Hoofstuk 23

Hoe kan ek verduidelik wat die Bybel oor homoseksualiteit sê?

Wanneer twee gewilde aktrises mekaar by ’n prysuitdeling met ’n hartstogtelike soen groet, is die plek in rep en roer! Toeskouers snak geskok na hulle asem, maar bars dan in applous uit. Gays noem dit ’n oorwinning. Skeptici sê dat dit net ’n poging is om publisiteit te verkry. Video-uittreksels van die soen sal dae lank herhaaldelik in TV-nuusberigte gewys word—en miljoene mense sal op die Internet daarna kyk.

SOOS die bogenoemde scenario toelig, trek min gebeurtenisse meer media-aandag as wanneer ’n beroemde persoon te kenne gee of openlik sê dat hy of sy gay, lesbies of biseksueel is. Party mense prys sulke persone vir hulle moed; ander veroordeel hulle vir hulle losbandigheid. Dan is daar ook baie wat die beskouing het dat homoseksualiteit bloot ’n alternatiewe lewenstyl is. “Toe ek op skool was”, sê die 21-jarige Daniel, “het selfs die kinders wat nie gay was nie, gevoel dat jy diskrimineer en ander veroordeel as jy dink dat dit verkeerd is om gay te wees.”

Gesindhede oor homoseksualiteit verskil dalk van geslag tot geslag of van land tot land. Maar Christene word nie “hiernatoe en daarnatoe gevoer . . . deur elke wind van lering” nie (Efesiërs 4:14). Hulle bly eerder by die Bybel se beskouing.

Wat is die Bybel se beskouing van homoseksualiteit? En wat kan jy, as jy volgens die Bybel se sedelike wette lewe, vir diegene sê wat beweer dat jy diskrimineer, ander veroordeel of selfs ’n fobie vir gays het? Kyk na die volgende vrae of menings en moontlike antwoorde.

“Wat sê die Bybel oor homoseksualiteit?”

“Die Bybel toon duidelik dat dit God se bedoeling was dat slegs ’n man en vrou met mekaar seks mag hê en net as hulle met mekaar getroud is (Genesis 1:27, 28; Levitikus 18:22; Spreuke 5:18, 19). Wanneer die Bybel hoerery veroordeel, verwys dit na homoseksuele en verkeerde heteroseksuele gedrag.”a—Galasiërs 5:19-21.

“Wat is jou beskouing van homoseksualiteit?”

“Ek haat nie homoseksuele nie, maar ek kan hulle gedrag nie goedkeur nie.”

Onthou: As jy jou deur die Bybel se sedelike wette laat lei, dan is dit die lewenswyse wat jy gekies het, en jy het die reg om dit te volg (Josua 24:15). Moenie skaam wees oor jou beskouing nie.—Psalm 119:46.

“Moet Christene nie alle mense respekteer, ongeag hulle seksuele oriëntasie nie?”

“Beslis. Die Bybel sê: ‘Eer alle soorte mense’ of, soos die Nuwe Afrikaanse Bybelvertaling dit stel: ‘Julle moet alle mense respekteer’ (1 Petrus 2:17). Christene het dus nie ’n fobie vir homoseksuele nie. Hulle betoon goedhartigheid teenoor alle mense, insluitende dié wat gay is.”—Matteus 7:12.

“Bevorder jou beskouing van homoseksualiteit nie diskriminasie teen gays nie?”

“Glad nie. Ek verwerp homoseksuele gedrag, nie homoseksuele mense nie.”

Jy kan byvoeg: “Ek het byvoorbeeld ook besluit om nie te rook nie. Selfs net die idee is vir my walglik. Maar sê nou jy rook en jy voel anders daaroor? Ek sal nie teen jou diskrimineer as gevolg van jou beskouing nie, en ek is seker dat jy ook nie teen my sal diskrimineer as gevolg van my beskouing nie—of hoe? Dieselfde beginsel geld vir ons verskillende beskouings van homoseksualiteit.”

