“Die tyd is kort”
1. Waarom dink sommige dat die mensdom se tyd min raak?
HIERDIE stelsel se tyd raak nou min. Een rede waarom baie tot hierdie slotsom gekom het, is dat selfs die bestaan van die mensdom bedreig word. Trouens, ‘n kernslagting is skynbaar vandag so naby dat dit volgens sommige net “drie minute voor middernag” is!
2. Wat het een joernalis omtrent die kernbedreiging gesê?
2 Waar hy oor die onderwerp “Die skadu van die bom” geskryf het, het Australiese joernalis Nick Brash gesê: “‘n Gelignietkers wat ‘n half kilogram weeg, is genoeg om ‘n man uitmekaar te skiet. Maar vandag is die kernarsenaal gelykstaande aan vier metrieke ton geligniet vir elke man, vrou en kind op aarde. Meer as [R800-miljard] is al aan kernwapens bestee, en meer as [R65-miljard] sal vanjaar [1983] rondom die wêreld aan wapens bestee word. Dit is ‘n ontsaglike hoeveelheid oorbodige vernietigingskrag. Dit is soos om ‘n enkele muskiet met 10 blikkies Mortein [‘n insekdoder] te bespuit.”—The Sun Weekend Magazine (Melbourne, Australië), 23 April 1983.
3. Wat kan gesê word oor die waarskynlike gevolge van ‘n kernoorlog?
3 Dit is moeilik om jou die waarskynlike gevolge van ‘n kernoorlog voor te stel. Benewens die dood van miljoene, die sluier van aardwye neerslag, die ekologiese skade en so meer sal daar wêreldwyd op maatskaplike, politieke en ekonomiese gebied geweldige ontwrigting wees. Trouens, dr. Brian Martin, ‘n fisikus en navorser aan die Australiese Nasionale Universiteit, erken: “Ons weet eenvoudig nie genoeg om met sekerheid al die wêreldwye gevolge van kernoorlog te voorspel nie.”
4. (a) Waarom kan ons seker wees dat die mensdom homself nie in ‘n kernslagting sal uitwis nie? (b) Hoe weet ons dat daar min tyd vir die huidige stelsel oor is?
4 Die toekoms lyk inderdaad onheilspellend. Maar skep moed, alle liefhebbers van God! Hoewel daar min tyd oor is vir die huidige stelsel sal die mensdom homself nie in ‘n chaotiese kernslagting vernietig nie. Daarvan kan ons seker wees, want Jehovah, die Formeerder en Maker van die aarde, “het dit nie geskape om woes te wees nie, maar dit geformeer om bewoon te word” (Jesaja 45:18). Die enigste manier waarop die mensdom van vernietiging gered kan word, is natuurlik deur snelle optrede van Bo om ‘n einde te maak aan hierdie stelsel, sowel as sy kernwaansin. Gelukkig sal die Skepper van die planeet Aarde en van die mensdom spoedig hierdie bose, selfmoordende stelsel vernietig. Die stelsel se tyd is kort omdat “die groot dag van die HERE” ophande is! (Sefanja 1:14-18). Hoe vertroostend is dit egter om te weet dat Jehovah gedurende daardie vinnig naderende dag van afrekening ‘almal sal bewaar wat Hom liefhet, maar al die goddelose sal verdelg’!—Psalm 145:20.
Hoeveel tyd is oor?
5. Wat wou Jesus se gesalfde volgelinge graag weet, volgens Openbaring 6:9, 10?
5 God sal ongetwyfeld teen sy vyande optree. Maar hoe lank sal dit nog wees voor hy ‘n einde maak aan hierdie bose stelsel en sy Nuwe Orde van vrede en geregtigheid tot stand bring? Jy is miskien ‘n getuie van Jehovah wat graag die antwoord op daardie vrae wil weet. In hierdie opsig voel jy soos die vermoorde gesalfde Christene in Openbaring wat in ‘n figuurlike sin uitroep: “Hoe lank, o heilige en waaragtige Heerser, oordeel en wreek U nie ons bloed op die bewoners van die aarde nie?” (Openbaring 6:9, 10). Ja, daardie gesalfdes wil as ’t ware weet wanneer God hulle bloed gaan wreek. Dit is geen wonder dat al Jehovah se Getuies vandag gretig uitsien na “die groot dag van die almagtige God” by Armageddon nie!—Openbaring 16:14-16.
