Hoe beplan jy vir die toekoms?
“ONS moet die toekoms ernstig opneem, want dit is waar ons die res van ons lewe gaan deurbring!” Jy stem waarskynlik met daardie woorde saam. Die meeste van ons sien die wysheid daarvan in om ’n mate van voorsorg vir die toekoms te maak.
In sommige gemeenskappe probeer egpare om baie kinders te hê sodat daar iemand sal wees om vir hulle te sorg as hulle die dag oud is. Jongmense gaan miskien universiteit toe om hulle vir ’n goeie betrekking te bekwaam. Volwassenes belê hulle spaargeld in ’n poging om ’n redelik kommervrye oudag te verseker. En baie wat geld as die beste waarborg vir die toekoms beskou, bestee ’n groot deel van hulle tyd en krag daaraan om ryk te word, dikwels ten koste van hulle gesondheid.
Hoe seker is dit?
Hierdie maniere om vir die toekoms voorsorg te maak, kan konvensionele wysheid genoem word, en hulle is in sekere mate prakties. Die probleem is dat hulle nie altyd so geslaag is nie. Arm ouers het miskien baie kinders, net om hulle aan siekte of wanvoeding te sien sterf. Of talle volwasse kinders weier om vir hulle ouers te sorg. Mense met universiteitsopleiding sit soms sonder werk of is ongelukkig. Selfs skatryk manne en vroue vind uit hoe waar die woorde van Jesus Christus is: “Iemand se lewe bestaan nie uit die oorvloed van sy besittings nie.”—Lukas 12:15.
Daarbenewens is baie mense bekommerd oor die verergerende besoedeling, die groei van kernarsenale, die toenemende onbestendigheid in internasionale betrekkinge en die wankelrige ekonomiese situasie, sowel as die agteruitgang in sedes. Hulle het die onaangename voorgevoel dat die toekoms waarvoor hulle so noukeurig voorsorg maak, verydel sal word deur gebeure buite hulle beheer. Psigiater Karl Menninger het die gevoel van baie uitgedruk toe hy gesê het: “Die wêreld is in ’n senuweeagtige, onvaste toestand waarin verskriklike dinge kan gebeur.”
Bowendien verydel mense dikwels hulle eie planne vir die toekoms. Ten spyte van toenemende getuienis oor die gevare van dwelmmisbruik, gebruik al hoe meer mense dwelmmiddels. Navorsing het bewys dat die rookgewoonte tot kanker en ander lewensgevaarlike siektes kan lei. En tog hou baie aan om te rook. Baie sterf in verkeersongelukke wat veroorsaak is omdat hulle of iemand anders onder die invloed van sterk drank bestuur het. Maar mense hou aan om onder die invloed te bestuur. Onsedelikheid lei dikwels tot seksueel oordraagbare siektes, maar baie laat hulle nie daardeur van stryk bring nie.
Daar haper iets
Die feit is dat daar iets haper aan die manier waarop die meeste mense vir die toekoms beplan. Konvensionele wysheid neem nie al die feite in aanmerking nie en bevredig nie al die mens se behoeftes nie.
Met die oog hierop sal dit jou moontlik interesseer om te weet dat die Bybel van twee soorte wysheid praat—“die wysheid van hierdie wêreld” en “die wysheid van God” (1 Korinthiërs 1:20, 21). Ofskoon dit sekere korttermynvoordele inhou om op die gebruiklike maniere voorsorg te maak, is konvensionele wysheid feitlik waardeloos indien ’n mens vir ’n langtermyntoekoms wil voorberei.
Jesus het gesê: “Die wysheid word geregverdig deur sy werke” (Mattheüs 11:19, NW). Ons nooi jou om vir ’n paar minute “die wysheid van God” in oënskou te neem en te kyk hoe dit jou beskouing kan beïnvloed wanneer jy vir die toekoms beplan.