“Het Jesus nie geleer dat ons verdraagsaam moet wees nie? Moet Christene dan nie ’n permissiewe beskouing van homoseksualiteit hê nie?”

“Jesus het sy volgelinge nie aangespoor om enige en alle lewenstyle te aanvaar nie. Hy het eerder geleer dat redding moontlik is vir ‘elkeen wat geloof in hom beoefen’ (Johannes 3:16). Om geloof in Jesus te beoefen, behels om in ooreenstemming met God se sedelike wette te lewe, wat sekere gedrag verbied—insluitende homoseksualiteit.”—Romeine 1:26, 27.

“Homoseksuele kan nie verander nie; hulle is so gebore.”

“Die Bybel sê niks oor die biologiese redes vir homoseksualiteit nie, maar dit erken wel dat sommige neigings diep ingewortel is (2 Korintiërs 10:4, 5). Al voel party dalk aangetrokke tot dieselfde geslag, sê die Bybel vir Christene om homoseksuele dade te vermy.”

Wenk: Eerder as om betrokke te raak by ’n debat oor die oorsaak van homoseksuele begeertes, kan jy beklemtoon dat die Bybel homoseksuele gedrag verbied. Jy kan ’n vergelyking tref deur te sê: “Baie beweer byvoorbeeld dat gewelddadige gedrag ’n genetiese oorsaak kan hê en dat party mense dus ’n ingebore neiging tot sulke gedrag het (Spreuke 29:22). Sê nou dit is waar? Soos jy seker weet, veroordeel die Bybel woedeuitbarstings (Psalm 37:8; Efesiërs 4:31). Is hierdie standaard onregverdig net omdat party dalk ’n neiging het om gewelddadig te wees?”

“Hoe kan God iemand wat tot dieselfde geslag aangetrokke voel, beveel om homoseksualiteit te vermy? Dit klink wreed.”

“Hierdie redenasie is gegrond op die verkeerde idee dat mense op hulle seksuele impulse moet reageer. Die Bybel verleen waardigheid aan mense deur hulle te verseker dat hulle kan kies om ongepaste seksuele begeertes te weerstaan as hulle werklik wil.”—Kolossense 3:5.

“Selfs as jy nie gay is nie, moet jy jou beskouing van homoseksualiteit verander.”

“Sê nou ek dink dat dit nie reg is om te dobbel nie, maar jy dink dit is. Sal dit redelik van jou wees om daarop aan te dring dat ek my beskouing verander, bloot omdat miljoene mense besluit het om te dobbel?”

Onthou: Soos die meeste mense, het homoseksuele ’n stel waardes wat maak dat hulle sekere dinge afkeur—miskien bedrog, ongeregtigheid of oorlog. Die Bybel verbied hierdie dinge; dit verbied ook sekere soorte seksuele gedrag, soos homoseksualiteit.—1 Korintiërs 6:9, 10.

Die Bybel is nie onredelik nie en dit bevorder ook nie diskriminasie nie. Dit sê bloot dat diegene wat homoseksuele begeertes het, aan dieselfde vereiste moet voldoen as diegene wat tot die teenoorgestelde geslag aangetrokke is—hulle moet “vlug vir die hoerery”.—1 Korintiërs 6:18.

Die feit is dat miljoene wat tot die teenoorgestelde geslag aangetrokke voel en wat Bybelstandaarde wil volg, selfbeheersing aan die dag lê ongeag die versoekings waarvoor hulle te staan kom. Dit sluit baie in wat ongetroud is, maar moontlik nie ’n huweliksmaat sal vind nie en baie wat getroud is met iemand wat gestremd is en nie seks kan hê nie. Hulle kan ’n gelukkige lewe lei sonder om hulle seksuele begeertes te bevredig. Diegene met homoseksuele neigings kan dieselfde doen as hulle werklik God se goedkeuring wil geniet.—Deuteronomium 30:19.

