Jongmense vra . . .

Hoe kan ek hierdie gewoonte oorwin?

“Ek het begin masturbeer toe ek agt jaar oud was. Ek het later geleer wat God se beskouing oor die saak is. Ek het aaklig gevoel elke keer as ek daarvoor geswig het. Ek het my afgevra: ‘Hoe kan God vir iemand soos ek lief wees?’ Ek was oortuig dat ek nie in God se nuwe wêreld sal wees nie.”—Luiz.a

MISKIEN het jy, soos Luiz, aan die masturbasiegewoonte verslaaf geraak. Jy weet dat Jehovah bly sal wees as jy die drang weerstaan en selfbeheersing, ’n vrug van God se heilige gees, aan die dag lê (Galasiërs 5:22, 23; 2 Petrus 1:5, 6). Maar by tye gee jy in. Elke keer as jy terugval, kom jy tot die gevolgtrekking dat jy ’n verlore saak is, dat jy nie in staat is om God se regverdige standaarde na te leef nie.

Dit is presies hoe jong Pedro homself beskou het. “Wanneer ek teruggeval het, het ek aaklig gevoel”, sê hy. “Ek het gedink dat ek nooit sal kan vergoed vir wat ek gedoen het nie. Dit was vir my moeilik om te bid. Ek het begin deur te sê: ‘Jehovah, ek weet nie of u na hierdie gebed gaan luister nie, maar . . . ’” ’n Jong man met die naam André het soortgelyke gedagtes gehad. “Ek het soos ’n regte huigelaar gevoel”, sê hy. “Dit was ’n stryd om soggens op te staan en met die dag te begin. Dit was vir my moeilik om Christelike vergaderinge by te woon of aan die bediening deel te neem.”

As jy soos Luiz, Pedro of André voel, kan jy moed skep. Jy is nie alleen nie, en jou situasie is nie hopeloos nie! Baie jongmense—en oueres—het met masturbasie geworstel en kon dit oorwin. Jy kan ook.b

Hoe om skuldgevoelens te verwerk

Soos reeds gesê is, word diegene wat in die masturbasiegewoonte verval het, dikwels deur skuldgevoelens geteister. As jy “op ’n goddelike wyse bedroef gemaak is”, kan dit jou ongetwyfeld aanspoor om die gewoonte te oorwin (2 Korintiërs 7:11). Maar oordrewe skuldgevoelens kan teenproduktief wees. Dit kan jou so mismoedig laat voel dat jy net wil tou opgooi.—Spreuke 24:10.

Streef dus daarna om die saak in perspektief te stel. Masturbasie is ’n vorm van onreinheid. Dit kan jou ’n ‘slaaf van allerhande begeertes en genietinge’ maak, en dit bevorder gesindhede wat jou verstandelik kan verderf (Titus 3:3). Om jouself te masturbeer, is egter nie ’n vorm van growwe geslagsonsedelikheid soos hoerery nie (Efesiërs 4:19). As jy dus ’n probleem met masturbasie het, hoef jy nie tot die gevolgtrekking te kom dat jy die onvergeeflike sonde gepleeg het nie. Die sleutel is om die drang te weerstaan en nooit die stryd gewonne te gee nie!

Dit is soms maklik om mismoedig te raak nadat jy teruggeval het. Wanneer dit gebeur, moet jy die woorde van Spreuke 24:16 ter harte neem: “Die regverdige kan selfs sewe keer val, en hy sal beslis opstaan; maar die goddeloses sal weens rampspoed struikel.” ’n Tydelike terugslag maak nie van jou ’n slegte mens nie. Moet dus nie tou opgooi nie. Ontleed eerder wat tot die terugval gelei het, en probeer om nie weer dieselfde patroon te herhaal nie.

Maak tyd om oor God se liefde en barmhartigheid te peins eerder as om jou gedurig oor jou probleem te verwyt. Die psalmis Dawid, wat alte bewus was van sy eie swakhede, het gesê: “Soos ’n vader barmhartigheid aan sy kinders bewys, het Jehovah barmhartigheid bewys aan dié wat hom vrees. Want hy weet goed hoe ons gevorm is, gedagtig dat ons stof is” (Psalm 103:13, 14). Ja, Jehovah neem ons onvolmaaktheid in ag en is “vergewensgesind” wanneer ons sondig (Psalm 86:5). Maar hy wil hê dat ons ons moet inspan om te verbeter.

Watter praktiese stappe kan jy doen om jou gewoonte te oorwin en te keer dat jy terugval?

