Koninkryksverkondigersverslag
Koninkrykseenheid duidelik
KONINKRYKSEENHEID was beslis duidelik by onlangse byeenkomste van Jehovah se Getuies in Nieu-Seeland en die Filippyne. ln Nieu-Seeland het 13 408 die “Koninkrykseenheid”-byeenkomste bygewoon en is 167 gedoop. Die drie byeenkomste in Nieu-Seeland was per telefoonkabel met die ses byeenkomste in Australië verbind. “Baie mense met familielede by die ander byeenkomste wat met mekaar verbind was, het gesê dat hulle in hulle verbeelding kon sien hoedat hulle familielede op dieselfde tyd na dieselfde toespraak luister, en dat dit hulle ’n wonderlike gevoel van eenheid gegee het”, het een verslag gesê. Een dowe suster wat byeenkomste al 30 jaar lank bywoon, het gesê dat dit ‘die eerste keer was dat sy by die program baat gevind het’, omdat hulle vir die eerste keer tolke gehad het wat in gebaretaal vir die dowes getolk het.
Omdat hulle besef dat dit nodig is om saam met ander te vergader, het 120 van Rarotonga, in die Cook-eilande, sowat 2 900 kilometer daarvandaan, die byeenkoms in Auckland bygewoon (Hebreërs 10:24, 25). Om geld vir hulle vliegtuigkaartjies te kry, het die susters rokke, gordyne, kussings, jasmyn- en skulphalssnoere gemaak en verkoop. Die broers het groente gekweek om te verkoop, vis gevang en oeswerk gedoen om geld te kry vir die reis. Gemeentes in Nieu-Seeland het gehoor van die behoefte van hulle broers in die Cook-eilande en genoeg geld bygedra om die tekort uit te wis sodat feitlik al die broers op die Cook-eilande die byeenkoms in Auckland kon bywoon. Dele van die program is om hulle onthalwe in die taal van Rarotonga aangebied. Die 17 sendelinge wat die drie byeenkomste in Nieu-Seeland bygewoon het, verbly hulle saam met al hierdie broers terwyl hulle Jehovah verenig as Koning dien.
Die 149 219 wat die 20 byeenkomste in die Filippyne bygewoon het, was ook bly om saam met hulle broers by die byeenkomste verenig te wees en om te sien dat 1 858 gedoop is. Baie het groot vasberadenheid getoon om die byeenkomste by te woon. Die wat in Davao del Sur woon, en ook party broers van die Manobo-stam, het byvoorbeeld 100 kilometer ver geloop om ’n bus te haal na die byeenkoms in General Santos City in Mindanao. ’n Ander groep het 200 kilometer ver oor die berge geloop, ’n reis wat drie dae geduur het. Toe het hulle ’n boot gehaal—’n reis wat nog ’n dag in beslag geneem het—om die byeenkoms te bereik. Hulle het almal saamgestem dat dit “dubbel en dwars die moeite werd was”.
Die bevelhebber van die Integrated National Police het na die byeenkoms in Tuguegarao, Cagayan, gekom en kommentaar gelewer oor die goeie organisasie van die byeenkoms. Hy het gesê: “Jehovah se Getuies het nie polisie by hulle byeenkomste nodig nie aangesien hulle samekomste altyd vreedsaam en ordelik geskied.” ’n Waarnemer by die Pangasinaanse byeenkoms in Binalonan het gesê: “As almal in die gemeenskap Jehovah se Getuies was, sou ons ons nie oor vrede en orde hoef te bekommer het nie . . . kinders het by hulle ouers gesit en luister . . . niemand het gerook nie. Wanneer ek dus lus gevoel het om te rook, het ek uitgegaan.”
Hierdie ondervindinge help ons om die eenheid en vreugde van hierdie Koninkryksverkondigers te besef. Dit sal beslis ’n wonderlike tyd wees wanneer alle mense Jehovah as Koning erken en hulle aan sy heerskappy onderwerp. Dan sal tweedrag tot die verlede behoort.
[Kaart/Prent op bladsy 7]
(Sien publikasie vir oorspronklike teksuitleg)
Nieu-Seeland
[Kaart]
Die Filippyne