Hoe sal die ewige lewe moontlik wees?
WAT is die oorsprong van die lewe? Ateïste voer aan dat dit ’n ongeluk was. ’n Wetenskaplike werk sê: “Lewende organismes het waarskynlik op ’n baie beskeie wyse in ’n wêreld vol lewelose klippe ontstaan toe sekere chemiese elemente bymekaargekom het om ingewikkelde molekules te vorm. Mettertyd het groepe van hulle die vermoë verkry om te eet en voort te bring.”
Klink dit vir jou oortuigend? Die woord “waarskynlik” toon dat dit ’n raaiskoot is. Alle lewende selle is geweldig ingewikkeld. As ons bespiegeling en selfs ingeligte raaiskote opsy skuif, moet ons die feit onder die oë sien dat ‘die vermoë om te eet en voort te bring’ nie sommer net gebeur nie. Wat ons oor die verbasende ingewikkeldheid van skepsele kan sien, bewys eerder dat ’n Meesterbrein bestaan—Een wat wonderwerke kan beplan en kan verrig wat ons nie kan nadoen of ten volle kan begryp nie. Talle wetenskaplikes is dit eens dat daar bewys is dat lewe slegs voortkom uit lewe wat reeds bestaan. Daar moet dus ’n oorspronklike Bron van lewe wees. Die Bybel sê: “Hoe kosbaar is u goedertierenheid, o God! . . . Want by U is die fontein van die lewe.”—Psalm 36:8, 10.
Hoewel die wetenskap nie die lewe in al sy vorme bevredigend kan verklaar nie, het dit tog gehelp om die verbasende ingewikkeldheid van God se handewerk te openbaar—die oënskynlik eindelose verskeidenheid insekte, diere en plante, die veelkleurige blomme en struike om die oog te bekoor, die tallose geure en smake om ons sinne te behaag, die uitgestrektheid en majesteit van die heelal, die bekoring van mikroörganismes—en so baie dinge wat nog ontdek en geniet moet word. Honderd jaar is skaars genoeg om al die bekoorlike en ontsagwekkende skeppings van die Almagtige te begin ken en waardeer.
Talle mense wat hierdie saak bestudeer het, het die gevolgtrekking gemaak: Al hierdie verskeidenheid en prag getuig sekerlik nie van ’n onpersoonlike, afgeleë krag nie, maar van ’n alwyse Skepper, ’n Groot deel van die lewe wat ons vandag op aarde sien, dui duidelik op ’n liefdevolle Vader of Lewegewer. Soveel dinge is klaarblyklik geskep om ons gelukkig te maak. Openbaring 15:3 sê: “Groot en wonderlik is u werke, Here God, Almagtige.” Die Bybel toon dat hoewel Jehovah God gevrees moet word wanneer ons opstandig of ongehoorsaam is, hy “die gelukkige God” is wat behae daarin skep om ander gelukkig te maak.—1 Timotheüs 1:11, NW; Handelinge 20:35.
God se oorspronklike voorneme met die mens
Die Bybel gee ’n eenvoudige maar bevredigende beskrywing van die mens se oorsprong. Die eerste hoofstuk daarvan verhaal die skepping van die aarde, dan van plante, seediere, gevleuelde skepsele en diere (Genesis 1:1-25). Dit is interessant dat die geologie en die fossielverslag dieselfde orde toon. Eindelik het God die mens “uit die stof [of elemente] van die aarde” geformeer—nog ’n verklaring wat wetenskaplik korrek is (Genesis 2:7). Die mens is ook “na die beeld van God” gemaak. Is dit nie waar nie? Die mens is klaarblyklik gemaak om op ’n veel hoër vlak as diere te dink en te redeneer. Hy het ’n sedelikheidsgevoel en waardering vir geestelike waardes wat by diere ontbreek. Selfs primitiewe stamme het hulle godsdiens; maar wat is die godsdiens van byvoorbeeld ’n hond of ’n aap?—Genesis 1:27.
Die antieke Bybelse verslag bied betroubare informasie oor die aarde en die lewensvorme daarop. Kom ons kyk dus onbevooroordeeld na wat dit oor die vroegste geskiedenis van die mensdom sê.