6, 7. (a) Wat het Paulus in 1 Korinthiërs 7:29 in verband met tyd gesê? (b) Watter woorde van Petrus beklemtoon die feit dat hierdie stelsel aan ‘n rampspoedige einde sal kom?
6 Daar het ‘n beloning gewag op daardie gesalfde getuies wie se bloed vergiet is weens hulle getrouheid aan Jehovah, want die Bybel sê: “Aan elkeen van hulle is wit klere gegee; en aan hulle is gesê dat hulle nog ‘n klein tydjie moes rus totdat ook hulle medediensknegte en hulle broeders wat nog gedood sou word soos hulle, voltallig sou wees” (Openbaring 6:11). Ons kan daarvan seker wees dat God op sy bestemde tyd sal optree. Trouens, die woorde van die apostel Paulus in 1 Korinthiërs 7:29 is heel gepas. Hy het eenvoudig aan medegelowiges gesê: “Die tyd is kort.”
7 Paulus se woorde is nie alleen ‘n aanmoediging vir Jehovah se hedendaagse knegte nie, maar toon ook dat Christene hulle lewe moet toespits op die dringende werk wat God hulle gegee het. Die apostel Petrus het op soortgelyke trant geskryf: “Die einde van alle dinge is naby” (1 Petrus 4:7). Petrus het geweet dat hierdie stelsel vir ‘n rampspoedige einde bestem is. Dit is waarop dit afstuur!
8. Watter uitwerking behoort die feit dat hierdie stelsel se einde naby is op Jehovah se volk te hê?
8 Paulus sowel as Petrus het die feit beklemtoon dat hierdie stelsel gedoem is. Dit is iets wat ware Christene nooit moet vergeet nie. Die einde sal in ons dag kom, en al die getuienis dui daarop dat dit sommer baie naby is. Daarom moet ons hele lewenswyse dag na dag daardie oortuiging weerspieël. Bowendien behoort die feit dat ons al so diep in die laaste dae van hierdie stelsel is ons vasbeslote te maak om ons bes te doen in die goeie en baie dringende werk om as Jehovah se gereinigde en ywerige getuies die goeie nuus te verkondig.—Titus 2:13, 14.
Diep in “die tyd van die einde”
9. Waardeur word mense se aandag vandag in beslag geneem, en het dit al ooit tevore gebeur?
9 Jesus Christus het voorspel dat mense hulle gedurende sy onsigbare teenwoordigheid met die alledaagse sake van die lewe sou besig hou. Hulle aandag sou verdeel wees, soos die geval was met mense in die dae van Noag en van Lot. “Soos dit gebeur het in die dae van Noag, so sal dit ook wees in die dae van die Seun van die mens”, het Jesus gesê met verwysing na die tyd van sy onsigbare teenwoordigheid wanneer hierdie bose stelsel vernietig sal word.—Lukas 17:26-30.
10, 11. Watter bewyse word hier aangevoer om te toon dat hierdie stelsel se einde naby is?
10 Beskou ook die profesieë wat in Mattheüs 24, Markus 13 en Lukas 21 opgeteken is. Jesus het dinge voorspel wat geheel en al buite die mens se beheer is—dinge soos pessiektes en groot aardbewings. Daar was boonop sedert 1914 ‘n ‘vermeerdering in ongeregtigheid’. Vandag se nuus, veral in groot stede, is dikwels niks meer as ‘n kroniek van misdadigheid en korrupsie nie. Dit behels meer as stygende misdaadsyfers, want daar heers vandag ‘n gees van minagting vir wetlike beperkinge, en die liefde van die meeste is beslis besig om te verkoel.—Mattheüs 24:12.
