Van tweedrag tot vrede in die gesin

MANUEL, sy vrou en hulle jong seun en dogter woon in Spanje. Hulle is vandag ’n gelukkige gesin. Maar dit was nie altyd die geval nie.

Toe hulle getrou het, het Manuel en sy bruid mekaar nie goed geken nie. Eerlank het hulle begin stry en baklei. Manuel was jaloers en ’n strawwe drinker. Hy het dikwels dronk en in ’n strydlustige bui tuis gekom. Mettertyd het dinge so versleg dat hulle elke drie of vier dae handgemeen geraak het! Na ’n paar jaar het Manuel ’n verhouding met ’n ander vrou aangeknoop. Sy vrou was so wanhopig dat sy daaraan gedink het om selfmoord te pleeg of hom te vergiftig.

Toe het ’n nuwe invloed hulle huis binnegekom. Manuel se vrou het begin om die Bybel saam met Jehovah se Getuies te bestudeer, maar hy wou niks daarmee te doen hê nie. ’n Paar maande later was hy egter in ’n nabygeleë vertrek terwyl die studie met sy vrou gehou is, en het hy hierdie woorde gehoor: “Hy wat getrou is in die minste, is ook in die grote getrou; en hy wat onregverdig is in die minste, is ook in die grote onregverdig” (Luk. 16:10). Dit het hom getref. Hy het kos by sy werk gesteel, want sy kerk het hom laat verstaan dat die armes by die rykes kon steel. Eerlank het hy ook die Bybel bestudeer.

In drie maande het Manuel opgehou om straf te drink en te rook en het hy sy onsedelike verhouding beëindig. Toe het die gewone gesinsgevegte ook opgehou. Hy is veral getref deur die Bybel se raad dat ’n man ‘sy vrou soos sy eie liggaam moet liefhê’ (Ef. 5:25, 28). Geleidelik het Manuel ’n baie beter eggenoot geword.

Hierdie verandering van tweedrag na vrede en geluk in die gesin was so groot dat dit ook Manuel se vader beïnvloed het. Hy is ook beweeg om die Bybel te bestudeer en dit in sy lewe toe te pas. Manuel, sy vrou en sy vader is vandag toegewyde getuies van Jehovah God.