Jou toekoms kan gelukkig wees

’n BELANGRIKE gebeurtenis gedurende die eerste eeu van ons Gewone Jaartelling het getoon dat meer as konvensionele wysheid nodig is indien ons ’n suksesvolle toekoms wil beplan. In daardie dae het ’n groot deel van die wêreld onder die keiserlike heerskappy van Rome gestaan. Jesus Christus se vaderland, Palestina, was net ’n klein deeltjie van die ontsaglike Romeinse Ryk. Maar die Jode aldaar het groot idees gehad. Hulle was ongeduldig onder die Romeinse bewind en het dikwels gerebelleer. Konvensionele wysheid het hulle laat dink dat God aan hulle kant is.

In die sewende dekade van die eerste eeu het die Jode ’n kragtige poging aangewend om die Romeinse juk af te skud. ’n Romeinse leër het teen hulle opgeruk en Jerusalem byna ingeneem, maar toe weer weggetrek. Die rebelle het gedink dat hulle met God se hulp oorwin het. Maar Jesus het reeds voorspel dat die stad vernietig sou word. Getroue Christene het derhalwe die onttrekking van die Romeine gebruik as ’n geleentheid om uit die stad te vlug (Mattheüs 23:33-39; Lukas 21:20-24). Die Romeine het eerlank teruggekeer. In 70 G.J. is Jerusalem vernietig en sy inwoners om die lewe gebring of as slawe weggevoer. Net die wat verstandig genoeg was om aan Jesus se waarskuwing gehoor te gee, het daardie verskriklike slagting ontkom.

Dit was ’n dramatiese bewys van die waarheid van die Bybelspreuk: “Wysheid is ’n beskutting, geld is ’n beskutting; maar die voordeel van kennis is: die wysheid hou die besitter daarvan in die lewe” (Prediker 7:12). Deur Christus het God aan Jesus se volgelinge kennis van die toekoms verskaf. Hulle het verstandig opgetree ooreenkomstig daardie kennis, en daardie “wysheid van God” het hulle gered in ’n situasie waar geld, wêreldlike geleerdheid en dies meer van nul en gener waarde sou gewees het.—1 Korinthiërs 1:21.

In vandag se wêreld vol onsekerheid is baie mense bang dat dieselfde ding hulle kan oorkom as wat daardie Jode in Jerusalem oorgekom het. Al hulle planne vir die toekoms kan verydel word deur ’n kataklisme buite hulle beheer. Wat ons dus nodig het, is dieselfde soort kennis as wat eerste-eeuse Christene gehad het—’n begrip van wat die toekoms waarlik inhou en wat die verstandigste handelwyse is.

Waar kan ons sulke kennis vind?

Elke jaar word daar duisende boeke oor elke denkbare onderwerp gepubliseer. Maar ten spyte van al hierdie inligting lyk die toekoms onheilspellend. Ons het egter vandag ’n boek wat anders as alle ander publikasies is. Daar is reeds voor Salomo se dag met die skrywe daarvan begin, en dit bevat baie “woorde van die wyse manne” wat soos “prikkels” is en ’n ontvanklike persoon tot wyse optrede aanspoor (Prediker 12:11). Toe Jesus aarde toe gekom het, was die grootste deel van hierdie boek reeds geskryf, en hy het die raad daarin vryelik gebruik om sy volgelinge te help om verstandig op te tree. Jesus het na hierdie wyse woorde verwys toe hy gesê het: “Daar is geskrywe: Die mens sal nie van brood alleen lewe nie, maar van elke woord wat deur die mond van God uitgaan.”—Mattheüs 4:4.

Daardie boek is natuurlik die Bybel. Maar in watter opsig is die Bybel anders as die eindelose stroom boeke wat vandag gepubliseer word? Om een ding te noem, dit bied ’n ander soort kennis. Waar anders kan jy die waarheid leer oor hoe die mens geskape is en waarom hy sterf? Watter ander boek beantwoord vrae soos die volgende: Waarom laat God goddeloosheid toe? Wat word van hierdie wêreld? Het die lewe ’n doel? Die Bybel bied eerlike antwoorde op hierdie en talle ander soortgelyke vrae.

Die Bybel gee ons ook wyse en praktiese raad vir die daaglikse lewe. Dit waarsku teen die slegte gevolge van dronkenskap, geslagsonsedelikheid en fisiese onreinheid. Dit beklemtoon die goeie gevolge van liefde, selfbeheersing en onselfsugtigheid. Dit stel ’n standaard vir die huwelik wat waarlik prakties is en bied waardevolle hulp vir ’n gelukkige gesinslewe. Die raad van die Bybel sal ons help om ’n lonende toekoms te beplan.—1 Korinthiërs 6:9-11; 13:4-8; Galasiërs 5:22-24; Efesiërs 5:21-6:4.

Onontbeerlike inligting

Die waarde van die Bybel lê egter veral daarin dat dit ons van Jehovah God, die Skepper, vertel. Kennis van Jehovah is lewensbelangrik, want hy is die Bron van alle kennis. Selfs uit die dinge wat mense omtrent die skepping en die heelal leer, kan hulle iets omtrent God te wete kom! Die Bybel sê: “Die hemele vertel die eer van God, en die uitspansel verkondig die werk van sy hande.” Ja, God se ‘onsigbare eienskappe kan in sy werke verstaan en duidelik gesien word” (Psalm 19:2; Romeine 1:20, vgl. NW). Navorsers en wetenskaplikes wat God buite rekening laat, sal tien teen een verkeerde of onvolledige gevolgtrekkings maak.