11 Daar is ook nou “benoudheid van nasies” omdat mense radeloos is met hulle toenemende probleme (Lukas 21:25, 26). Dan was daar ook ‘n vermindering in die lede van “hierdie geslag” van 1914 wat nie sal verbygaan voor die vervulling van alles wat Jesus vir ons tyd voorspel het nie (Mattheüs 24:34). Dit is nog ‘n duidelike teken dat hierdie stelsel se einde naby is.
12. Wat is ongetwyfeld die grootste bewys dat ons diep in “die tyd van die einde” lewe?
12 Talle ander bewyse kan aangevoer word om te toon dat ons diep in “die tyd van die einde” lewe (Daniël 12:4). Maar die grootste bewys dat ons naby die einde van hierdie stelsel is, is ongetwyfeld die wêreldwye Koninkrykspredikingswerk wat deur Jehovah se Getuies gedoen word. So iets het nog nooit voorheen gebeur nie. Ja, in 205 lande rondom die wêreld is meer as 2 650 000 getuies van Jehovah ywerig besig met die goeie werk om die bemoedigende boodskap te verkondig dat Christus sedert 1914 in Koninkryksmag heers. En Jesus het gesê dat ‘die einde sal kom’ wanneer hierdie goeie nuus van die Koninkryk in die hele wêreld verkondig is.—Mattheüs 24:14.
Lewe ooreenkomstig Bybelse raad
13. Hoe moet ons Paulus se woorde verstaan dat ‘die wat vroue het, moet wees asof hulle nie het nie’?
13 Noudat die oorblywende tyd so min geword het en die einde so naby is, moet Jehovah se volk hulle lewe skik na die raad in die Bybel, soos die apostel Paulus se woorde in 1 Korinthiërs 7:29-31. Onmiddellik nadat hy gesê het dat ‘die tyd kort is’, het hy geskryf: “Van nou af moet ook die wat vroue het, wees asof hulle nie het nie.” Die apostel het nie hier bedoel dat ‘n Christeneggenoot sy vrou moet ignoreer nie. Nee, maar terwyl ‘n man getrou sy verantwoordelikhede in die huwelik nakom, moet sy verhouding met God die eerste plek in sy hart en verstand beklee en moet hy sorg dat sy huwelik daartoe bydra.
14. Hoe moet Koninkryksverkondigers persoonlike probleme en dies meer beskou, volgens 1 Korinthiërs 7:30?
14 In vers 30 sê Paulus voorts: “En die wat ween, [moet wees] asof hulle nie ween nie; en die wat bly is, asof hulle nie bly is nie; en die wat koop, asof hulle nie besit nie.” Wat beteken dit? Daardie geïnspireerde woorde onderstreep die feit dat persoonlike sake, hetsy dit besittings, smarte of vreugdes behels, nie vir Koninkryksbedienaars die belangrike sake is nie. “Tyd en lotgeval” tref ons almal en kan ons omstandighede plotseling verander (Prediker 9:11; Jakobus 4:14). Daarom sou dit onverstandig wees om só deur smart, ontberinge en allerlei persoonlike probleme in beslag geneem te word dat hierdie dinge ernstig inbreuk maak op ons bediening, ons voorreg om die Koninkryksevangelie te verkondig.
15. Waarom sou dit vir ‘n Christen die toppunt van dwaasheid wees om al sy aandag te wy aan persoonlike sake soos die strewe na materiële besittings en so meer?