Jehovah het ’n pragtige tuiste vir die mens voorberei—“’n tuin . . . in Eden” met “allerhande bome . . . begeerlik om te sien en goed om van te eet” (Genesis 2:8, 9). Die flora—bome, bloeisels, vrugte en blomme—kan ’n voortdurende bron van genot wees. Die mens is ook bevredigende werk gegee—om sy paradystuiste te bewerk en te bewaak—sowel as verantwoordelikheid—om ‘oor alle diere te heers’ (Genesis 1:28; 2:15). Stel jou dit voor! ’n Lieflike tuin en ’n magdom bekorende fauna om te versorg—sonder dat die mens hom ooit oor veroudering en die dood hoef te bekommer.
Maar daar het nog ’n wonderlike gawe op hom gewag! Adam het opgemerk dat al hierdie skepsele maats gehad het en afstammelinge kon voortbring. Waar was sy maat dan? Toe hy uit ’n diep slaap wakker word—daar was sy! Wat ’n heuglike ondervinding tog! Diep geroer het Adam waarskynlik die eerste poësie geuiter:
“Dit is nou eindelik been van my gebeente en vlees van my vlees. Sy sal mannin genoem word, want sy is uit die man geneem.”—Genesis 2:23.
Die geskiedverslag wat in die Bybel bewaar is, deel ons mee: “God het hulle geseën, en God het vir hulle gesê: Wees vrugbaar en vermeerder en vul die aarde, onderwerp dit” (Genesis 1:28). Wat ’n wonderlike voorreg—om ’n volmaakte menseras voort te bring wat vir ewig op ’n paradysaarde kan lewe! Dit was God se oorspronklike voorneme met die mens.
Waarom sterf ons?
Maar Adam en Eva was nie robotte wat geprogrammeer was om te doen wat God wou hê nie. Hulle kon self besluite neem en planne beraam. God het gevolglik hulle lojaliteit op ’n eenvoudige wyse op die proef gestel: “Van al die bome van die tuin mag jy vry eet, maar van die boom van die kennis van goed en kwaad, daarvan mag jy nie eet nie; want die dag as jy daarvan eet, sal jy sekerlik sterwe.”—Genesis 2:16, 17.
Maar agter die skerms het daar moeilikheid gebroei. Toe ’n magtige engel of geesskepsel die wonderlike vooruitsig gesien het van ’n menseras wat die aarde vul, het hy hulle gehoorsaamheid en aanbidding vir homself begeer. Deur middel van ’n tussenganger het hy die eerste leuen vertel: “Julle sal gewis nie sterwe nie.” Hierdie opstandige engel het aldus “Satan” (teenstander) en “Duiwel” (lasteraar) geword.—Genesis 3:1-5; Johannes 8:44; Openbaring 12:9.
Die eerste paar het nie in daardie eenvoudige toets van lojaliteit aan God geslaag nie. Hulle het verraaiers geword, en God kan verraaiers nie gedoog nie. Hulle is uit Eden gewerp en het eindelik die voorspelde straf—die dood—ontvang. Hulle kinders, wat gebore is nadat hulle ouers veroordeel is, kon nie volmaakte gesondheid en die ewige lewe erf nie.—Romeine 5:12.
Dit het lank geduur voordat Adam gesterf het—930 jaar—maar God se vonnis was onontkombaar! Nagenoeg 2 000 jaar lank het die mens se ouderdom merkwaardig hoog gebly. Adam se seun Set het 912 jaar oud geword, Enos 905, Kenan 910, Metusalag (die hoogste ouderdom wat bekend is) 969 jaar. Noag het 950 jaar oud geword. Van toe af het die ouderdomme vinnig gedaal.—Genesis 5:5, 8, 11, 14, 27; 9:29; 11:10-25.
