Vind baat by die beste opvoeding wat daar is!

DIE Bybel identifiseer Jehovah God as die Skepper van alles, ook die mens (Genesis 1:27; Openbaring 4:11). As die Grootse Onderrigter het hy aan die eerste mensepaar, Adam en Eva, opvoeding voorsien en hulle vir die lewe in die pragtige tuin in Eden voorberei. Dit was sy voorneme om vir ewig voort te gaan om hulle op te voed en vir hulle te sorg (Genesis 1:28, 29; 2:15-17; Jesaja 30:20, 21). Dink net aan daardie vooruitsig!

Maar ongelukkig het die eerste paar alles weggegooi. Hulle ongehoorsame weg het die deur oopgemaak vir die sedelike en fisiese agteruitgang van die mensdom (Genesis 3:17-19; Romeine 5:12). Met verwysing na diegene wat net ’n paar geslagte ná die skepping van die mens gelewe het, sê die Bybel: “Jehovah [het] gesien dat die slegtheid van die mens oorvloedig op die aarde was en dat elke neiging van die gedagtes van sy hart die hele tyd net sleg was.”—Genesis 6:5.

Amper 4 500 jaar het verloop sedert Jehovah tot die slotsom gekom het dat die mens altyd tot slegtheid geneig is, en die mensdom se situasie is nou erger as ooit tevore. Baie lieg skaamteloos, steel en rand ander aan. Probleme neem elke dag toe, terwyl mense se besorgdheid oor hulle naaste afneem. Is die meeste persoonlike verhoudings, insluitende dié tussen gesinslede, nie onder groot druk nie? Maar God is nie verantwoordelik vir die huidige toestande nie, en ook het hy nie opgehou om besorg te wees oor vandag se probleme nie. Jehovah het nog altyd in die mens se welsyn belanggestel, en hy is bereid om diegene op te voed wat op hom staatmaak vir leiding om ’n gelukkige lewe te hê. Ongeveer 2 000 jaar gelede het hy sy Seun, Jesus Christus, aarde toe gestuur en getoon dat Hy daarin belangstel om mense op te voed wat ’n sukses van hulle lewe wil maak. Jesus het ’n voorbeeld nagelaat van volmaakte opvoeding, aangesien hy ontelbare eeue lank deur die Grootse Onderrigter geleer is.

Opvoeding wat die ware Christelike godsdiens voorsien

Jesus Christus het die ware Christelike godsdiens, ’n lewenswyse wat op liefde gegrond is, tot stand gebring. Daarvolgens moet alle gedagtes en dade met God se wil strook, met die doel om sy naam te eer en te verheerlik (Matteus 22:37-39; Hebreërs 10:7). Al Jesus se leringe oor hierdie lewenswyse is deur sy Vader, Jehovah, gerig. Ons lees in Johannes 8:29 oor die ondersteuning wat Jesus van God ontvang het: “Hy wat my gestuur het, is met my; hy het my nie aan myself oorgelaat nie, omdat ek altyd die dinge doen wat hom behaag.” Ja, Jesus het gedurende sy hele bediening sy Vader se ondersteuning en leiding gehad. Dit was nie vir Jesus se vroeë volgelinge nodig om sonder leiding die uitdagings van die lewe die hoof te bied nie. Jehovah het deur middel van sy Seun opvoeding aan hulle voorsien. Deur Jesus se leringe en voorbeeld te volg, het hulle beter mense geword. Dit is ook die geval met sy hedendaagse dissipels.—Sien die venster “Die invloed van Jesus en sy leringe”, op bladsy 6.

’n Kenmerk van die ware Christelike godsdiens is dat dit opvoeding insluit wat verstande en harte raak sodat dit mense innerlik verander (Efesiërs 4:23, 24). Om maar net een voorbeeld te noem: Dink aan wat Jesus oor getrouheid aan ’n huweliksmaat geleer het: “Julle het gehoor dat daar gesê is: ‘Jy mag nie egbreuk pleeg nie.’ Maar ek sê vir julle dat elkeen wat aanhou om na ’n vrou te kyk om hartstog vir haar te hê, reeds in sy hart met haar egbreuk gepleeg het” (Matteus 5:27, 28). Met hierdie woorde het Jesus sy dissipels geleer dat die hart rein gehou moet word en dat verkeerde gedagtes en begeertes, hoewel dit nog nie in dade omgesit is nie, ernstige gevolge kan hê. Is dit nie waar dat slegte gedagtes kan lei tot dade wat God aanstoot gee en ander seermaak nie?