15 In 1 Korinthiërs 7:31 het die apostel Paulus gesê: “Die wat hierdie wêreld gebruik, [moet wees] asof hulle dit nie ten volle gebruik nie.” Omdat mense van die wêreld geen Bybelse hoop het nie, dink hulle aan niks anders as hulle daaglikse behoeftes en ambisies nie. Hulle probeer dikwels om ander deur middel van materiële besittings te beïndruk. Maar die apostel Johannes het dit duidelik gestel dat die “gesteldheid op besit” een van “die wêreldse dinge” is wat ‘nie van die Vader kom nie maar uit die wêreld’. En Johannes verseker ons: “Die wêreld met al sy begeertes gaan verby, maar wie die wil van God doen, bly ewig lewe” (1 Johannes 2:16, 17, NAV). Dit sou dus die toppunt van dwaasheid vir enige Christen met die vooruitsig op ‘n ewige toekoms wees om só betrokke te raak by persoonlike sake dat hy niks tyd vir Koninkryksbelange oor het nie. (Mattheüs 6:25-32; vergelyk Filippense 2:19-22; 2 Timotheüs 4:10.) Hoewel dit nie verkeerd is om nuttige materiële besittings en selfs ‘n mate van gesonde ontspanning te geniet nie, moet ons nooit toelaat dat hierdie dinge die middelpunt van ons lewe word nie.—Lukas 12:15.
16. Watter gesindheid en doelwitte het wêreldse mense dikwels, maar wat moet vir Jehovah se knegte van die allergrootste belang wees?
16 Dit is nie ongewoon dat wêreldse mense, of diegene sonder ware geestelikheid, oor hulle lewenslot kla nie. (Vergelyk Judas 16.) As hulle sieklik is, kla hulle voortdurend dat hulle nie goed voel nie. Net so kla die armes miskien oor die feit dat hulle nie ryk is nie. Dinge soos goeie gesondheid en groot rykdom kan trouens verterende doelwitte in hulle lewe word! Hulle spartel om dit te verkry, en dan raak hulle baie bedruk as hulle nie daarin slaag nie. Maar vir Jehovah se toegewyde volk is “heilige diens” van die allergrootste belang (Romeine 12:1, 2, vgl. NW). Ons kom weliswaar voor probleme te staan, al is ons knegte van Jehovah. Maar dit verander ons nie in murmureerders en klaers oor hulle lewenslot nie. Ons het ‘n godgegewe werk om te doen, en hierdie geseënde werk geniet bowenal ons aandag. Ons is inderdaad vreugdevol omdat Koninkryksbelange die voorrang in ons lewe kry.—Mattheüs 6:33.
17. Wat moet Jehovah se knegte nie toelaat waar dit kom by dinge wat moontlik hulle aandag kan aftrek nie?
17 Wat is dan die verstandige weg vir Jehovah se knegte? Wel, ons kan gebruik maak van sommige dinge en dienste wat die wêreld verskaf, maar laat ons nooit toelaat dat enigiets ons aandag van God se diens aftrek nie (Lukas 21:34-36). Onthou dat niks in die huidige stelsel permanent is nie. Hierdie veranderlikheid kan op sigself ons aandag aftrek. Ja, soos Paulus gesê het, “die gedaante van hierdie wêreld gaan verby” (1 Korinthiërs 7:31). Maar ons moenie toelaat dat dit ons aandag van Jehovah se diens aflei nie.
Doen die Here se werk met ywer
18. (a) Watter werk moet ons lewens vul, aangesien ons sedert 1914 in “die tyd van die einde” lewe? (b) Wat sal bes moontlik met die probleme van die lewe gebeur as ons besig bly in die Here se werk?
18 Omdat ons geestelike insig het, sien ons die oorweldigende getuienis dat ons sedert 1914 in “die tyd van die einde” lewe. In die lig hiervan wil ons tog sekerlik nie die wêreld ten volle gebruik asof ons iets sou mis as ons dit nie doen nie. Laat ons eerder ons lewe met “die werk van die Here” vul. Ons moet oorvloedig wees in die Here se werk omdat ons weet dat ons arbeid in die Here nie tevergeefs is nie’ (1 Korinthiërs 15:58). Maak dus die prediking en onderrigting van Koninkryks-waarhede die hoofsaak in jou lewe. Wat sal dan bes moontlik met die probleme van die lewe gebeur? Hulle sal gewoonlik vervaag en minder belangrik, minder lastig raak!
