Hoofstuk 25

Hoe kan ek die masturbasiegewoonte oorkom?

“Ek het begin masturbeer toe ek agt jaar oud was. Ek het later uitgevind hoe God die saak beskou. Elke keer dat ek voor die versoeking geswig het, het ek aaklig gevoel. Ek het my afgevra: ‘Hoe kan God vir iemand soos ek lief wees?’”—Luiz.

WANNEER jy puberteit bereik, kan seksuele begeertes baie sterk word. Gevolglik kan jy in die masturbasiegewoonte verval.a Baie mense sal sê dat dit niks ernstigs is nie. “Niemand kry seer nie”, redeneer hulle. Maar daar is goeie rede om hierdie gewoonte te vermy. Die apostel Paulus het geskryf: “Maak dan dood julle liggaamsdele . . . ten opsigte van . . . geslagsdrif”, oftewel seksuele begeertes (Kolossense 3:5). Masturbasie maak nie seksuele begeertes dood nie, maar vuur dit aan. Kyk ook na die volgende:

● Masturbasie laat ’n persoon gesindhede ontwikkel wat absoluut selfsugtig is. Wanneer ’n persoon masturbeer, is hy of sy byvoorbeeld heeltemal verdiep in sy of haar eie liggaamlike sensasies.

● Masturbasie maak dat jy diegene van die teenoorgestelde geslag as blote voorwerpe vir selfbevrediging beskou.

● Die selfsugtige denkwyse wat deur masturbasie veroorsaak word, kan dit moeilik maak om ’n bevredigende seksuele verhouding in die huwelik te hê.

Pleks van masturbasie te gebruik om opgekropte seksuele drange te bevredig, moet jy eerder probeer om selfbeheersing aan te kweek (1 Tessalonisense 4:4, 5). Om jou hiermee te help, beveel die Bybel aan dat jy in die eerste plek omstandighede vermy wat jou seksueel kan prikkel (Spreuke 5:8, 9). Maar sê nou jy het aan masturbasie verslaaf geraak? Dalk het jy probeer ophou, maar nie daarin geslaag nie. Dit sou maklik wees om te dink dat daar geen hoop vir jou is nie, dat jy nie volgens God se standaarde kan lewe nie. Dit is hoe ’n seun genaamd Pedro homself beskou het. “Wanneer ek voor die versoeking geswig het, het ek aaklig gevoel”, sê hy. “Ek het gedink dat God my nooit sal vergewe nie. Dit was vir my moeilik om te bid.”

As jy so voel, kan jy moed skep. Daar is hoop vir jou. Baie jongmense—en volwassenes—het die masturbasiegewoonte oorkom. Jy kan ook!

Hoe om skuldgevoelens te verwerk

Soos vroeër gemeld is, word dié wat in die masturbasiegewoonte verval het, dikwels deur skuldgevoelens geteister. As jy “op ’n goddelike wyse bedroef gemaak is”, kan dit jou beslis aanspoor om die gewoonte te oorkom (2 Korintiërs 7:11). Maar oordrewe skuldgevoelens kan die teenoorgestelde uitwerking hê. Dit kan jou so mismoedig laat voel dat jy net wil moed opgee.—Spreuke 24:10.

Probeer die saak dus in perspektief plaas. Masturbasie is ’n vorm van onreinheid. Dit kan jou ’n ‘slaaf van allerhande begeertes en genietinge’ maak, en dit bevorder skadelike gesindhede (Titus 3:3). Tog is masturbasie nie ’n vorm van growwe geslagsonsedelikheid, soos hoerery nie (Judas 7). As jy ’n probleem met masturbasie het, hoef jy nie te dink dat jy die onvergeeflike sonde gepleeg het nie. Die sleutel is om die drang te weerstaan en nooit op te hou om daarteen te stry nie!

Dit is maklik om mismoedig te raak as jy voor die versoeking geswig het. Wanneer dit gebeur, moet jy die woorde van Spreuke 24:16 ter harte neem: “Die regverdige kan selfs sewe keer val, en hy sal beslis opstaan; maar die goddeloses sal weens rampspoed struikel.” ’n Tydelike terugslag beteken nie dat jy ’n slegte mens is nie. Moet dus nie ophou om teen die gewoonte te stry nie. Stel eerder vas waarom jy ’n terugslag gehad het, en probeer die situasie vermy wat daartoe aanleiding gegee het.