Neem iemand in jou vertroue

Ondanks die publisiteit wat in ’n aantal lande aan seks gegee word, vind baie mense dit nog steeds moeilik om op ’n ernstige, waardige manier oor seks te praat. In jou geval kan verleentheid dit moeilik maak om die onderwerp te noem, selfs aan iemand wat jy vertrou. Een Christen wat jare lank met masturbasie geworstel het, het gesê: “Hoe wens ek tog dat ek as ’n jongmens die moed kon bymekaargeskraap het om met iemand daaroor te praat! Skuldgevoelens het my jare lank geteister en het ’n skadelike uitwerking gehad op my verhouding met ander, maar veral met Jehovah.”

Met wie moet jy praat? Die beste persoon sal iemand wees wat geestelik volwasse is, verkieslik ’n ouer. Jy kan begin deur te sê: “Kan ek met jou praat oor ’n probleem wat my baie pla?”

Mário het besluit om met sy pa te praat, wat baie simpatie en begrip getoon het. Hy het selfs aan Mário erken dat hy ook met die gewoonte geworstel het toe hy jonger was. “My pa se eerlikheid en opregtheid het my baie aangemoedig”, sê Mário. “Ek het geredeneer dat as hy dit kon oorwin, ek dit ook kan doen. My pa se gesindheid het my so diep getref dat ek begin huil het.”

André het die moed bymekaargeskraap om met ’n Christen- ouer man te praat, en hy is bly dat hy dit gedoen het.c “Terwyl die ouer man na my geluister het, het sy oë vol trane geword”, sê André. “Toe ek klaar gepraat het, het hy my verseker dat Jehovah vir my lief is. Hy het vir my gesê dat my probleem algemeen is. Hy het belowe om my vordering te monitor en om vir my meer inligting uit Bybelstudiehulpe te bring. Nadat ek met hom gepraat het, het ek my voorgeneem om aan te hou veg—selfs al val ek weer terug.”

Soos Mário en André, kan jy hulp kry in jou pogings om die masturbasiegewoonte te oorwin. Volg die raad in die bygaande venster, “Gaan tot die aanval oor!” Ja, wees verseker dat jy die stryd kan wen!

[Lokteks op bladsy 20]

Vrae wat Jongmense vra Antwoorde wat werk www.watchtower.org/ypa

[Voetnote]

IETS OM OOR TE DINK

◼ Waarom is dit belangrik om in gedagte te hou dat Jehovah “vergewensgesind” is?—Psalm 86:5.

◼ Watter stappe gaan jy doen om die masturbasiegewoonte te oorwin?

◼ Waarom moet jy nie skaam wees om hulp te vra nie?

◼ Wat is die beste manier om jou gedagtes op kuis dinge te hou?

[Venster/Prent op bladsy 19]

As jy terugval, beteken dit nie dat jy misluk het nie!

Hoe maklik is dit tog om te dink: ‘Ek het gefaal, ek kan dus maar net sowel tou opgooi.’ Stry teen daardie gesindheid. Moenie toelaat dat ’n tydelike terugslag, of selfs etlike terugslae, ’n neerlaag vir jou beteken nie.

Dink aan ’n illustrasie: Sê nou jy klim trappe en jy struikel en gly een of twee trappies agteruit. Sal jy redeneer: ‘Ek sal maar moet terugloop na die onderent van die trap en weer van voor af begin’? Natuurlik nie! Waarom sou jy dan hierdie valse redenasie op die stryd teen slegte gewoontes toepas?

Skuldgevoelens volg dikwels op ’n terugslag. Jy voer hierdie gevoelens dalk tot ’n uiterste deur te dink dat jy niks werd is nie, dat jy ’n swak karakter het en niks goeds verdien nie. Moenie jouself toelaat om voor sulke oordrewe skuldgevoelens te swig nie. Dit beroof jou van die krag wat jy nodig het om die stryd voort te sit. En onthou dit: Die grootste mens wat nog ooit op hierdie aarde geleef het, Jesus Christus, het gekom om sondaars te bevry, nie volmaakte mense nie. Daarom sal nie een van ons dinge op hierdie tydstip volmaak doen nie.—Uit die Ontwaak! van 8 April 1991, bladsy 15.

[Venster/Prent op bladsy 20]

Gaan tot die aanval oor!

◼ Dwing jouself om aan ander dinge te dink.—Filippense 4:8.

◼ Moenie na dinge kyk wat verkeerde begeertes sal prikkel nie.—Psalm 119:37.

◼ Bid vir “krag wat bo die normale is”.—2 Korintiërs 4:7.

◼ Bly besig met Christelike bedrywighede.—1 Korintiërs 15:58.

[Venster/Prent op bladsy 20]

Verdere hulp

Vir meer inligting oor hoe om die masturbasiegewoonte te oorwin, sien hoofstukke 25 en 26 van die boek Vrae wat jongmense vra . . . Antwoorde wat werk, uitgegee deur Jehovah se Getuies.