Vrae van lesers
◆ Het die Farao van die Exodus gesterf toe die Egiptiese leër in die Rooi See vernietig is?
Ja, hy het, hoewel die boek Exodus dit nie spesifiek meld nie. Dit sê:
“Toe het die Egiptenaars hulle [die Israeliete] gejaag en agter hulle aan getrek—al Farao se perde, sy stryd waens en sy ruiters—die see in. . . . Daarop sê die HERE vir Moses: Steek jou hand uit oor die see, dat die waters kan terugvloei oor die Egiptenaars, oor hulle strydwaens en oor hulle ruiters. En Moses het sy hand oor die see uitgesteek . . . En toe die waters terugvloei, het hulle die strydwaens en die ruiters van Farao se hele leërmag wat agter hulle die see ingetrek het, oordek. Geeneen van hulle het oorgebly nie.”—Exodus 14:23-28.
Hierdie verslag meld die ruiters en leërmag, maar sê nie spesifiek dat Farao gesterf het nie. Dit word ook nie gemeld in die Israeliete se oorwinningslied waarin hulle gesê het nie: “Hy het Farao se strydwaens en sy leërmag in die see gewerp. En sy beste vegsmanne het in die Skelfsee gesink.”—Exodus 15:4.
Maar Psalm 136:1-15 toon dat Farao wel omgekom het. Daar lees ons dat die volk dank bring aan Hom ‘wat die Egiptenaars getref het in hulle eersgeborenes, en Israel onder hulle uitgelei het met ’n sterk hand en met ’n uitgestrekte arm. Wat die Skelfsee in stukke gesny het en Israel daar dwarsdeur laat gaan het, en Farao saam met sy leër in die Skelfsee gestort het.’
Die boek Psalms vul dus Exodus aan en toon dat die hoogmoedige Farao, wat die Israeliete verdruk het, in die Rooi See gesterf het.
◆ Openbaring 20:5 sê: “Die ander dode het nie herlewe totdat die duisend jaar voleindig was nie.” Sal dit voor of na die finale toets wees?
Hierdie uitdrukking is klaarblyklik van toepassing op die tyd wanneer mense volmaaktheid bereik aan die einde van die Millennium, maar voordat Satan uit die afgrond vrygelaat word en die mensdom aan die beslissende toets onderwerp.
Die verband van Openbaring 20:5 handel oor gesalfde Christene wat God opwek om medeerfgename van Christus te wees (Romeine 8:17). Hulle sal ‘herleef en duisend jaar lank as konings saam met Christus regeer’ (Openbaring 20:4). Nadat daardie punt gestel is, maar voor daar verder van hierdie heersers gepraat word, voeg Openbaring 20:5 die volgende kommentaar in oor diegene wat op aarde sal lewe: “Die ander dode het nie herlewe totdat die duisend jaar voleindig was nie.”
Diegene wat fisies gesterf het en gedurende die Millennium op aarde opgewek word, sal steeds onvolmaakte mense wees. En diegene wat die oorlog van God oorleef, sal nie dadelik volmaak en sondeloos wees nie. Terwyl hulle gedurende die Millennium aan God getrou bly, sal diegene wat op aarde behoue gebly het klaarblyklik geleidelik volmaak word. Solank persone in albei kategorieë nie vry van oorgeërfde sonde is nie, sal hulle in ’n sekere sin in God se oë “dood” wees (en dus nog nie ten volle lewend nie).—Lukas 9:60; Efesiërs 2: 1.
Hetsy persone opgewek is, die “groot verdrukking” oorlewe het of gedurende die Millennium gebore is, hulle kan ’n rooskleurige toekoms hê (Openbaring 7:14). As hulle aan God getrou is en die voordele van Christus se losprysoffer aanneem, sal hulle teen die einde van die duisend jaar nie langer weens sonde en onvolmaaktheid ly nie; oorgeërfde ‘dood sal nie langer oor hulle heers nie’ (Romeine 5:14). Inteendeel, hulle sal dan menslike volmaaktheid bereik het, daar hulle in die toestand sal wees wat Adam en Eva geniet het voordat hulle gesondig het.
Persone wat God op aarde dien, “die ander dode”, sal dus teen die einde van die Millennium “herlewe” Jesus sal dan ’n volmaakte menseras aan sy Vader kan gee (1 Korinthiërs 15:28; Openbaring 20:14). Soos Openbaring 20:7-10 voorts toon, sal Satan dan vrygelaat word om die mensdom aan ’n beslissende toets te onderwerp. Diegene wat tydens daardie toets aan Jehovah lojaal bly, sal vir ewige menselewe in die Paradys kwalifiseer.