Jong broers, streef julle na diensvoorregte?
1. Wanneer moet ’n jong broer die raad in 1 Timoteus 3:1 begin toepas?
1 “As ’n man na ’n opsienersamp streef, begeer hy ’n voortreflike werk” (1 Tim. 3:1). Hierdie geïnspireerde woorde spoor broers aan om daarna te streef om vir diensvoorregte in die gemeente te kwalifiseer. Moet jy ’n volwassene wees om dit te doen? Eintlik is dit die beste om na diensvoorregte te streef terwyl jy nog jonk is. Sodoende kan jy opleiding ontvang en toon dat jy geskik is om as ’n bedieningskneg aangestel te word wanneer jy ouer is (1 Tim. 3:10). Hoe kan jy na diensvoorregte streef as jy ’n jong gedoopte broer is?
2. Hoe kan jy ’n selfopofferende gees aankweek en aan die dag lê?
2 Selfopoffering: Hou in gedagte dat jy streef na ’n voortreflike werk, nie ’n titel nie. Kweek dus ’n begeerte aan om jou broers en susters te help. Een manier waarop jy dit kan doen, is deur te peins oor Jesus se voortreflike voorbeeld (Matt. 20:28; Joh. 4:6, 7; 13:4, 5). Vra Jehovah om jou te help om in ander belang te stel (1 Kor. 10:24). Kan jy praktiese hulp verleen aan diegene in die gemeente wat bejaard of verswak is? Stel jy jou beskikbaar om die gras te sny, die Koninkryksaal skoon te maak of na ander aspekte van die Koninkryksaal se instandhouding om te sien? Kan jy aanbied om vir iemand in te staan en ’n toespraak op die Teokratiese Bedieningskool te hou? Dit sal jou beslis vreugde verskaf om van jouself te gee ten behoewe van ander.—Hand. 20:35.
3. Hoe belangrik is geestelikheid, en hoe kan dit aangekweek word?
3 Geestelikheid: Geestelikheid is vir ’n kneg in die gemeente baie belangriker as spesiale talente of natuurlike vermoëns. ’n Geestelike mens probeer sake beskou soos Jehovah en Jesus dit beskou (1 Kor. 2:15, 16). Hy openbaar “die vrugte van die gees” (Gal. 5:22, 23). Hy is ’n ywerige evangeliedienaar wat Koninkryksbelange eerste stel (Matt. 6:33). Jy kan geestelike eienskappe aankweek as jy ’n goeie roetine van persoonlike studie volg. Dit sal insluit dat jy elke dag die Bybel lees, elke nommer van Die Wagtoring en Ontwaak! lees en vir gemeentelike vergaderinge voorberei en dit bywoon (Ps. 1:1, 2; Heb. 10:24, 25). Paulus het die jong Timoteus aangespoor om geestelike vooruitgang te maak en het geskryf: “Let voortdurend op . . . jou onderrigting” (1 Tim. 4:15, 16). Span jou dus in wanneer jy die toewysing het om ’n toespraak op die Teokratiese Bedieningskool te hou. Berei voor vir die bediening, en neem gereeld daaraan deel. Stel geestelike doelwitte, soos pionierdiens, Betheldiens of om die Bybelskool vir Ongetroude Broers by te woon, en probeer hierdie doelwitte bereik. Geestelikheid sal jou help om te “vlug . . . vir die begeertes wat eie is aan die jeug”.—2 Tim. 2:22.
4. Hoe belangrik is betroubaarheid en getrouheid?
4 Betroubaarheid en getrouheid: Omdat die broers wat in die eerste eeu die toewysing gehad het om voedsel aan behoeftige Christene uit te deel, “manne van goeie getuienis” was, wat blykbaar bekend was vir hulle betroubaarheid en getrouheid, kon die apostels vertroue hê dat die werk gedoen sou word. Hulle kon hulle dus op ander belangrike sake toespits (Hand. 6:1-4). As jy ’n toewysing in die gemeente ontvang, moet jy dit dus na die beste van jou vermoë uitvoer. Volg die voorbeeld van Noag, wat die instruksies wat hy ontvang het om die ark te bou, nougeset gevolg het (Gen. 6:22). Getrouheid is vir Jehovah baie belangrik en is ’n teken van geestelike volwassenheid.—1 Kor. 4:2; sien die venster “Die voordele van opleiding”.
5. Waarom moet jong broers na diensvoorregte streef?
5 Soos voorspel is, bespoedig Jehovah die insamelingswerk (Jes. 60:22). Ongeveer ’n kwartmiljoen mense word elke jaar gedoop. Aangesien soveel nuwes in die waarheid kom, is bekwame geestelike manne nodig om na gemeentelike verantwoordelikhede om te sien. Daar is nou, meer as ooit tevore, baie om in Jehovah se diens te doen (1 Kor. 15:58). Jong broers, streef julle na diensvoorregte? Indien wel, begeer julle beslis ’n voortreflike werk!
[Lokteks op bladsy 2]
Aangesien soveel nuwes in die waarheid kom, is bekwame geestelike manne nodig om na gemeentelike verantwoordelikhede om te sien
[Venster op bladsy 3]
Die voordele van opleiding
Bekwame jong broers vind daarby baat as ouer manne hulle toewysings en opleiding gee. ’n Kringopsiener het ná die vergadering op die verhoog gesit en ’n verkondiger aangemoedig. Hy het gesien dat ’n jong seun daar naby staan, en daarom het hy hom gevra of hy wag om met hom te praat. Die jong broer het geantwoord dat dit sy toewysing is om ná elke vergadering die verhoog te stofsuig. Sy ouers was reg om huis toe te gaan, maar hy wou nie gaan voordat hy sy toewysing uitgevoer het nie. Die kringopsiener het met graagte op ’n ander plek gaan sit. Hy het gesê: “Die ouer manne in daardie gemeente was daarop ingestel om bekwame jong broers op te lei deur hulle gemeentelike toewysings te gee. Gevolglik was dit vir hulle niks ongewoons om ’n jong broer as ’n bedieningskneg aan te beveel wanneer ek die gemeente besoek nie.”