Hoofstuk 28

Hoe kan ek homoseksualiteit vermy?

“Gedurende my tienerjare het ek geworstel met ’n aangetrokkenheid tot ander mans. Diep in my binneste het ek geweet dat hierdie gedagtes nie normaal is nie.”—Olef.

“Ek en my vriendin het mekaar een of twee keer gesoen. Omdat ek nog steeds van seuns gehou het, het ek gewonder of ek biseksueel is.”—Sarah.

MIN mense sou ontken dat homoseksualiteit deesdae meer openlik bespreek word as dekades gelede. En waag dit net om te sê jy keur dit nie goed nie! Jy sal heel moontlik met kritiek gebombardeer word. Die 16-jarige Amy sê: “Een meisie het vir my gesê dat ek seker ook bevooroordeeld is teen mense van ander rasse, want my mening oor homoseksualiteit kom op dieselfde neer—vooroordeel!”

Vandag se permissiewe gesindhede het baie jongmense aangespoor om met homoseksuele verhoudings te eksperimenteer. “Baie van die meisies in my skool sê hulle is lesbies, biseksueel of ‘oop vir oortuiging’”, sê die 15-jarige Becky. Christa, 18, vind dat die situasie soortgelyk is by haar skool. “Twee klasmaats het my al gevra om met hulle seks te hê”, sê sy. “Een van hulle het vir my ’n briefie geskryf om te vra of ek wou uitvind hoe dit is om dit met ’n meisie te doen.”

Aangesien homoseksuele verhoudings so openlik aanbeveel word, begin jy dalk wonder: ‘Is homoseksualiteit regtig so sleg? Sê nou ek voel aangetrokke tot iemand van dieselfde geslag? Beteken dit dat ek gay is?’

Hoe beskou God homoseksualiteit?

Vandag is daar baie mense—selfs sommige kerkleiers—wat die erns van homoseksualiteit afwater. Maar God se Woord, die Bybel, neem ’n duidelike standpunt in. Dit sê vir ons dat Jehovah God die man en die vrou geskep het en dat dit sy voorneme was dat seksuele begeertes alleenlik tussen ’n man en sy vrou bevredig moet word (Genesis 1:27, 28; 2:24). Dis dan glad nie verbasend dat die Bybel homoseksuele dade veroordeel nie.—Romeine 1:26, 27.

Party sê dalk dat God se Woord verouderd is. Maar waarom dink jy sê hulle dit so maklik? Is dit dalk omdat die Bybel se beskouing met hulle s’n bots? Baie verwerp God se Woord bloot omdat dit iets anders leer as wat hulle wil glo. Maar so ’n beskouing is die gevolg van vooroordeel, en ons moet bo daardie soort denke uitstyg!

Maar sê nou jy voel aangetrokke tot iemand van dieselfde geslag? Beteken dit noodwendig dat jy ’n homoseksueel is? Nee. Onthou, jy is in “die bloei van die jeug”, ’n tydperk waarin jy vatbaar is vir onwillekeurige seksuele opwekking (1 Korintiërs 7:36). As jy soms aangetrokke voel tot iemand van dieselfde geslag, wees verseker dat dit nie beteken dat jy gay is nie. Sulke gevoelens verdwyn gewoonlik mettertyd. Intussen moet jy sorg dat jy nie by homoseksuele dade betrokke raak nie. Hoe?

Bid oor die saak. Soos Dawid, kan jy Jehovah smeek: “Deurvors my, o God, en ken my hart. Ondersoek my, en ken my verontrustende gedagtes, en kyk of daar in my enigsins ’n pynlike weg is, en lei my op die weg van onbepaalde tyd” (Psalm 139:23, 24). Jehovah kan jou versterk met ’n vrede wat “alle denke te bowe gaan”. Dit kan ‘jou hart en jou verstandelike vermoëns bewaak’ en jou “die krag wat bo die normale is”, gee sodat jy nie aan verkeerde begeertes sal toegee nie.—Filippense 4:6, 7; 2 Korintiërs 4:7.

Vul jou verstand met opbouende gedagtes (Filippense 4:8). Lees die Bybel elke dag. Moet nooit die krag wat dit het om jou verstand en hart te vorm, onderskat nie (Hebreërs 4:12). ’n Jong man met die naam Jason sê: “Die Bybel—onder andere tekste soos 1 Korintiërs 6:9, 10 en Efesiërs 5:3—het ’n kragtige uitwerking op my gehad. Ek lees hierdie tekste elke keer wanneer verkeerde begeertes by my opkom.”

Bly weg van pornografie en homoseksuele propaganda (Kolossense 3:5). Vermy enigiets wat onsedelike begeertes sal opwek. Dit sluit dinge in soos pornografie, sekere TV-programme en rolprente, en miskien selfs mode- en liggaamsboutydskrifte met foto’s van skraps geklede modelle. Vervang negatiewe gedagtes met positiewe gedagtes. “Wanneer ek ook al homoseksuele drange het”, sê een tienerseun, “peins ek oor my gunstelingteks in die Bybel.”

