Vrae van lesers

■ Waarom sê Jehovah se Getuies dat daar ’n toekomstige paradys op aarde gaan wees, terwyl 2 Korinthiërs 12:1-4 “die Paradys” met “die derde hemel” verbind?

Die verband toon dat die “Paradys” van 2 Korinthiërs 12:1-4 nie ’n letterlike paradys op aarde is nie. Baie gedeeltes in die Bybel bewys egter dat God weer ’n letterlike paradys op ons aarde gaan skep.

Die feit is dat die eerste paradys wat mense geniet het letterlik was. Adam en Eva het in ’n lieflike park, of tuin, gewoon, wat die basiese betekenis is van die Hebreeuse, Griekse en Persiese woorde wat met paradys vertaal word. Hulle het die vooruitsig gehad om vir ewig in geluk en goeie gesondheid in daardie Paradys te lewe. Maar hulle het daardie aardse Paradys verbeur toe hulle verset gepleeg en gesondig het, waarná God hulle uit die tuin van Eden verdryf het.

Waar laat dit ons ten opsigte van die hede en die toekoms? Daar is beslis geen bewys dat ons planeet vandag in ’n paradys omgeskep word nie. Besoedeling en vernietiging is eerder aan die orde van die dag (Openbaring 11:18). Tog is dit ondenkbaar dat God se voorneme om van die hele aarde ’n paradys te maak, kan misluk; wat hy begin, voer hy end-uit deur. Met hierdie doel het hy sy Seun gestuur om ’n losprys te voorsien waardeur die grondslag gelê is vir die vergifnis van ons sondes en die verwydering van die onvolmaaktheid wat ons van Adam geërf het (1 Timotheüs 2:5, 6; Romeine 5:18). Wanneer dit volbring is, sal mense kan geniet wat aan Adam en Eva voorgehou is, naamlik eindelose lewe. Waar?

God se oorspronklike voorneme met mense was eindelose lewe in ’n paradys op aarde, en God se voorneme kan nie faal of verydel word nie (Jesaja 55:11). Kan ons dan nie uitsien na daardie eindelose lewe hier op hierdie planeet Aarde, met die aarde wat tot ’n paradys herstel sal wees nie? Daar is talryke bewyse in die Bybel dat dit die korrekte beskouing is, dat God se wil nog sal “geskied, soos in die hemel net so ook op die aarde” (Mattheüs 6:10; Openbaring 21:4, 5). Kyk die artikel “Beloof die Bybel ’n aardse paradys?” in Die Wagtoring van 1 Januarie 1984 vir ’n breedvoeriger bespreking van die Bybelse bewyse hiervoor.

Maar wat van die apostel PauIus se woorde in 2 Korinthiërs 12:1-4? Hy het uitdruklik gesê dat hy oor “gesigte en openbaringe van die Here” praat. En hy was klaarblyklik die een wat ’n spesiale gesig of ekstatiese insig ontvang het in iets wat in sy tyd nog toekomstig was. Hy sê dat hy “weggeruk is in die Paradys”. Maar aangesien hy ook ’n “derde hemei” meld, wil dit voorkom of hy van iets geesteliks gepraat het en nie van ’n letterlike tuinparadys nie. Daar was ’n presedent hiervoor.

Baie profesieë in die Hebreeuse Skrifte het voorspel dat die Jode wat in Babilon in gevangenskap was na hulle vaderland sou terugkeer. Benewens aanduidings dat die land en omgewingstoestande sou verbeter, het hierdie profesieë aangedui dat daar ’n verandering in die mense, die herstelde Jode, sou wees. Jesaja het byvoorbeeld geskryf dat Jehovah ‘hulle gebeente sterk sal maak en dat hulle sal word soos ’n tuin wat goed besproei is’. Hulle sou ook “genoem word groot bome van regverdigheid, die planting van Jehovah, sodat hy versier kan word”. (Jesaja 58:11; 61:3, NW; vergelyk Psalm 1:3.) Waar hy soortgelyke beeldspraak in verband met ’n vroeëre tydperk gebruik het, het Jesaja geskryf dat die Israeliete, wanneer hulle getrou was aan Jehovah, soos sy wingerd was; wanneer hulle ontrou was, was hulle wingerde wat wilde druiwe voortgebring het en wat bestem was om verbrand te word, sodat dorings en distels in hulle plek sou groei.—Jesaja 5:1-7.

Daar is dus ’n Bybelse rede om te sê dat Paulus se woorde in 2 Korinthiërs 12:4 op ’n toekomstige herstel van geestelike voorspoed onder God se aanbidders dui. Hy het self voorspel dat daar vóór die “teenwoordigheid” van die Here ’n afval van die ware Christelike godsdiens sou wees (Handelinge 20:29, 30; 2 Thessalonicense 2:1-8, NW). Maar dit sou nie die permanente toestand wees nie. Die ware Christengemeente, “die akker van God”, sou weer floreer en vrug dra (1 Korinthiërs 3:9). Ons verstaan dat dít die paradys is wat Paulus in sy gesig gesien het. Sy vermelding van so ’n geestelike paradys doen egter geensins afbreuk aan die talle Bybelbeloftes aangaande ’n naderende aardse paradys, ’n paradys wat ooreenkomstig God se oorspronklike voorneme met die aarde herstel sal word nie.