Kennis van Jehovah is ook noodsaaklik omdat dit ons laat besef dat God sy eie voorneme met die aarde en die mensdom het. “Baie planne is in ’n man se hart, maar die raad van die HERE, dié sal bestaan” (Spreuke 19:21). Ongeag wat mense probeer bereik, as hulle planne nie in harmonie met God se voorneme is nie, sal daardie planne op niks uitloop nie.—Psalm 127:1.

“Die vrees van [Jehovah] is die beginsel van die kennis”, het koning Salomo gesê (Spreuke 1:7). Wysheid wat op sulke kennis gegrond is, het werklik waarde wanneer ’n mens vir die toekoms beplan. Maar die Bybel noem Jesus Christus ook die “Wonderbare Raadsman” (Jesaja 9:5, NAV). Hoe kan ons toekomsplanne dan suksesvol wees as ons hom ignoreer? Ons moet ag slaan op sy “woorde van die ewige lewe” wat in die Bybel bewaar is (Johannes 6:68). Daarbenewens moet ons hom erken as God se groot, aangestelde Koning, die Regter van die ganse mensdom (Johannes 5:22). En ons moet reageer op die groot liefde wat hy getoon het deur sy lewe te gee as ’n offer vir die mensdom se sondes.—Johannes 3:16; 1 Johannes 2:1, 2.

Ja, Jesus is ’n sleutelfiguur in die mens se geskiedenis, en alle planne waarin hy buite rekening gelaat word, sal beslis wankelrig wees. Dit is veral waar wanneer ons kyk wat die profeet Daniël oor hom gesê het. Waar hy van God se Koninkryk onder Jesus Christus gepraat het, het Daniël gesê: “Die God van die hemel [sal] ’n koninkryk verwek wat in ewigheid nie vernietig sal word nie, en die heerskappy daarvan sal aan geen ander volk oorgelaat word nie; dit sal al daardie koninkryke verbrysel en daar ’n einde aan maak, maar self sal dit vir ewig bestaan” (Daniël 2:44, Psalm 2:1, 9). God se Koninkryk onder die Koning Jesus Christus gaan dus binnekort al die koninkryke van hierdie aarde vervang. Daarom sal al die dinge wat die mensdom vandag kwel—die besoedelingsprobleem, die bedreiging van kernoorlog, die ekonomiese en politieke onbestendigheid—eerlank tot die verlede behoort (Openbaring 11:18). Ja, jy kan voorwaar ’n gelukkige toekoms geniet in die komende aardse Paradys onder Koninkryksheerskappy.—Lukas 23:43.

Hierdie kennis help ons om ons ewewig te bewaar wanneer ons die onvermoë van wêreldheersers sien om krisisse op te los. Maar daar is ’n probleem wat te bowe gekom moet word.

Moenie bang wees vir wysheid nie

In die eerste eeu het Jesus mense geleer soos niemand voor hom ooit geleer het nie. Hy het sy gesag getoon deur siekes, blindes en lammes te genees en selfs dooies op te wek (Mattheus 11:5, 6). Hierdie verstommende wonderwerke het gepaard gegaan met Jesus se onbesmette lewenswyse (Hebreërs 7:26). Sulke dinge het ongetwyfeld bewys dat Jesus die langbeloofde Messias is. En tog het hy nie volgens konvensionele wysheid gepreek nie, en die meeste Jode het hom verwerp.

’n Paar jaar later het die Christenapostel Paulus vir koning Agrippa gepreek. In antwoord op Paulus se ernstige woorde het Agrippa gesê: “Jy beweeg my byna om ’n Christen te word” (Handelinge 26:28). Dit is duidelik dat hy die krag van die boodskap kon voel. Maar dit het onkonvensioneel geklink en sou groot veranderinge in sy lewenswyse vereis het. Gevolglik het Agrippa nooit ’n Christen geword nie.

Soos koning Agrippa of die Jode wat versuim het om op Jesus se woorde te reageer, vind baie dit vandag veel makliker om konvensionele wysheid aan die dag te lê as om God se wysheid te aanvaar. Maar onthou dat slegs daardie Jode wat wel op Jesus se boodskap gereageer het Jerusalem se vernietiging oorleef het.

Net so is dit slegs deur op God se wysheid te reageer dat ons as mense vandag verstandige toekomsplanne kan beraam. Solank hierdie stelsel voortduur, sal ons weliswaar ook ons gesonde verstand moet gebruik wanneer ons ons lewe reël. Maar as al ons toekomsplanne op hierdie stelsel gevestig is, sal hulle uiteindelik op niks uitloop nie, want die stelsel se einde is naby. Dit is die weg van ware wysheid om die Bybel noukeurig te lees sodat ons van God se voornemens kan leer. Ons moet dit biddend bestudeer om vas te stel wat vandag sy wil vir ons is. En ons sal verstandig optree indien ons pligsgetrou daardie wil doen.

“Die wysheid van God” bring goeie vrugte voort. Jesus se halfbroer Jakobus het gesê: “Wie is wys en verstandig onder julle? Laat hom uit sy goeie lewenswandel sy werke in sagmoedige wysheid toon. . . . Maar die wysheid van bo is ten eerste rein, dan vredeliewend, vriendelik, geseglik, vol barmhartigheid en goeie vrugte, onpartydig en ongeveins” (Jakobus 3:13-17). Sulke wysheid sal voorwaar ‘die besitter daarvan in die lewe hou’! (Prediker 7:12). Dit sal jou in staat stel om met welslae ’n gelukkige toekoms te beplan.

[Lokteks op bladsy 5]

“Die wysheid van God” het die vroeë Christene gered in ’n situasie waar geld waardeloos was

[Prent op bladsy 6]

Noukeurige Bybelstudie onthul dat die Koning Jesus Christus ‘die nasies met ’n ysterstaf sal verpletter’

[Lokteks op bladsy 7]

Wysheid gegrond op kennis van God het werklik waarde wanneer ’n mens vir die toekoms beplan