Party mense sê natuurlik dat al hierdie dinge onnodig is, dat jy eenvoudig ‘jou seksualiteit moet aanvaar’ en ‘nie moet baklei teen wie jy is nie’. Maar die Bybel sê dat jy beter kan doen as dit! Dit vertel ons byvoorbeeld dat party vroeë Christene wat voorheen homoseksualiteit beoefen het, verander het (1 Korintiërs 6:9-11). Jy kan ook die stryd wen—al word dit op dié stadium net in jou hart gevoer.

Sê nou homoseksuele begeertes duur voort? Moenie daarvoor ingee nie! Jehovah veroordeel homoseksuele dade. Iemand wat met homoseksuele begeertes worstel, het dus ’n bereikbare doelwit—hy of sy kan kies om nie aan daardie begeertes toe te gee nie.

Ter toeligting: Iemand is dalk ‘geneig tot woede’ (Spreuke 29:22). In die verlede het hy moontlik vryelik uiting gegee aan sy woede. Maar wanneer hy die Bybel bestudeer, besef hy dat hy selfbeheersing moet aankweek. Beteken dit dat hy nooit weer sal voel hoe woede in hom opwel nie? Nee. Maar omdat hy weet wat die Bybel oor onbeheerste woede sê, sal hy hard probeer om nie aan sy gevoelens toe te gee nie.

So ook met iemand wat aangetrokke voel tot persone van dieselfde geslag maar nou geleer het wat die Bybel oor homoseksuele gebruike sê. ’n Ongepaste begeerte sal dalk nog steeds van tyd tot tyd by hom opkom. Maar iemand wat homoseksualiteit beskou soos Jehovah dit beskou, sal die krag hê om daardie begeerte te weerstaan.

Moenie moed opgee nie!

As jy met homoseksuele begeertes worstel, voel jy dalk soos een jong man wat gesê het: “Ek het my gevoelens probeer verander. Ek het tot Jehovah gebid om my te help. Ek lees die Bybel. Ek het na toesprake oor die onderwerp geluister. Maar ek weet nie meer wat om te doen nie.”

As jy jou in ’n soortgelyke situasie bevind, voer jy beslis ’n hewige stryd. Daar is geen maklike oplossing nie. Nietemin moet enigiemand wat God se goedkeuring wil geniet, aan Sy sedelike standaarde voldoen en van onsedelike gedrag wegbly, al is dit hoe moeilik. Moet nooit vergeet nie: God verstaan die stryd wat jy in jou hart voer en hy het meegevoel met diegene wat hom dien (1 Johannes 3:19, 20).a Wanneer jy God se gebooie gehoorsaam, kan jy sy seëninge ontvang. Ja, in die onderhouding van God se gebooie is daar “’n groot beloning” (Psalm 19:11). Jy sal nou al die beste lewenswyse geniet wat in hierdie wêreld vol probleme moontlik is.

Vertrou dus op God, en stry teen verkeerde begeertes (Galasiërs 6:9). Strewe daarna om te “verafsku wat goddeloos is” en ‘vas te hou aan wat goed is’ (Romeine 12:9). Met verloop van tyd en met inspanning sal jy heel moontlik vind dat die verkeerde begeertes afneem. Maar die heel beste is dat jy die vooruitsig sal hê om vir ewig in God se regverdige nuwe wêreld te lewe as jy homoseksuele dade vermy.

[Voetnoot]

SLEUTELTEKSTE

“Ondersoek my, en ken my verontrustende gedagtes, en kyk of daar in my enigsins ’n pynlike weg is.”—Psalm 139:23, 24.

WENK

Om ’n gesonde beskouing van manlikheid te ontwikkel, kan jy die voorbeeld van Jesus bestudeer (1 Petrus 2:21). Hy was ’n volmaakte voorbeeld van iemand wat manlike krag sowel as teerheid geopenbaar het.

HET JY GEWEET . . . ?

Al het jy dalk nie heeltemal beheer oor jou begeertes nie, het jy wel beheer oor jou dade. Jy kan kies om nie aan verkeerde begeertes toe te gee nie.

AKSIEPLAN!

As iemand my vra waarom die Bybel homoseksualiteit veroordeel, sal ek sê ․․․․․

As iemand sê dat die Bybel se beskouing verkramp is, sal ek so met hom redeneer ․․․․․

Wat ek graag vir my ouer(s) hieroor wil vra ․․․․․

WAT DINK JY?

● Waarom keur God homoseksualiteit af?

● Watter praktiese stappe kan jy doen om te voorkom dat jy deur homoseksualiteit verstrik word?

● Beteken die feit dat jy God se beskouing van homoseksualiteit aanneem dat jy homofobies is, dit wil sê dat jy homoseksuele haat of ’n sterk afkeer van hulle het?

[Lokteks op bladsy 236]

Die wêreld se verwronge denke het my verstand beïnvloed en tot my seksuele verwarring bygedra. Nou bly ek ver weg van enigiets of enigiemand wat homoseksualiteit voorstaan.’’—Anna

[Prent op bladsy 233]

Alle jongmense het ’n keuse—om die wêreld se verdorwe beskouing van seksualiteit aan te neem of om die hoë sedelike weg te volg wat in God se Woord uiteengesit word