Maak tyd om oor God se liefde en barmhartigheid te peins. Die psalmis Dawid, wat self met swakhede geworstel het, het gesê: “Soos ’n vader barmhartigheid aan sy kinders bewys, het Jehovah barmhartigheid bewys aan dié wat hom vrees. Want hy weet goed hoe ons gevorm is, gedagtig dat ons stof is” (Psalm 103:13, 14). Ja, Jehovah neem ons onvolmaaktheid in ag en is “vergewensgesind” (Psalm 86:5). Maar hy wil hê dat ons hard moet probeer om te verbeter. Watter praktiese dinge kan jy doen om hierdie gewoonte te oorkom?

Ondersoek jou vermaak. Kyk jy na rolprente of TV-programme of besoek jy webwerwe wat seksueel prikkelend is? Die psalmis het wyslik tot God gebid: “Wend my oë af, sodat hulle niks sien wat waardeloos is nie.”b—Psalm 119:37.

Dwing jou verstand om aan iets anders te dink. ’n Christen met die naam William gee hierdie raad: “Lees iets wat met geestelike dinge te doen het voordat jy gaan slaap. Dit is baie belangrik dat jy jou dag met ’n geestelike gedagte afsluit.”—Filippense 4:8.

Praat met iemand oor die probleem. Omdat jy skaam voel, is dit dalk vir jou moeilik om iemand in jou vertroue te neem en oor jou probleem te praat. Maar as jy dit doen, kan dit jou help om die gewoonte te oorkom! Dit is wat ’n Christen met die naam David gevind het. “Ek het met my pa daaroor gepraat”, sê hy. “Ek sal nooit vergeet wat hy gesê het nie. Hy het gerusstellend geglimlag en gesê: ‘Ek is so trots op jou.’ Hy het geweet hoe moeilik dit vir my was om met hom te gaan praat. Niks sou my beter laat voel het en meer vasbeslote gemaak het as daardie woorde nie.

“My pa het toe vir my ’n paar Bybelverse gewys om my te help om te sien dat daar nog hoop is vir my, en daarna het hy nog ’n paar verse gelees om seker te maak dat ek verstaan hoe ernstig hierdie sonde is. Hy het gesê dat ek nou ‘’n skoon blaadjie moet omslaan’ en dat ons oor ’n sekere tydperk weer daaroor sal praat. Hy het vir my gesê dat ek nie moet toelaat dat ’n terugslag my onderkry nie, maar dat ek dan moet probeer om vir ’n langer tydperk die versoeking te weerstaan.” Tot watter slotsom het David gekom? Hy sê: “Om iemand te hê wat bewus is van my probleem en wat my ondersteun, het my die meeste gehelp.”c

[Voetnote]

SLEUTELTEKSTE

“Vlug . . . vir die begeertes wat eie is aan die jeug, maar streef na regverdigheid, geloof, liefde, vrede, saam met dié wat die Here uit ’n rein hart aanroep.”—2 Timoteus 2:22.

WENK

Bid voordat drange sterk word. Vra Jehovah God om jou “die krag wat bo die normale is”, te gee sodat jy die versoeking kan weerstaan.—2 Korintiërs 4:7.

HET JY GEWEET . . . ?

’n Swak persoon swig maklik voor sy of haar seksuele drange. Maar ’n ware man of ’n ware vrou sal selfbeheersing aan die dag lê, selfs wanneer hy of sy alleen is.

AKSIEPLAN!

Ek kan my gedagtes hou op dinge wat eerbaar is, as ek ․․․․․

Pleks van voor die drang te swig, sal ek ․․․․․

Wat ek graag vir my ouer(s) hieroor wil vra ․․․․․

WAT DINK JY?

● Waarom is dit belangrik om te onthou dat Jehovah “vergewensgesind” is?—Psalm 86:5.

● Watter vertroue het God sekerlik in jou, aangesien hy, die een wat seksuele drange geskep het, ook sê dat jy selfbeheersing moet aankweek?

[Lokteks op bladsy 182]

Vandat ek die probleem oorkom het, het ek ’n skoon gewete voor Jehovah, en dít is iets wat ek vir niks sal verruil nie!’’—Sarah

[Prent op bladsy 180]

As jy val terwyl jy hardloop, beteken dit nie dat jy van voor af moet begin nie—’n terugslag wanneer jy masturbasie probeer oorkom, beteken ook nie dat al jou vordering uitgevee is nie