LEES MEER OOR HIERDIE ONDERWERP IN DEEL 2, HOOFSTUK 28

[Voetnoot]

SLEUTELTEKSTE

“Maak dan dood julle liggaamsdele wat op die aarde is ten opsigte van hoerery, onreinheid, geslagsdrif, skadelike begeertes en hebsug, wat afgodediens is.”—Kolossense 3:5.

WENK

Hoewel ander se gedrag jou dalk sal ontstel, moet jy ’n alte regverdige houding vermy. Hulle het die vryheid om te kies wat hulle wil glo—net soos jy.

HET JY GEWEET . . . ?

Party eerste-eeuse Christene wat hulle voorheen aan homoseksuele dade skuldig gemaak het, het daarin geslaag om hulle onrein gedrag te verander en is in God se oë “skoon gewas”.—1 Korintiërs 6:9-11.

AKSIEPLAN!

As iemand sê dat die Bybel se beskouing van homoseksua- liteit outyds is, sal ek sê ․․․․․

Om dit duidelik te maak dat ek homoseksuele gedrag afkeur, nie homoseksuele mense nie, sal ek sê ․․․․․

Wat ek graag vir my ouer(s) hieroor wil vra ․․․․․

WAT DINK JY?

● Waarom het God die reg om vir mense sedelike wette op te lê?

● Hoe vind jy daarby baat om die Bybel se sedelike wette te gehoorsaam?

[Lokteks op bladsy 170]

’n Seun by die skool het gedink dat ek gemeen is omdat ek sy lewenswyse verwerp. Maar toe ek verduidelik dat ek hom nie as persoon verwerp nie—en toe hy besef dat ek nie net homoseksualiteit verwerp nie, maar alle vorme van onsedelikheid—het hy my begin respekteer en my selfs verdedig wanneer ander my standpunt bevraagteken het.’’—Aubrey

[Venster op bladsy 168]

wat van biseksualiteit?

Hoewel biseksualiteit onder albei geslagte voorkom, word dit blykbaar al hoe algemener onder meisies. Party is net nuuskierig. Lisa, 26, sê: “Wanneer flieks, TV-programme en musiek iets bevorder, soos meisies wat mekaar soen, sal tieners dit wil probeer—veral as hulle dink dat dit nie verkeerd is nie.”

Ander voel blykbaar werklik tot dieselfde geslag aangetrokke. “Ek het twee biseksuele meisies by ’n partytjie ontmoet”, sê Vicky, 13, “en later by ’n vriendin gehoor dat hulle van my hou. Ek het naderhand SMS’e vir een van die meisies begin stuur en van haar begin hou.”

Het jy al ooit soos Vicky gevoel? Baie mense sal jou eenvoudig aanspoor om jou seksualiteit te aanvaar en openlik te sê dat jy biseksueel is. Maar jy moet besef dat aangetrokkenheid tot dieselfde geslag dikwels net ’n stadium is wat sal verbygaan. Dit is wat Vicky uitgevind het. Die 16-jarige Lisette sê ook: “Nadat ek met my ouers oor my gevoelens gepraat het, het ek beter gevoel. Ek het ook in my biologieklas geleer dat hormoonvlakke gedurende adolessensie baie onstabiel kan wees. As jongmense meer weet van hulle liggaam, dink ek regtig hulle sal verstaan dat aangetrokkenheid tot dieselfde geslag net tydelik kan wees, en dan sal hulle nie dink dat hulle gay is nie.”

Selfs as jy meen dat jou gevoelens dieper strek en nie net ’n tydelike stadium is nie, moet jy besef dat die Bybel vir jou ’n bereikbare doelwit stel: Jy kan kies om nie voor enige verkeerde begeertes, ongeag wat dit is, te swig nie.

[Prent op bladsy 169]

Wanneer dit kom by gewilde beskouings, het Christene die moed om nie met die stroom saam te gaan nie