Daarom gee die Bybel hierdie raad: “Moenie langer na hierdie stelsel van dinge gevorm word nie, maar word verander deur julle verstand te hervorm, dat julle kan seker maak wat die goeie en aanneemlike en volmaakte wil van God is” (Romeine 12:2). ‘Is dit werklik moontlik om die verstand deur opvoeding te hervorm?’ vra jy dalk. Om die verstand te hervorm, beteken dat dit in ’n ander rigting gestuur word deur dit met die beginsels en onderrigting in God se Woord te vul. Dit kan gedoen word deur opvoeding te aanvaar wat God deur sy Woord voorsien.

Beweeg om te verander

“Die woord van God is lewend en oefen krag uit” (Hebreërs 4:12). Dit oefen nog steeds ’n kragtige invloed op mense uit, wat bewys dat dit nie verouderd raak nie. Dit kan ’n persoon beweeg om sy weg te verander, die ware Christelike godsdiens aan te neem en ’n beter mens te word. Die volgende voorbeelde lig die waarde van Bybelopvoeding toe.

Emilia, wat in die vorige artikel genoem is, sê: “Mý pogings was nie genoeg om die situasie in my huis te verbeter nie. Toe ek die Bybel saam met Jehovah se Getuies begin studeer het, het ek besef dat daar hoop is en het ek my gesindheid begin verander. Ek het geleer om geduldiger te wees en nie aan woedeuitbarstings toe te gee nie. Met verloop van tyd het my man saam met my begin studeer. Dit was nie vir hom maklik om op te hou drink nie, maar hy het dit reggekry. Dit het ons huwelik ’n nuwe begin gegee. Nou is ons gelukkige Christene en skerp ons die goeie beginsels van die Bybel by ons kinders in.”—Deuteronomium 6:7.

Die opvoeding wat die ware Christelike godsdiens voorsien, kan ’n mens van slegte gebruike en ’n onsedelike lewenswyse bevry. Manuela het gevind dat dit die geval is. Op die ouderdom van 13 het hy van die huis af weggeloop en dagga begin gebruik. Later het hy oorgeslaan na heroïen. Hy het geslagsomgang met mans en vroue gehad in ruil vir verblyf en geld. Manuel het hom soms ook onderhou deur mense op straat te beroof. Hy was feitlik altyd onder die invloed van dwelms. Sy gewelddadige gedrag het hom dikwels in die tronk laat beland. Hy het eenkeer vier jaar agter tralies gesit, en terwyl hy daar was, het hy met wapens begin smokkel. Nadat hy getrou het, het Manuel se lewenswyse hom nog steeds duur te staan gekom. Hy sê: “Ons het uiteindelik in ’n ou hoenderhok gebly. Ek onthou nog hoe my vrou op ’n paar bakstene gekook het. Ons omstandighede was so haglik dat my eie familie my vrou aangespoor het om my te verlaat.”

Wat het sy lewe verander? Manuel antwoord: “’n Kennis het na ons huis gekom en oor die Bybel gepraat. Ek het sy besoeke geduld net sodat ek vir hom kon wys dat daar nie ’n God bestaan wat in mense belangstel nie. Ek het myself as ’n lewende bewys hiervan beskou. Ek was verbaas dat die Getuie so geduldig en beleef was, en daarom het ek ingestem om die vergaderinge by die Koninkryksaal by te woon. Hoewel party daar my agtergrond geken het, het hulle my vriendelik gegroet. Hulle het my soos een van hulle laat voel. Dit het my baie aangemoedig. Ek is beweeg om die dwelmwêreld te verlaat om ’n eerlike werk te kry. Vier maande nadat ek my Bybelstudie begin het, het ek aan die vereistes voldoen om ook die predikingswerk te doen, en vier maande daarna is ek as een van Jehovah se Getuies gedoop.”

Wat het die ware Christelike godsdiens vir Manuel en sy gesin beteken? “Sonder Bybelse opvoeding sou ek beslis al jare gelede dood gewees het. Die lewenswyse wat Jesus aan ander geleer het, het my gesin aan my terugbesorg. My twee kinders hoef nie deur te maak wat ek as ’n jongmens deurgemaak het nie. Ek is trots op die goeie verhouding wat ek nou met my vrou het en is baie dankbaar teenoor Jehovah daarvoor. Party van my voormalige kennisse het my gelukgewens en vir my gesê dat die weg wat ek nou volg, na hulle mening die beste weg is.”

