Die wonderwerk by die Rooisee

Toe Farao hoor dat die Israeliete Egipte verlaat het, het hy van plan verander en wou hy hulle nie meer laat gaan nie. Hy het sy soldate beveel: ‘Kry al my strydwaens gereed en laat ons jaag om by hulle uit te kom! Ons moes hulle nooit laat gaan het nie.’ Hy en sy manne het die Israeliete toe agternagesit.

Jehovah het sy volk gelei; in die dag het Hy ’n wolk gebruik en in die nag het Hy vuur gebruik. Hy het hulle na die Rooisee toe gelei en gesê dat hulle daar moes kamp opslaan.

Toe sien die Israeliete dat Farao en sy leërmag aangejaag kom. Hulle was vasgekeer tussen die see en die Egiptiese leërmag. Hulle het vir Moses gesê: ‘Ons gaan sterf! Jy moes ons in Egipte gelos het.’ Maar Moses het gesê: ‘Moenie bang wees nie. Wag en kyk hoe Jehovah ons sal red.’ Moses het regtig op Jehovah vertrou, nè?

Jehovah het vir die Israeliete gesê om kamp op te breek. Daardie nag het Jehovah die wolk geskuif sodat dit tussen die Egiptenare en die Israeliete was. Aan die Egiptenare se kant was dit pikdonker. Maar aan die Israeliete se kant was daar lig.

Jehovah het vir Moses gesê om sy hand oor die see uit te steek. Toe het Jehovah die hele nag lank ’n sterk wind laat waai. Die see is in twee verdeel, en daar was ’n pad in die middel. Miljoene Israeliete het op droë grond, tussen die mure van water, deurgetrek na die anderkant toe.

Farao se leërmag het die Israeliete op die droë seebodem gevolg. Jehovah het die leërmag toe in verwarring gebring. Die wiele van hulle strydwaens het begin af val. Die soldate het geskree: ‘Laat ons hier wegkom! Jehovah veg vir hulle.’

Jehovah het vir Moses gesê: ‘Steek jou hand uit oor die see.’ Onmiddellik het die mure van water bo-op die Egiptiese leërmag geval. Farao en al sy manne het gesterf. Nie een van hulle het oorleef nie.

Aan die anderkant van die see, het die groot groep Israeliete Jehovah geloof met ’n lied: “Ek wil vir Jehovah sing, want hy is hoog en verhewe. Die perd en sy ruiter het hy in die see gegooi.” Terwyl die mense gesing het, het die vrouens gedans en op tamboeryne gespeel. Almal was baie bly dat hulle uiteindelik regtig vry was.