19. Wat beteken dit om te ‘volhard tot die einde toe’?
19 Toe Jesus sy groot profesie aangaande die laaste dae van hierdie stelsel gegee het, het hy gesê dat sy volgelinge “deur almal gehaat [sal] word” ter wille van sy naam. “Maar”, het hy bygevoeg, “wie volhard tot die einde toe, hy sal gered word” (Markus 13:10-13). Vir ons as individue wat aan Jehovah toegewy is, kan “die einde” óf “die voleinding van die wêreld” óf ons eie dood wees, moontlik nadat ons onder vervolgers gely het (Mattheüs 24:3). Hoe dit ook al sy, ons het min tyd om die Here se werk te doen. Moet ons dan nie ywerig die Koninkryksboodskap verkondig nie? Ons moet beslis!
Hoog tyd vir optrede!
20. Hoe kon die Israeliete wat uit Babiloniese gevangenskap bevry is hulle besorgdheid oor die aanbidding van Jehovah toon?
20 Toe die Joodse ballinge in die sesde eeu v.G.J. uit Babiloniese gevangenskap bevry is, moes hulle ‘n besluit neem. Sou hulle na hulle vaderland terugkeer en Jehovah se aanbidding aldaar herstel, of sou hulle in Babilon bly? Israeliete wat in daardie stad gebly het, was nie noodwendig goddeloos nie, want die bejaarde Daniël was een van hulle. Hulle kon die terugkerende oorblyfsel materieel en moreel ondersteun en kon ook “vrywillige gawes” vir die huis van Jehovah in Jerusalem saamstuur (Esra 1:2-4). So kon hulle help om ware aanbidding te bevorder. Hoe vreugdevol kon al Jehovah se aanbidders tog gewees het toe die oorblyfsel na hulle vaderland vertrek het, tesame met die heilige voorwerpe vir gebruik by Jehovah se tempel! En die draers van die tempelvoorwerpe moes seker maak dat hulle hulle gereinig het van alle moontlike besmetting deur Babilon se godsdienstige en morele onreinheid.—Jesaja 52:11.
21. (a) Watter vrae kan jy jouself afvra? (b) Wat is waar ten opsigte van geleenthede om die goeie nuus te verkondig, in die lig van die feit dat ‘die tyd kort is’?
21 Is jy so besorg oor ware aanbidding soos daardie bevryde Israeliete van sowat 25 eeue gelede? Ag jy dit ‘n heuglike voorreg om vir Jehovah heilige diens te verrig as deel van ‘n gereinigde en ywerige organisasie wat sy heilige naam eer? Kan jy die baie bewyse onderskei dat ons diep in “die tyd van die einde” lewe? As jy ja kan antwoord op hierdie vrae, moet jy sorg dat jy nóú daadwerklik optree. Beywer jou daarvoor om Koninkryksbelange eerste in jou lewe te hou. Aangesien ,die tyd kort is’, word ons huidige geleenthede om die goeie nuus te verkondig al hoe belangriker. Geseënd is almal wat hulle lewe rondom die Koninkryk bou as lojale getuies van Jehovah wat oorvloedig is in die verkondiging van die goeie nuus terwyl daar nog tyd is!
Watter antwoorde sou jy gee?
◻ Waarom word die tyd vir hierdie stelsel nou min?
◻ Hoe weet ons dat ons diep in “die tyd van die einde” lewe?
◻ Wat sal bes moontlik met ons probleme gebeur as ons besig bly in die Here se werk?
◻ Wat moet die middelpunt van ons lewe wees, aangesien die einde naby is?
[Prent op bladsy 24]
Mag die probleme van die lewe nooit ons aandag van die Koninkrykspredikingswerk aftrek nie