Liewe medeverkondigers van die goeie nuus

Liewe medeverkondigers van die goeie nuus

Dit is ’n wonderlike voorreg om verenig te wees in die aanbidding van die enigste ware God, Jehovah! Ons is sy “medewerkers”, toevertrou met die heilige en lewensreddende werk om die goeie nuus van sy opgerigte Koninkryk te verkondig en mense daarvan te leer (1 Kor. 3:9; Matt. 28:19, 20). Om hierdie wêreldwye werk in vrede en eenheid uit te voer, moet ons goed georganiseer wees. – 1 Kor. 14:40.

Hierdie boek sal jou help om te verstaan hoe die Christengemeente vandag funksioneer. Dit bespreek jou voorregte en verantwoordelikhede wat jy as een van Jehovah se Getuies het. As jou voorregte kosbaar vir jou is en jy jou verantwoordelikhede nakom, sal jy ‘sterker in die geloof’ word. – Hand. 16:4, 5; Gal. 6:5.

Ons spoor jou dus aan om hierdie boek goed te studeer. Soek na maniere hoe jy die inligting in jou eie lewe kan toepas. Byvoorbeeld, as jy onlangs ’n ongedoopte verkondiger geword het, watter stappe moet jy neem om as een van Jehovah se Getuies gedoop te word? As jy reeds gedoop is, wat kan jy doen om geestelik te groei en meer te doen in jou diens aan Jehovah? (1 Tim. 4:15). Hoe kan jy tot die vrede van die gemeente bydra? (2 Kor. 13:11). Jy sal die antwoorde in hierdie boek kry.

As jy ’n gedoopte broer is, wat kan jy doen om te kwalifiseer om as ’n bedieningskneg en later as ’n ouerman te dien? Aangesien duisende nuwes na God se organisasie stroom, is daar ’n dringende behoefte aan bekwame broers om die leiding te neem. Hierdie boek sal jou help om te sien wat dit behels om hierdie geestelike doelwitte te bereik. – 1 Tim. 3:1.

Ons hoop regtig dat hierdie boek jou sal help om te sien waar jy in Jehovah se reëling inpas en jou plek daarin te waardeer. Ons het julle almal baie lief, en ons bid voortdurend dat julle onder dié sal wees wat vir ewig vreugde sal vind om ons hemelse Vader, Jehovah, te aanbid. – Ps. 37:10, 11; Jes. 65:21-25.