Daardie interessante verslag lig die potensiële hernuwingskrag van die menseliggaam toe. Hoewel ons ver verwyder is van Adam se oorspronklike menslike volmaaktheid, hernieu ons liggaamselle hulself. Die Encyclopædia Britannica sê: “Die potensiële onsterflikheid van al die onontbeerlike sellulêre elemente van die [menslike] liggaam is òf ten volle toegelig òf so ver gevoer dat die waarskynlikheid baie groot is.” As mense byna duisend jaar lank gelewe het ondanks die las van sonde en die dood wat in hulle liggame aan die werk was, kan ons net dink hoe lank hulle kan lewe sonder daardie verskriklike gebrek.
Bevryding van sonde en die dood
Die belangrike saak is egter dat hoewel menslike projekte, wetenskaplike projekte inkluis, dikwels faal, God nie kan faal nie: “My woord . . . sal nie leeg na My terugkeer nie, maar doen wat My behaag en voorspoedig wees in alles waartoe Ek dit stuur” (Jesaja 55:11). Ons kan van sonde en die dood bevry word. Hoe?
Ons is die gevangenes van sonde en die dood. Maar Jesus, ’n tweede “Adam” in die sin dat hy ’n volmaakte man was terwyl hy op aarde was, het ’n offerdood gesterf om terug te koop wat Adam verloor het—volgens God se antieke wet van “lewe vir lewe”. “Want soos deur die ongehoorsaamheid van die een mens [Adam] baie tot sondaars gestel is, so sal ook deur die gehoorsaamheid van die Één [Jesus] baie tot regverdiges gestel word” (1 Korinthiërs 15:45; Exodus 21:23; Romeine 5:19). Jehovah se liefde vir die mensdom het dit moontlik gemaak.—Johannes 3:16.
Die ewige lewe is een van die hoofleerstellings van die “Nuwe Testament”, ’n Minderheid, 144 000, “geroepe en uitverkore en getrou”, sal die voorreg geniet om as konings saam met Christus op sy hemelse troon te regeer (Openbaring 17:14; 3:21). Die Bybel verseker ons egter dat ’n groot menigte gehoorsame mense vir ewig in ’n herstelde aardse paradys sal lewe.—Openbaring 7:9-17.
Wanneer? Hoe?
Lees gerus Mattheüs hoofstuk 24 en Lukas hoofstuk 21. Dit voorspel wêreldoorloë, voedseltekorte, aardbewings op verskillende plekke, valse profete, ’n vermeerdering van die ongeregtigheid, pessiektes, groot vrees vir die toekoms en veel meer. Jesus het gesê: “So moet julle ook weet dat die koninkryk van God naby is wanneer julle hierdie dinge sien gebeur.” Ja, die langverwagte oorskakeling van menseheerskappy na God se Koninkryk kom vinnig nader.—Lukas 21:31.
Net so seker soos wat die sonsopgang more ’n nuwe dag gaan bring, so sal die snelle vernietiging van God se vyande die weg baan vir “’n nuwe aarde waarin geregtigheid woon”. God het dit beloof. Hy kan nie lieg nie (2 Petrus 3:13; Jesaja 65:17; Hebreërs 6:18). Wat ’n wonderlike voorreg sal dit tog wees om vir ewig in daardie nuwe aarde te lewe! Is dit vir jou? Word jy nie aangegryp deur daardie vooruitsig nie?
Jehovah het voorsiening gemaak sodat ons lewegewende kennis kan verkry—die ware lewenselikser. Begin gerus om hierdie kennis in te neem deur ’n Bybelstudie in jou huis te geniet. Jehovah se Getuies sal jou met graagte—en gratis—help om dit te doen!—Johannes 17:3.
[Prent op bladsy 5]
OOPWERKAANSIG VAN ’N SEL
Die ontsagwekkende ingewikkeldheid van ’n lewende sel kon nie net ’n ongeluk wees nie
GOLGI-APPARAAT
GLADDE ENDOPLASMIESE RETIKULUM
SENTROSOME
MIKROVILLI
GROWWE ENDOPLASMIESE RETIKULUM
KERNMEMBRAAN
KERN
NUKLEOLUS
LISOSOOM
RIBOSOOM
MITOCHONDRIA
SELWAND
[Prent op bladsy 6]
Het diere ’n godsdiens?