig is om verskille uit te stryk, bewys dit dat jy volwasse word.

LEES MEER HIEROOR IN DEEL 1, HOOFSTUK 8

[Voetnoot]

SLEUTELTEKSTE

“Wees, indien moontlik, sover dit van julle afhang, vreedsaam teenoor alle mense.”—Romeine 12:18.

WENK

Voordat jy jou eie gevolgtrekking maak, hoor eers wat jou vriend(in) se kant van die storie is.—Spreuke 18:13.

HET JY GEWEET . . . ?

Mense in gesonde verhoudings gee mekaar genoeg ruimte (Spreuke 25:17). In teenstelling daarmee kan dit ’n vriendskap versmoor as ’n mens te besitlik raak oor ’n vriend(in) se tyd en aandag.

AKSIEPLAN!

As ek met ’n vriend(in) moet praat oor iets wat hy of sy gedoen het wat my seergemaak het, kan ek begin deur te sê ․․․․․

Al is ek ontsteld oor iets wat ’n vriend(in) gedoen het, sal ek die vrede probeer bewaar deur ․․․․․

Wat ek graag vir my ouer(s) hieroor wil vra ․․․․․

WAT DINK JY?

● Waarom dryf vriende soms uitmekaar?

● Watter soort probleme kan jy dalk in jou hart oplos, en watter soort probleme sal jy dalk met die vriend(in) wat jou seergemaak het, moet bespreek?

● Watter goeie lesse kan jy daaruit leer as ’n vriend(in) jou seergemaak het?

● Wat kan jy doen om te probeer voorkom dat ’n vriend(in) jou seermaak?

[Lokteks op bladsy 95]

As ek dit alles weer kon doen, sou ek nie verwag het dat ons vriendskap volmaak moes wees nie. Ek sou meer geluister het en hom meer ondersteun het en nie sy swakhede vergroot het nie. Ek verstaan nou dat ’n suksesvolle vriendskap beteken dat julle saam deur die toetse en uitdagings kan werk.’’—Keenon

[Prent op bladsy 94]

’n Breuk tussen vriende is soos ’n skeur in ’n kledingstuk—maar albei kan herstel word