In die Christelike lewenswyse gaan sedelike reinheid gepaard met fisiese reinheid. John, wat in ’n armoedige gebied in Suid-Afrika woon, het tot hierdie besef gekom. Hy verduidelik: “Ons dogter het soms ’n week lank nie gewas nie, en nie een van ons het blykbaar omgegee nie.” Sy vrou erken dat hulle huis verskriklik gelyk het. Maar met Christelike opvoeding het dinge verander. John het sy bande met ’n bende motordiewe verbreek en het meer aandag aan sy gesin begin gee. “Ons het geleer dat ons as Christene ons liggaam en klere skoon moet hou. Ek hou van die woorde in 1 Petrus 1:16, wat ons aanspoor om heilig te wees omdat Jehovah God heilig is. Nou probeer ons ook om ons eenvoudige huisie goed te laat lyk.”

Jy kan die beste opvoeding vind

Die ondervindinge hierbo is nie alleenstaande gevalle nie. Duisende mense het geleer om ’n beter lewe te lei danksy Bybelse opvoeding. Omdat hulle eerlik en vlytig is, waardeer hulle werkgewers hulle. Hulle het goeie bure en vriende geword, wat belangstelling toon in die welsyn van hulle naaste. Hulle is vasbeslote om slegte gebruike en vleeslike neigings te vermy, en daarom sien hulle beter om na hulle eie fisiese, geestes- en emosionele gesondheid. In plaas van hulle middele op slegte gebruike te verkwis, gebruik hulle dit tot voordeel van hulleself en van hulle gesin (1 Korintiërs 6:9-11; Kolossense 3:18-23). Die resultate wat dit oplewer wanneer ’n mens die voorskrifte volg wat Jehovah in die Bybel uiteensit, toon sonder twyfel dat ’n lewenswyse in ooreenstemming met die ware Christelike godsdiens die beste lewensweg is en dat dit die beste opvoeding voorsien wat daar is. Die Bybel sê aangaande iemand wat in ooreenstemming met God se wette lewe: “Alles wat hy doen, sal suksesvol wees.”—Psalm 1:3.

Dit is aanmoedigend om te weet dat God die Almagtige, Jehovah, bereid is om ons op te voed. Hy sê van homself: “Ek, Jehovah, is jou God, die Een wat jou leer om jouself te bevoordeel, die Een wat jou laat loop op die weg wat jy moet bewandel” (Jesaja 48:17). Ja, Jehovah het deur die voorbeeld en leringe van sy Seun, Jesus Christus, gewys watter weg ons moet bewandel. Jesus se leringe het ’n verskil gemaak in die lewe van baie mense wat hom geken het toe hy op die aarde was, en dieselfde is waar van baie ander wat vandag volgens sy leringe lewe. Neem gerus die tyd om beter vertroud te raak met hierdie leringe. Jehovah se Getuies in jou omgewing sal jou met graagte help om hierdie waardevolle opvoeding te ontvang.

[Voetnoot]

[Venster/Prent op bladsy 6]

Die invloed van Jesus en sy leringe

Saggeus het sy posisie as hoofbelastinggaarder gebruik om ryk te word deur geld af te pers en die gewone mense te beroof. Maar hy het sy lewenswyse verander deur Jesus se leringe toe te pas.—Lukas 19:1-10.

Saulus van Tarsus het opgehou om Christene te vervolg en het hom tot die Christelike godsdiens bekeer, en hy het die apostel Paulus geword.—Handelinge 22:6-21; Filippense 3:4-9.

Party van die Christene in Korinte was voorheen ‘hoereerders, afgodedienaars, egbrekers, homoseksuele, diewe, gierigaards, dronkaards, kwaadsprekers en afpersers’. Maar toe hulle die ware Christelike godsdiens leer ken het, is hulle ‘skoon gewas, geheilig en regverdig verklaar in die naam van hulle Here Jesus Christus’.—1 Korintiërs 6:9-11.

[Prent op bladsy 7]

Die Bybel kan jou wys hoe om suksesvol te wees